Yehowa Ngɔ E Mlaahi Kɛ Ha

BENƐ Israelbi ɔmɛ je Mizraim maa pee nyɔhiɔ enyɔ se ɔ, a ba su Sinai Yoku ɔ, nɛ a tsɛɛ lɛ hu ke Horeb ɔ he. Hiɛ ɔ nɔuu nɛ Yehowa kɛ Mose tu munyu kɛ je mio tso ɔ mi ngɛ ɔ nɛ. Ma a to si nɛ a hi si bɔɔ ngɛ hiɛ ɔ.

Mose kuɔ yoku ɔ, nɛ ma a mlɛ ngɛ yoku ɔ sisi. Yehowa de Mose ngɛ yoku ɔ nɔ kaa e suɔ nɛ Israelbi ɔmɛ nɛ́ bu lɛ tue konɛ a plɛ E ma nɛ ngɛ slɔɔto. Bɛnɛ Mose kple yoku ɔ, e de Israelbi ɔmɛ nɔ́ nɛ Yehowa de ɔ. Mabi ɔmɛ kplɛɛ kaa a maa bu Yehowa tue, ejakaa a suɔ nɛ a pee e ma.

Yehowa pee nyakpɛ nɔ́ ko ngɛ hiɛ ɔ. E ha nɛ lasuku je yoku ɔ mi, nɛ a nu oslabai gbami he. Yehowa kɛ ma a tu munyu nɛ e de ke: ‘Imi ji Yehowa o Mawu ɔ nɛ je mo kɛ je Mizraim zugba a nɔ ɔ nɛ.’ Enɛ ɔ se ɔ, e wo mɛ kita ke: ‘Nyɛ ko ja mawu kpa ko pe imi nɔ kake pɛ.’

Mawu ha Israelbi ɔmɛ mlaa 9 kɛ piɛɛ he. A tsui po. Nɛ a de Mose ke: ‘Mo nitsɛ o kɛ wɔ nɛ́ tu munyu, ejakaa wa ngɛ gbeye yee kaa ke Mawu kɛ wɔ tu munyu ɔ wa ma gbo.’

Pee se ɔ, Yehowa de Mose ke: ‘Moo kuɔ kɛ ba ye ngɔ ngɛ yoku ɔ nɔ. Nɛ ma ha mo tɛ tɛtlɛɛ enyɔ nɛ i ngma mlaahi nɛ i suɔ kaa mabi ɔmɛ nɛ́ a ye nɔ ɔ ngɛ nɔ.’ Lɔɔ he ɔ, Mose kpale kɛ ya yoku ɔ nɔ ekohu. E ya ye ligbi 40 ngɛ lejɛ ɔ.

Mawu ngɛ mlaahi babauu kɛ ha e ma a. Mose ngma mlaa nɛ ɔmɛ pue si. Mawu ha Mose tɛ tɛtlɛɛ enyɔ ɔmɛ hu kɛ piɛɛ he. Mawu nitsɛ ngma mlaa 10 nɛ́ e wo ma a ngɛ tɛ nɛ ɔmɛ a nɔ. A tsɛɛ mɛ Mlaa Nyɔngma amɛ.

Mlaa Nyɔngma a ji mlaahi nɛ a he hia saminya. Jã nɔuu nɛ mlaa kpa amɛ nɛ Mawu kɛ ha Israelbi ɔmɛ hu he hia. Mlaa a kake ji: ‘Suɔ Yehowa o Mawu ɔ kɛ o tsui tsuo, kɛ o juɛmi tsuo, kɛ o klaa tsuo, kɛ o he wami tsuo.’ Nɛ ekpa hu ji: ‘Suɔ o nyɛmi kaa bɔnɛ o suɔ mo nitsɛ o he.’ Mawu bi, nɛ ji Yesu Kristo de kaa mlaa enyɔ nɛ ɔmɛ ji mlaahi nɛ kle pe kulaa nɛ́ Yehowa kɛ ha e ma Israel. Pee se ɔ, wa maa kase níhi babauu ngɛ Mawu Bi ɔ kɛ e tsɔɔmi ɔmɛ a he.