Mawu Ngɛ Mo Nine Fɔe Kaa O Ba Pee E Huɛ

Mawu suɔ kaa o pee e huɛ. Anɛ o susu he hyɛ kaa o ma nyɛ maa pee Nɔ nɛ kle pe nɔ fɛɛ nɔ ngɛ je ɔ mi tsuo ɔ huɛ lo? A tsɛɛ Abraham nɛ hi si blema a ke Mawu huɛ. (Yakobo 2:23) A tu ni kpahi hu a he munyu ngɛ Baiblo ɔ mi kaa a kɛ Mawu bɔ huɛ nɛ e jɔɔ mɛ babauu. Mwɔnɛ ɔ, nimli nɛ je zugba a nɔ he slɔɔtohi ba pee Mawu huɛmɛ. Mo hu o ma nyɛ maa pee Mawu huɛ.

Mawu huɛ nɛ o maa pee ɔ hi pe adesa ko huɛ nɛ o maa pee. Mawu ji e huɛmɛ anɔkuafohi a se gblegbleegble. (La 18:25) Mawu huɛ nɛ o maa pee hi pe ní nɛ o ma ná. Ke níatsɛ ko gbo ɔ, e sika a ya jee ni kpahi a dɛ mi. Se nihi nɛ a kɛ Mawu bɔ huɛ ɔ ngɛ nɔ́ ko nɛ he jua wa nɛ nɔ ko nɔ ko be nyɛe maa ngɔ ngɛ a dɛ.—Mateo 6:19

Ni komɛ maa bɔ mɔde kaa a ma ha o kpa Mawu he ní kasemi. O huɛmɛ kɛ o wekuli komɛ po ma nyɛ maa pee ja. (Mateo 10:36, 37) Ke ni kpahi ngɛ mo muɔe aloo a ngɛ o he gbeye woe ɔ, bi o he ke, ‘Mawu kɛ adesa, mɛnɔ hɛ mi i suɔ kaa ma sa?’ Mo susu enɛ ɔ he nɛ o hyɛ: Ke nɔ ko de mo ke o kpa ní yemi ɔ, anɛ o maa bu lɛ tue lo? O be ja pee kɔkɔɔkɔ! E sa kaa o ye ní bɔnɛ pee nɛ o hi wami mi. Se Mawu ma nyɛ ma ha nɛ o hi si kɛ ya neneene! Lɔɔ he ɔ, ko ha nɛ nɔ ko nɔ ko nɛ tsi o nya ngɛ bɔnɛ o maa pee Mawu huɛ he ní nɛ o ngɛ kasee ɔ he.—Yohane 17:3.