Nɔ́ Heje Nɛ́ A We ɔ Je A Dɛ

AMLƆ nɛ ɔ hyɛ nɔ́ nɛ ba ngɛ hiɛ ɔ. A ngɛ Adam kɛ Hawa kpo jee kɛ je abɔɔ nɛ ngɛ fɛu ɔ mi. Anɛ o le nɔ́ nɛ ha e ba ja lo?

A pee nɔ́ ko nɛ́ hi kulaa. Nɛ lɔɔ he ɔ Yehowa gbla a tue. Anɛ o le nɔ́ yayami nɛ́ Adam kɛ Hawa pee ɔ lo?

A pee nɔ́ ko nɛ́ Mawu wo mɛ si ngɛ he kaa a ko pee. Mawu de mɛ ke a ma nyɛ maa ye tsohi nɛ ngɛ abɔɔ mi ɔ nɔ yiblii ɔ eko. Se tso kake ko nɔ yiblii ɔ lɛɛ, Mawu de mɛ ke a ko ye, ke pi ja a ma gbo. E tsi jamɛ a tso ɔ nya ha lɛ pɛ e he. Nɛ wa le kaa e ji tɔmi kaa o maa ngɔ nɔ́ ko nɛ́ e ji nɔ kpa nɔ́, aloo pi ja? Mɛni ba?

Ligbi ko benɛ e piɛ Hawa nɔ kake pɛ ngɛ abɔɔ ɔ mi ɔ, sinɔ ko kɛ lɛ ba tu munyu. Mo susu he nɛ́ o hyɛ! E de Hawa ke e ye tso yiblii nɛ́ a wo mɛ si ngɛ he kaa a ko ye ɔ eko. Yehowa bɔɛ sinɔhi kaa a tu munyu. Enɛ ɔ tsɔɔ kaa nɔ ko lɛ ha sinɔ ɔ tu munyu ɔ nɛ. Mɛnɔ ji jamɛ a nɔ ɔ?

Pi Adam. Lɛɛ e maa pee nihi nɛ́ Mawu bɔ momoomo loko e bɔ zugba a a kpɛti nɔ kake. Ni nɛ ɔmɛ ji bɔfohi, nɛ wa be nyɛe maa na mɛ. Kikɛmɛ a bɔfo nɛ ɔ ba wo e he nɔ wawɛɛ. E bɔni susumi kaa e sa nɛ e plɛ nɔ yelɔ kaa Mawu. Nɛ e suɔ kaa nihi nɛ́ bu lɛ mohu tue pe Yehowa. Lɛ ji bɔfo nɛ́ ha sinɔ ɔ tu munyu ɔ nɛ.

Bɔfo nɛ ɔ nyɛ nɛ e sisi Hawa. Benɛ e de Hawa ke e ma plɛ kaa Mawu ke e ye tso yiblii ɔ, e he ye. Lɔɔ heje ɔ, e ye nɛ Adam hu ye. Adam kɛ Hawa gbo Mawu tue, nɛ lɔɔ heje nɛ a we nɛ ji abɔɔ nɛ ngɛ fɛu ɔ je a dɛ ɔ nɛ.

Se hwɔɔ se ko ɔ, Mawu ma ha zugba a nɔ tsuo maa pee fɛu kaa Eden abɔɔ. Pee se ɔ, wa maa kase bɔnɛ o maa pee ha konɛ mo hu o piɛɛ he kɛ dla zugba a nɔ nɛ e pee fɛu. Se amlɔ nɛ ɔ, ha waa hyɛ nɔ́ nɛ ba Adam kɛ Hawa nɔ.