Adam Kɛ Hawa Gbo Mawu Tue

Ligbi ko nɛ e piɛ Hawa nɔ kake too ɔ, sinɔ ko kɛ Hawa tu munyu. Sinɔ ɔ bi lɛ ke: ‘Anɛ e ji anɔkuale kaa Mawu sume nɛ nyɛɛ ye tso ɔmɛ tsuo a nɔ yiblii lo?’ Hawa de lɛ ke: ‘Wa ma nyɛ maa ye tso ɔmɛ tsuo a nɔ yiblii, ja kake pɛ. Ke wa ye jamɛ a tso ɔ yiblii ɔ, wa ma gbo.’ Sinɔ ɔ de Hawa ke: ‘Nyɛ be gboe. Ngɛ anɔkuale mi ɔ, ke nyɛ ye jamɛ a tso ɔ yiblii ɔ, nyɛ maa pee kaa Mawu.’ Anɛ nɔ́ nɛ sinɔ ɔ de ɔ ji anɔkuale lo? Dɛbi, e ji lakpa. Se Hawa he nɔ́ nɛ sinɔ ɔ de ɔ ye. Hawa hyɛ tso yiblii ɔ hluu nɛ e bɔni lɛ jlomi. E ye tso yiblii ɔ, nɛ e ha Adam hu eko. Adam le kaa ke a gbo Mawu tue ɔ, a ma gbo. Se kɛ̃ ɔ, e ye tso yiblii ɔ.

Pee se ngɛ ligbi ɔ mi ɔ nɔuu ɔ, Yehowa kɛ mɛ tu munyu. Yehowa bi Adam kɛ Hawa nɔ́ he je nɛ a gbo e nɔ tue ɔ. Hawa ke sinɔ ɔ nɛ sisi lɛ, nɛ Adam hu ke Hawa nɛ pee. Akɛnɛ a gbo Yehowa tue he je ɔ, e fie mɛ kɛ je abɔɔ ɔ mi. Yehowa ngɔ bɔfohi kɛ klaate ko nɛ ngɛ tsoe kɛ ya da abɔɔ ɔ nya konɛ Adam kɛ Hawa nɛ ko kpale kɛ ya abɔɔ ɔ mi hu.

Yehowa de ke e maa gbla nɔ nɛ sisi Hawa a hu tue. Pi sinɔ ɔ nitsɛ nɛ e kɛ Hawa tu munyu. Yehowa bɔɛ sinɔ kaa e tu munyu. Bɔfo yaya ko lɛ ha nɛ sinɔ ɔ tu munyu ɔ nɛ. E pee jã konɛ e nyɛ nɛ e sisi Hawa. A tsɛɛ jamɛ a bɔfo ɔ ke Satan Abosiami. Hwɔɔ se ɔ, Yehowa ma kpata Satan hɛ mi konɛ e ko sisi nihi nɛ a pee ní yayahi hu.