Bɔfo Ko Ba Slaa Maria

YO KƐ e he fɛu nɛ ɔ ji Maria. E ji Israelyo, nɛ e hi Nazaret ma a mi. Mawu le kaa nɔmlɔ kpakpa ji lɛ. Lɔɔ he ɔ, e tsɔ e bɔfo Gabriel kɛ ba e ngɔ nɛ e kɛ lɛ ba tu munyu. O le nɔ́ nɛ Gabriel de Maria lo? Ha nɛ waa hyɛ.

Gabriel de lɛ ke: ‘He manye, mo nɔmlɔ nɛ o hɛ mi ba nyami. Yehowa kɛ mo ngɛ.’ Maria nɛ́ nyumu nɛ ɔ hyɛ. Lɔɔ he ɔ, e hao, ejakaa e nui nɔ́ nɛ e de ɔ sisi. Se amlɔ nɔuu nɛ Gabriel jɔɔ e tsui he.

E de lɛ ke: ‘Maria, koo ye gbeye. Yehowa bua jɔ o he saminya. Lɔɔ heje ɔ, e maa pee nyakpɛ nɔ́ ko ha mo. E be kɛe nɛ o ma fɔ binyumu. Nɛ ó wo lɛ biɛ ke Yesu.’

Gabriel ya nɔ nɛ e tsɔɔ nya ke: ‘Bi nɛ o ma fɔ ɔ maa pee nɔmlɔ nguaa, nɛ a ma tsɛ lɛ Hiɔwe Lokoo Mawu ɔ Bi. Yehowa maa wo lɛ matsɛ kaa David. Se Yesu lɛɛ e maa ye matsɛ kɛ ya neneene, nɛ e matsɛ yemi ɔ se be poe gblegbleegble!’

Maria bi lɛ ke: ‘Kɛ enɛ ɔ ma plɛ kɛ ba mi kɛɛ? Ejakaa i sɛ we gba si himi mi. Nɛ i li nyumu hulɔ, lɔɔ he ɔ, kɛ ma plɛ kɛ fɔ bi kɛɛ?’

Gabriel ha lɛ heto ke: ‘Mawu he wami ɔ ma ba ha o nɔ. Lɔɔ heje ɔ, a ma tsɛ bi nɛ o ma fɔ ɔ ke Mawu Bi.’ Gabriel ya nɔ nɛ e de Maria ke: ‘Mo kai o wekuno Elizabet. Nihi de ke e bwɔ pe bɔnɛ e ma nyɛ ma fɔ bi. Se amlɔ nɛ ɔ, e be kɛe nɛ e ma fɔ binyumu. Enɛ ɔ tsɔɔ kaa nɔ́ ko nɔ́ ko be nɛ Mawu be nyɛe maa pee.’

Amlɔ nɔuu nɛ Maria de ke: ‘Yehowa mawa ji mi! E ba mi kaa bɔnɛ o de ɔ.’ Kɛkɛ nɛ bɔfo ɔ je.

Maria ye esɔ kɛ ya Elizabet ngɔ. Benɛ Elizabet nu Maria ngami ɔ, bimwɔyo ɔ tu kɛ bua jɔmi ngɛ e mi mi. Kɛkɛ nɛ Mawu mumi ɔ ba Elizabet nɔ, nɛ e de Maria ke: ‘A jɔɔ mo ngɛ yihi a kpɛti.’ Maria hi Elizabet ngɔ nyɔhiɔ etɛ, nɛ lɔɔ se ɔ, e kpale e se kɛ ho we mi ya ngɛ Nazaret.

Jinɛ nyumu ko nɛ a tsɛɛ lɛ Yosef yaa ngɔ Maria. Se benɛ Yosef na kaa Maria ngɔ hɔ ɔ, e pee e juɛmi kaa e be lɛ ngɔe hu. Kɛkɛ nɛ Mawu bɔfo ba de lɛ ke: ‘Koo ye gbeye kaa o maa ngɔ Maria kɛ pee o yo. Ejakaa Mawu ji nɔ nɛ ha lɛ bi ɔ nɛ.’ Lɔɔ he ɔ, Maria kɛ Yosef sɛ gba si himi mi, nɛ a mlɛ kɛ ya su benɛ a fɔ Yesu.