Israel Bi Ɔmɛ Wo Yehowa Si

Benɛ Israel bi ɔmɛ je Ijipt ɔ, maa pee nyɔhiɔ enyɔ se loko a ya su Sinai Yoku ɔ he, nɛ a to si ngɛ lejɛ ɔ. Yehowa tsɛ Mose kɛ ya yoku ɔ nɔ nɛ e de lɛ ke: ‘I he Israel bi ɔmɛ a yi wami. Lɔ ɔ he ɔ, ke a bu mi tue nɛ a ye mlaahi nɛ ma wo mɛ ɔ nɔ ɔ, ma ngɔ mɛ kɛ pee imi nitsɛ ye ma nɛ ngɛ slɔɔto.’ Mose kple si kɛ je yoku ɔ nɔ, nɛ e ya de Israel bi ɔmɛ níhi nɛ Yehowa de lɛ ɔ tsuo. Mɛni Israel bi ɔmɛ de? A de ke: ‘Nɔ́ fɛɛ nɔ́ nɛ Yehowa ma de wɔ ke waa pee ɔ, wa maa pee.’

Mose ho yoku ɔ nɔ ya ekohu. Yehowa kɛ lɛ tu munyu ngɛ lejɛ ɔ ke: ‘Ligbi etɛ se ɔ, i kɛ nyɛ maa tu munyu. Moo wo Israel bi ɔmɛ si konɛ nɔ ko nɛ kó ba Sinai Yoku ɔ he.’ Mose kple si nɛ e ya de Israel bi ɔmɛ ke a dla a he konɛ Yehowa kɛ mɛ nɛ tu munyu.

Ligbi etɛ se ɔ, Israel bi ɔmɛ na bɔku yumu ko ngɛ yoku ɔ nɔ, kɛ oslabai hu nɛ ngɛ gbae. A nu kaa hiɔwe si wawɛɛ, nɛ bɛ ko hu ngɛ pɛe. Kɛkɛ nɛ Yehowa ba yoku ɔ nɔ ngɛ la mi. Israel bi ɔmɛ ye gbeye wawɛɛ, nɛ a he do blibliibli. Yoku ɔ mimiɛ wawɛɛ, nɛ la su ku ha yoku ɔ nɔ tsuo. Bɛ ɔ nɛ ngɛ pɛe ɔ nya bɔni wami wawɛɛ. Kɛkɛ nɛ Mawu de ke: ‘Imi ji Yehowa. Nyɛ ko ja mawu kpahi.’

Mose kpale kɛ ya yoku ɔ nɔ, nɛ Yehowa ngɔ mlaahi kɛ ha lɛ. Mlaa amɛ kɔɔ bɔ nɛ e sa kaa a ja Yehowa kɛ bɔ nɛ e sa kaa a ba a je mi ha a he. Mose ngma mlaa amɛ, nɛ e kane kɛ tsɔɔ Israel bi ɔmɛ. Israel bi ɔmɛ wo si ke: ‘Nɔ́ fɛɛ nɔ́ nɛ Yehowa de wɔ ke waa pee ɔ, wa maa pee.’ A wo Mawu si. Se anɛ a maa ye a si womi ɔ nɔ lo?