Yona Kɛ Lo Ngua Ko

HYƐ nyumu ɔ nɛ ngɛ nyu ɔ mi ɔ. E sɛ haomi mi, aloo pi ja? Lo ɔ yaa mi lɛ! Anɛ o le nɔ nɛ nyumu nɛ ɔ ji lo? E biɛ ji Yona. Ha nɛ waa hyɛ nɔ́ nɛ ha e ya sɛ haomi nɛ ɔ mi.

Yona ji Yehowa gbalɔ. Benɛ gbalɔ Elisha gbo ɔ, e kɛ we tsɔ nɛ Yehowa de Yona ke: ‘Yaa Nineve ma a mi. Mabi ɔmɛ ngɛ yayami pee wawɛɛ, nɛ i suɔ kaa o ya bɔ mɛ kɔkɔ.’

Se Yona sume kaa e maa ya. Lɔɔ he ɔ, e ya sɛ lɛ nɛ yaa he kpa kulaa mi. Yehowa bua jɔɛ he kaa Yona ngɛ fo tue. Lɔɔ he ɔ, e ha kɔɔhiɔ nɛ nya wa ko fia. Kɔɔhiɔ ɔ nya wami ɔ ha nɛ lɛ ɔ bɔni mumi. Lɛ hluili ɔmɛ a tsui po wawɛɛ, nɛ a kpa ngmlaa kɛ tsɛ a mawu ɔmɛ konɛ a ye bua mɛ.

Nyagbe ɔ, Yona de mɛ ke: ‘I jaa Yehowa, Mawu nɛ bɔ hiɔwe kɛ zugba a. Nɛ i ngɛ fo tue ngɛ nítsumi ko nɛ Yehowa ha mi ɔ nya.’ Lɔɔ heje ɔ, lɛ hluili ɔmɛ bi lɛ ke: ‘Mɛni waa pee mo konɛ kɔɔhiɔ ɔ nya nɛ ba si?’

Yona de mɛ ke: ‘Nyɛ sake mi kɛ fɔ wo ɔ mi, kɛkɛ wo ɔ he maa jɔ.’ Lɛ hluili ɔmɛ sume kaa a maa pee ja, se nyagbe ɔ, benɛ a na kaa kɔɔhiɔ ɔ nɛ ngɛ fiae ɔ nya ngɛ wae po pe kekle ɔ, a sake Yona kɛ fɔ wo ɔ mi. Amlɔ nɔuu nɛ kɔɔhiɔ ɔ nya ba si, nɛ wo ɔ he jɔ.

Yona mu kɛ ho nyu ɔ sisi ya, nɛ lo ngua a mi lɛ. Se e gbo we. Yona hi lo ɔ mi mi nyɔ kɛ pia ligbi etɛ. Yona pia e he kaa e bui Yehowa tue konɛ e ya Nineve. Lɔɔ he ɔ, o le nɔ́ nɛ e pee lo?

Yona sɔle kɛ ha Yehowa nɛ́ e ye bua lɛ. Kɛkɛ nɛ Yehowa ha lo ɔ ya vie lɛ kɛ pue wo ɔ nya. Lɔɔ se ɔ, Yona ya Nineve. Anɛ enɛ ɔ tsɔɔ we wɔ bɔnɛ e he hia ha kaa waa pee nɔ́ tsuaa nɔ́ nɛ Yehowa deɔ wɔ ɔ lo?