Mawu Je Ní Bɔmi Sisi

NÍ KPAKPAHI nɛ wa ngɛ tsuo je Mawu ngɔ. E bɔ pu nɛ e ha wɔ la piani, kɛ nyɔhiɔ kɛ dodoehi nɛ a ha wɔ la gbɔkuɛ. Nɛ Mawu bɔ zugba a hu ha wɔ konɛ waa hi nɔ.

Se pi pu ɔ, nyɔhiɔ ɔ, kɛ dodoe ɔmɛ nɛ Mawu bɔ kekle. Anɛ o le nɔ́ nɛ e bɔ kekle lo? Kekleekle ɔ, e bɔ nihi nɛ a ngɛ kaa lɛ nitsɛ. Wa be nyɛe maa na mɛ, kaa bɔnɛ wa be nyɛe maa na Mawu ɔ. Ngɛ Baiblo ɔ mi ɔ, a tsɛɛ mɛ ke bɔfohi. Mawu bɔ bɔfo ɔmɛ konɛ a kɛ lɛ nɛ́ hi hiɔwe.

Kekleekle bɔfo nɛ Mawu bɔ ɔ ngɛ slɔɔto. Mawu Bitɛte ji lɛ. Nɛ e piɛɛ e tsɛ ɔ he kɛ tsu ní. E ye bua Mawu kɛ bɔ ní kpahi tsuo. E ye bua Mawu nɛ a bɔ pu ɔ, nyɔhiɔ ɔ, dodoe ɔmɛ, kɛ wa zugba a hulɔ.

Jamɛ a be ɔ, kɛ zugba a nɔ ngɛ kɛɛ? Sisije ɔ, nɔ ko be nyɛe nɛ́ e hi zugba a nɔ. Nyu babauu kɛkɛ lɛ ha zugba a nɔ he tsuaa he. Se Mawu ngɛ hlae kaa nimli nɛ́ hi zugba a nɔ. Enɛ ɔ he ɔ, e bɔni níhi dlami kɛ fɔ si ha wɔ. Mɛni e pee?

Kekleekle ɔ, zugba a hia la. Lɔɔ heje ɔ, Mawu ha pu la a kpɛ kɛ ba zugba a nɔ. E pee lɛ konɛ wa ná nyɔ kɛ pia. Ngɛ lɔɔ se ɔ, Mawu ha nyu ɔ bua e he nya ngɛ he kake nɛ a ná zugba gbigbli.

Sisije ɔ, nɔ́ ko nɔ́ ko be zugba a nɔ. Zugba a ngɛ kaa foni nɛ o ngɛ hyɛe nɛ ɔ. Mɔmɔhi be nɔ, nɛ tsohi loo lohwe ko hu be nɔ. Lohi hu be nyu ɔ mi. Mawu ngɛ nítsumi fuu nɛ e ma tsu kɛ dla zugba a saminyayoo ha nimli kɛ lohwehi nɛ́ a hi nɔ.