NÍ KASEMI 8
Yosia Kɛ Huɛmɛ Kpakpahi Bɔ
O susu kaa e he wa kaa o maa pee nɔ́ nɛ da lo?— Nihi fuu susuɔ jã. Baiblo ɔ de wɔ kaa e he wa ha jokuɛ ko nɛ a tsɛɛ lɛ Yosia kaa e maa pee nɔ́ nɛ da. Se e kɛ huɛmɛ kpakpahi bɔ nɛ a ye bua lɛ. Ha nɛ waa kase Yosia kɛ e huɛmɛ ɔmɛ a he ní.
A tsɛɛ Yosia papaa ke Amon, nɛ e ye matsɛ ngɛ Yuda. Amon ji nɔmlɔ yaya, nɛ e ja amagahi. Benɛ Yosia papaa gbo ɔ, Yosia ba pee Yuda matsɛ. Se, e ye jeha kpaanyɔ pɛ! O susu kaa e pee ní yayamihi kaa e papaa a lo?— Dɛbi, e pee we jã!
Zefania bɔ ni ɔmɛ kɔkɔ kaa a ko ja amagahi
Benɛ Yosia ji jokuɛyo po ɔ, e suɔ kaa e maa bu Yehowa tue. Enɛ ɔ he ɔ, nihi nɛ a suɔ Yehowa pɛ nɛ e kɛ pee e huɛmɛ. Nɛ a ye bua lɛ nɛ e pee nɔ́ nɛ da. Mɛnɔmɛ ji e huɛmɛ ɔmɛ a kpɛti ni komɛ?
E huɛmɛ ɔmɛ a ti nɔ kake ji Zefania. Zefania ji gbalɔ, nɛ e bɔ Yudabi ɔmɛ kɔkɔ kaa ke a ja amagahi ɔ, haomihi maa ba a nɔ. Yosia bu Zefania tue nɛ e ja Yehowa, se pi amagahi.
Yosia huɛmɛ ɔmɛ a kpɛti nɔ kake hu ji Yeremia. E ji Yosia juami bi, nɛ a hi he kake ngɛ a jokuɛwi a si. A ji huɛmɛ nɛ a suɔ a sibi wawɛɛ, nɛ lɔɔ heje benɛ Yosia gbo ɔ, Yeremia po la kɛ tsɔɔ bɔnɛ e hɛ ngɛ jae ngɛ Yosia he ha. Yeremia kɛ Yosia ye bua a sibi nɛ a pee nɔ́ nɛ da, nɛ a bu Yehowa tue.
Yosia kɛ Yeremia ye bua a sibi nɛ a pee nɔ́ nɛ da
Mɛni o ma nyɛ maa kase ngɛ nɔ hyɛmi nɔ́ nɛ Yosia pee ɔ mi?— Be mi nɛ Yosia ji jokuɛyo ɔ, e suɔ kaa e maa pee nɔ́ nɛ da. E le kaa e sa nɛ e kɛ nihi nɛ a suɔ Yehowa a pɛ nɛ pee huɛ. Moo hyɛ nɛ hi konɛ o hla huɛmɛ nɛ a suɔ Yehowa nɛ a ye bua mo konɛ o pee nɔ́ nɛ da!