Mawu Bɔ Hiɔwe Kɛ Zugba

Yehowa Mawu ji wa Bɔlɔ. Lɛ nɛ e bɔ níhi nɛ wa naa kɛ níhi nɛ wa nɛ́ ɔ tsuo. E bɔ hiɔwe bɔfohi fuu loko e bɔ níhi nɛ wa naa kɛ wa hɛ ngmɛ. Anɛ o le bɔ nɛ bɔfohi ngɛ ha lo? Bɔfohi ngɛ kaa bɔ nɛ Yehowa ngɛ ɔ. Kaa bɔ nɛ wa be nyɛe maa na Mawu ɔ, jã kɛ nɛ wa be nyɛe maa na bɔfo ɔmɛ. Bɔfo nɛ Yehowa bɔ kekleekle ɔ ye bua lɛ kɛ bɔ níhi fuu. Bɔfo nɛ ɔ ye bua Yehowa kɛ bɔ dodoe ɔmɛ, kɛ ní kpahi fuu. Ní nɛ ɔmɛ a kpɛti kake ji zugba nɛ ngɛ fɛu nɛ wa ngɛ nɔ ɔ nɛ.

Lɔ ɔ se ɔ, Yehowa dla zugba a nɔ saminya konɛ lohwehi kɛ adesahi nɛ a hi nɔ. E ha nɛ pu la kpɛ kɛ pue zugba a nɔ. E bɔ yokuhi, kɛ wo, kɛ pahi.

Lɔ ɔ se ɔ, o le nɔ́ nɛ ba lo? Yehowa de ke: ‘Ma pee nga, kɛ mɔmɔhi, kɛ tsohi.’ Kɛkɛ nɛ nga, kɛ mɔmɔhi, kɛ tso slɔɔtoslɔɔtohi nɛ woɔ yiblii bɔni puɛmi. Lɔ ɔ se ɔ, Yehowa bɔ lohwe ɔmɛ tsuo. E bɔ lohwe pɛlitsɛmɛ, pa mi lohi, kɛ lohwehi nɛ a sãã si. E bɔ lohwe tsɔwi komɛ kaa alɔngɔhi, kɛ lohwe ngua komɛ hu kaa suɔhi. Mɛni lohwe lɛ o suɔ wawɛɛ?

Lɔ ɔ se ɔ, Yehowa de bɔfo nɛ e bɔ kekleekle ɔ ke: “Ha nɛ waa pee nɔmlɔ adesa.” Adesahi maa je ekpa ngɛ lohwe ɔmɛ a he. A ma nyɛ maa pee klamahi po. A ma nyɛ maa tu munyu, a ma nyɛ maa muɔ, nɛ a ma nyɛ maa sɔle. A maa hyɛ zugba a kɛ lohwe ɔmɛ a nɔ hulɔ. Anɛ o le nyumu nɛ Mawu bɔ kekleekle ɔ biɛ lo? Ha nɛ waa hyɛ.