Israel Nyagbe Matsɛ Kpakpa

YOSIA ye jeha kpaanyɔ pɛ nɛ a wo lɛ matsɛ ngɛ Israel woyi je wɛtso enyɔ ɔ nya. E wɛ kulaa kɛ ha matsɛ yemi. Lɔɔ he ɔ, sisije ɔ nikɔtɔmahi komɛ ye bua lɛ kɛ ye ma a nɔ.

Benɛ Yosia ye matsɛ jeha kpaago ɔ, e bɔni Yehowa se blɔ hlami. E nyɛɛ matsɛmɛ kpakpahi kaa David, Yehoshafat, kɛ Hezekia nɔhyɛ nɔ́ ɔ se. Nɛ benɛ e yi jeha nyingmi enyɔ lolo po ɔ, e pee nɔ́ ko nɛ́ biɔ kã peemi.

Israelbi ɔmɛ babauu pee ní yayamihi be kɛkɛɛ. A ja wɔhi. Nɛ a kpla si ha amagahi. Lɔɔ he ɔ, Yosia kɛ e webi ɔmɛ sɛ ma a mi nɛ a ya puɛ lakpa jami he ní ɔmɛ tsuo. Nítsumi nɛ ɔ he wa nitsɛ ejakaa wɔ jali ɔmɛ hiɛ. Hyɛ Yosia kɛ e webi ɔmɛ ngɛ foni ɔ mi nɛ a ngɛ amaga amɛ kue pue si.

Pee se ɔ, Yosia hla nyumuhi etɛ konɛ a hyɛ nɛ a dla Yehowa sɔlemi we ɔ. Mabi ɔmɛ tsu sika kɛ ha mɛ konɛ a kɛ wo nítsumi ɔ he hiɔ. Ligbi ko nɛ́ a ngɛ ní ɔ tsue ngɛ sɔlemi we ɔ, Osɔfo nɔkɔtɔma Hilkia na nɔ́ ko nɛ he hia wawɛɛ. Lɔɔ ji mlaa womi nɛ́ Yehowa ha Mose ngma fɔ si blema lokoo ɔ. E laa jeha babauu.

A ngɔ womi ɔ ya ha Yosia, nɛ e ha a kane ha lɛ. Benɛ Yosia ngɛ womi ɔ kanemi ɔ tue bue ɔ, e na kaa mabi ɔmɛ yi Yehowa mlaa nɔ kulaa. E dɔ lɛ wawɛɛ, nɛ enɛ ɔ ha e gba e tade ngɛ e he, kaa bɔnɛ o na ngɛ foni ɔ mi ɔ. E de ke: ‘Yehowa mi mi fu wɔ, ejakaa wa tsɛmɛ ɔmɛ yi mlaa nɛ́ a ngma ngɛ womi nɛ ɔ mi ɔ nɔ.’

Enɛ ɔ he ɔ, Yosia fã osɔfo nɔkɔtɔma Hilkia kaa e ya bi nɔ́ nɛ Yehowa maa pee mɛ. Hilkia ya gbalɔyo Hulda ngɔ, nɛ e ya bi lɛ nɔ́ nɛ maa ba. Sɛgbi nɛ je Yehowa ngɔ nɛ gbalɔyo ɔ kɛ ha Hilkia kaa e ya de Yosia ji: ‘A maa gbla Yerusalem kɛ mabi ɔmɛ tsuo tue, ejakaa a ja wɔhi nɛ a ha ma a mi hyi tɔ kɛ yayami peemi. Se mo Yosia, akɛnɛ o pee nɔ́ nɛ da heje ɔ, tue gblami nɛ ɔ maa ba ngɛ o gbenɔ se.’