Nyɛɛ Kase Gbali Ɔmɛ A Nɔ Hyɛmi Nɔ́ ɔ—Yona
1. Mɛni su kpakpahi nɛ Yona je kpo?
1 Mɛni baa o juɛmi mi ke o susu gbalɔ Yona he? Ni komɛ maa na lɛ kaa e fɔ̃ɔ aloo e yi mi wa. Se kɛ̃ ɔ, e je he si bami, kã, kɛ he kɛ afɔle sami su kpo. Mɛni blɔ nɔ wa maa gu kɛ “kase” Yona su kpakpa amɛ?—Yak. 5:10.
2. Mɛni blɔ nɔ wa ma nyɛ maa gu kɛ kase Yona he si bami ɔ ngɛ?
2 He Si Bami: Ngɛ sisije ɔ, Yona tu fo kɛ je nítsumi nɛ a kɛ wo e dɛ ɔ he kɛ ho he kpa ya. Enɛ ɔ be nyakpɛ ejakaa, Asiriabi ɔmɛ a yi mi wa wawɛɛ, nɛ a tsɛɛ Nineve ma a ke “ma nɛ a pueɔ muɔ si ngɛ mi.” (Nah. 3:1-3) Se kɛ̃ ɔ, Yehowa tsɔse Yona nɛ benɛ E tsɔ lɛ si enyɔne ɔ, Yona je he si bami kpo nɛ e ya. (Abɛ 24:32; Yona 3:1-3) E ngɛ mi kaa sisije ɔ e tu fo mohu lɛɛ, se e pee Yehowa suɔmi nya ní. (Mat. 21:28-31) Anɛ wɔ hu wa mwɔ wa yi mi kpɔ kaa wa maa fiɛɛ sane kpakpa a ke a tsɔse wɔ loo nihi bui munyu ɔ tue ngɛ wa zugba kpɔ ɔ mi lo?
3. Mɛni be nɛ wa hia kã kɛ he kɛ afɔle sami ngɛ wa fiɛɛmi nítsumi ɔ mi?
3 Kã Kɛ He Kɛ Afɔle Sami: Benɛ Yona yɔse kaa juɛmi yaya nɛ e pee ɔ ngɔ ni kpahi ngɛ lɛ ɔ mi ɔ a wami kɛ wo osla mi ɔ, e suɔ kaa e kɛ e wami maa sa afɔle. (Yona 1:3, 4, 12) Pee se benɛ e yaa tsu nítsumi nɛ a kɛ ha lɛ ɔ ngɛ Nineve ɔ, e nyɛɛ kɛ ya ma a kpɛti, eko ɔ, e ngɛ he nɛ sa hlae nɛ e maa fiɛɛ Yehowa kojomi ɔ ngɛ. Nɔ́ nɛ e pee ɔ tsɔɔ kaa pi fɔ̃tsɛ ji lɛ, mohu e ji Mawu gbalɔ nɛ e ngɛ kã! (Yona 3:3,4) Nɛ mwɔnɛ ɔ, wɔ hu nɛɛ? Wa hia Mawu kã womi konɛ wa nyɛ nɛ waa ye odase ke waa kɛ si temi kɛ womi kpe. (Níts. 4:29, 31) Jã wa ná he kɛ afɔle sami su loko wa ma nyɛ maa ngɔ wa be kɛ níhi nɛ wa ngɛ ɔ kɛ tsu fiɛɛmi nítsumi ɔ.—Níts. 20:24.
4. Mɛni heje nɛ e sa kaa waa ngɔ be kɛ susu nɔ hyɛmi nɔ́ kpakpa nɛ Yehowa gbali ɔmɛ pee ɔ a he ɔ?
4 Be tsuaa be nɛ o maa kane Yehowa gbali ɔmɛ eko he ní ɔ, o ma ná he se ke o po o he foni kaa o ngɛ a si fɔfɔɛ ɔmɛ a mi. Mo bi o he ke: ‘Kɛ I ko pee ye ní ha kɛɛ? Mɛni blɔ nɔ ma gu kɛ kase e su kpakpa amɛ ngɛ ye si himi mi?’ (Heb. 6:11, 12) Munyuhi nɛ a maa ngma ngɛ Wa Matsɛ Yemi Sɔmɔmi ɔ mi hwɔɔ se ɔ maa tsɔɔ ní kpakpahi nɛ wa ma nyɛ maa kase ngɛ gbali kpahi nɛ a ye Yehowa anɔkuale ɔmɛ a he.