Mɛni Blɔ Nɔ Ma Gu Konɛ I Kɛ Ye Fɔli Nɛ Sɛɛ Mlaahi Nɛ A Woɔ Mi Ɔmɛ A He Ní?

“Benɛ i ye jeha 15 ɔ, i nɛ́ nyagba ko ngɛ mlaahi nɛ ye fɔli wo mi ɔ a he, se amlɔ nɛ ɔ nɛ i ye jeha 19 ɔ, i nuɔ he kaa e sa nɛ ma ná he yemi fuu pe sa a.”​​—Sylvia.

Anɛ mo hu o nuɔ he kaa Sylvia lo? Ke jã a, lɛɛ munyu nɛ ɔ maa ye bua mo konɛ o nyɛ nɛ o kɛ o fɔli nɛ sɛɛ mlaahi nɛ a woɔ mo ɔ he ní.

• Nɔ́ nɛ e sa nɛ o le

• Nɔ́ nɛ o ma nyɛ maa pee

• Nɔ́ nɛ o juami bi de

Nɔ́ nɛ e sa nɛ o le

Loko o kɛ o fɔli maa sɛɛ mlaahi nɛ a woɔ mo ɔmɛ a he ní ɔ, mo susu níhi nɛ nyɛɛ se ɔmɛ a he kekle:

• Ke mlaa be ɔ, si himi maa pee basaa. A je blɔ pee Traffic light ngɛ gbɛjegbɛ nguahi a nɔ. Ke Traffic light, aloo kadimi níhi be blɔ he nɛ ma kudɔ lɔlehi ɔ, mɛni maa ba? Kaa bɔ nɛ lɔle kudɔmi he mlaahi yeɔ bua lɔlehi ɔ, jã kɛ̃ nɛ mlaahi nɛ a woɔ ngɛ weku ɔ mi ɔ kɛ tue mi jɔmi baa.

• Mlaahi nɛ o fɔli woɔ mo ɔ tsɔɔ kaa a suɔ mo. Se ke a wui mo mlaa ko kulaa a, lɔ ɔ maa tsɔɔ kaa a susuu we o he. Ke e ba jã a, anɛ o bua maa jɔ a he lo?

ANƐ O LE LO? O fɔli ɔmɛ hu ngɛ mlaahi nɛ e sa nɛ a ye nɔ! Ke o he we munyu nɛ ɔ yi ɔ, lɛɛ mo kane 1 Mose 2:24; 5 Mose 6:6, 7; Efeso Bi 6:4; kɛ 1 Timoteo 5:8 ɔ.

Se eko ɔ, o ngɛ he nue loloolo kaa mlaahi nɛ o fɔli ɔmɛ wo mo ɔ dɛ blɔ. Mɛni o maa pee?

Nɔ́ nɛ o ma nyɛ maa pee

Mo susu níhi a he kɛ sɛ hlami. Anɛ o fɔli ɔmɛ le mo kaa o ji nɔ ko nɛ ke a wo lɛ mlaa, e yeɔ nɔ lo? Ke o kɛ a mlaahi puɛ ní tsumi ɔ, lɛɛ pi be nɛ ɔ mi nɛ e sa kaa o bi mɛ nɛ a ha mo he yemi. Moo hyɛ munyu nɛ ji, “Mɛni Ma Pee Konɛ Ye Fɔli Ɔmɛ A He Mi Ye?”

Ke o yeɔ a mlaa nɔ ɔ, lɛɛ mo susu nɔ́ nɛ o maa de mɛ ɔ he. Ke o pee jã a, lɔ ɔ maa ye bua mo konɛ o le ke ji kaa e he hia nɛ o kɛ mɛ nɛ susu he. Lɔ ɔ se ɔ, mo bi o fɔli ɔmɛ konɛ a to be kɛ he nɛ sa nɛ nyɛ ma nyɛ maa hi kɛ susu he. Ke o kɛ o fɔli ɔmɛ kpe nɛ nyɛ ma sɛɛ ní ɔ, mo kai níhi nɛ nyɛɛ se nɛ ɔmɛ:

Mo je bumi kpo. Baiblo ɔ de ke: “Munyu gegeege haa nɔ mi mi woɔ la.” (Abɛ 15:1) Lɔ ɔ mo kai kaa: Ke o kɛ o fɔli ɔmɛ sã nya loo o pia mɛ kaa a ye mo sane yaya a, lɔ ɔ ma puɛ ní sɛɛmi ɔ kulaa.

“Ke i bɔ mɔde nɛ i je bumi kpo kɛ ha ye fɔli ɔ, lɔ ɔ haa nɛ mɛ hu a jeɔ bumi kpo kɛ haa mi. Ke wɔ tsuo wa je bumi kpo ɔ, e he wɛ kulaa kaa wa maa nu wa sibi sisi.”​—Bianca, 19.

Bu tue. Baiblo ɔ woɔ wɔ ga kaa wa ‘he nɛ e sɔ kɛ bu munyu tue, nɛ wa he nɛ e ko sɔ kɛ tu munyu’ (Yakobo 1:19) O hɛ ko je nɔ kaa o kɛ o fɔli lɛ ngɛ ní sɛɛe, enɛ ɔ he ɔ, e sa nɛ o bu mɛ hu tue, pi mo pɛ nɛ o maa hi munyu tue.

“Ke wa ngɛ wae ɔ, eko ɔ, e maa pee wɔ kaa wa le ní pe wa fɔli ɔmɛ, se ngɛ anɔkuale mi ɔ, enɛ ɔ pi anɔkuale kulaa. Nile ngɛ mi kaa wa maa bu a ga womi tue.”​​—Devan, 20.

Susu a he. Moo bɔ mɔde kaa o maa nu mɛ sisi. O kɛ Baiblo mi ga womi nɛ de ke, ‘nyɛ ko fo nyɛ nitsɛmɛ pɛ nyɛ nɔ́ mi, se mohu nyɛ fo ni kpahi hu a nɔ́ mi ɔ’ nɛ tsu ní. Nɛ́ tsɔɔ kaa e sa nɛ o fo o fɔli ɔmɛ hu a nɔ́ mi.​—Filipi Bi 2:4.

“Be ko nɛ be ɔ, jinɛ i naa ye fɔli ɔmɛ kaa nihi nɛ i kɛ mɛ ngɛ koli sie mohu pe nihi nɛ i kɛ mɛ bla kɛ ngɛ ní tsue. Se amlɔ nɛ ɔ, i yɔse kaa mamoo pe a ngɛ mɔde bɔe kaa a maa pee fɔli kpakpahi kaa bɔ nɛ imi hu i ngɛ mɔde bɔe kaa ma pee nɔkɔtɔma kpakpa a. Mɔde nɛ a ngɛ bɔe ɔ tsuo tsɔɔ kaa a suɔ mi nɛ a susuɔ ye he.”​​—Joshua, 21.

Moo tsɔɔ o juɛmi. Kaa nɔ hyɛmi nɔ́ ɔ, ngɔɔ lɛ kaa o fɔli ɔmɛ wo mlaa ko kaa: a sume nɛ o hɛɛ lɔle ngmlɛfia kake kɛ ya he nya buami ko nɛ o suɔ kaa o maa ya a sisi. O ma nyɛ ma hla nɔ́ he je nɛ a de jã a. Anɛ blɔ ɔ kɛmi ɔ he je lo, aloo he nya buami ɔ nitsɛ lɛ a bua juɛ he?

• Ke blɔ ɔ kɛmi ɔ he je lɛ a sume nɛ o hɛɛ lɔle ɔ, lɛɛ anɛ a maa suɔ kaa nɔ ko nɛ e le lɔle hɛɛmi saminya a nɛ piɛɛ o he kɛ ya lo?

• Ke he nya buami ɔ lɛ a bua juɛ he ɔ, lɛɛ anɛ o ma nyɛ maa tsɔɔ mɛ nihi nɛ maa ba he nya buami ɔ sisi kɛ nihi nɛ a maa hyɛ nɔ ɔ lo?

Ke o kɛ mɛ ngɛ munyu tue ɔ, mo kai nɛ o je bumi kpo nɛ o to o tsui si kɛ bu nɔ́ nɛ a ma de mo ɔ tue. Moo ngɔ o munyu tutui kɛ o ní peepee kɛ tsɔɔ kaa o “buu o tsɛ kɛ o nyɛ.” (Efeso Bi 6:2, 3) Anɛ a ma tsake a susumi lo? Eko ɔ, a ma tsake. Se eko ɔ, a be tsakee. A tsake a susumi jio, a tsakee we jio ɔ  . . .

O kɛ bumi nɛ kplɛɛ o fɔli ɔmɛ a blɔ tsɔɔmi nɔ. Enɛ ɔ ji ga womi ko nɛ e he hia wawɛɛ nitsɛ, se behi fuu ɔ, nihi maa a hɛ kɛ fɔɔ nɔ. Ke o nine sui nɔ́ nɛ o ngɛ hlae ngɛ o fɔli ɔmɛ a de ɔ nɔ nɛ o kɛ mɛ bɔni nya sami ɔ, o ma ha nɛ e he maa wa ha mɛ kaa a maa bu mo tue ke o bi mɛ nɔ́ ko be kpa. Se ke o kplɛɛ a blɔ tsɔɔmi nɔ ɔ, lɛɛ e he be wae ha mɛ kaa a maa bu mo tue nɛ eko ɔ, a ma tsake mlaa a ekomɛ, nɛ o ma ná he yemi fuu.