Anɛ O Suɔ nɛ́ O Le Baiblo ɔ Mi Sanehi Babauu Lo?

Mɛni Heje E Sa nɛ O Kane Baiblo Ɔ?

E SLO Baiblo ɔ ngɛ́ womi kpahi a he, ejakaa e hɛɛ blɔ tsɔɔmihi nɛ́ suɔmi ngɛ mi nɛ́ je Mawu ngɔ. (1 Tesalonikabi 2:13) Ke o ngɔ Baiblo ɔ mi tsɔɔmi ɔmɛ kɛ tsu ní ɔ, o ma ná he se babauu. E ma ha nɛ suɔmi nɛ́ o ngɛ kɛ ha Mawu, nɔ nɛ ji “nike ní kpakpa kɛ níhi nɛ́ hi kɛ pi si” Halɔ ɔ mi maa wa, nɛ o maa hɛ kɛ su e he. (Yakobo 1:17) O maa le bɔnɛ o maa ya e hɛ mi ngɛ sɔlemi mi ha. Ngɛ haomi behi a mi ɔ, o ma nyɛ ma ná yemi kɛ buami kɛ je Mawu dɛ. Ke o hi si ngɛ Baiblo ɔ tɛhi nɛ́ a po ɔmɛ a nya a, Mawu ma ha mo neneene wami.—Romabi 6:23.

Baiblo ɔ hɛɛ anɔkualehi nɛ́ haa nɔ nuɔ níhi a sisi. Nihi nɛ ná Baiblo mi níle ɔ ye a he kɛ je susumihi nɛ́ dɛ nɛ náa nimli ayɔhi abɔ a si himi nɔ he wami ɔ he. Kaa nɔhyɛ nɔ́ ɔ, anɔkuale nɛ́ kɔ gbenɔ he nɛ́ wa maa le be hae nɛ́ waa ye gbeye kaa gbogboehi maa ye wɔ awi aloo kaa wa wekuli kɛ wa huɛmɛ nɛ́ gbo ɔ ngɛ piie. (Ezekiel 18:4) Baiblo tsɔɔmi nɛ́ kɔ gbogboehi a si tlemi he ɔ jɔɔ nihi nɛ a suɔli gbo ɔ a bua. (Yohane 11:25) Anɔkuale nɛ́ wa maa le kɛ kɔ bɔfo yayami ɔmɛ a he ɔ ma ha wa hɛ nɛ́ hi wa he nɔ ngɛ oslahi nɛ ngɛ mumihi a tsɛmi he ɔ he, nɛ e ma ha waa nu nɔ́ heje nɛ́ haomihi fuu ngɛ zugba a nɔ ɔ hu sisi.

Mawu jami he sisito mlaahi nɛ́ ngɛ Baiblo ɔ mi ɔ, tsɔɔ wɔ bɔnɛ e sa nɛ waa ba wa jemi ha, konɛ wa ná he se ngɛ nɔmlɔtso mi. Nɔhyɛ nɔ́ ji kaa, ke wa “ngmɛ pɛpɛɛpɛ ngɛ wa ní peepeehi” a mi ɔ, wa ma ná nɔmlɔtso mi he wami kpakpa. (1 Timoteo 3:2, NW) Nɛ ke wa ‘ha wa he tsɔ ngɛ helo kɛ mumi mi ɔ,’ wa nɔmlɔtso mi he wami nami maa pee gbugbuugbu. (2 Korintobi 7:1) Ga womi nɛ́ Mawu kɛ ha ngɛ Baiblo ɔ mi nɛ́ wa kɛ ma tsu ní ɔ, ma ha wa ná bua jɔmi ngɛ wa gba si himi mi, nɛ e ma ha wa ná bumi ha wa he.—1 Korintobi 6:18.

Ke o ngɔ Mawu Munyu ɔ kɛ tsu ní ɔ, o maa pee nɔ nɛ ngɛ bua jɔmi nitsɛ. Baiblo mi níle yeɔ bua wɔ konɛ wa ná tue mi jɔmi, kɛ tsui nɛ́ nɔɔ nɔ mi, kɛ hɛ nɔ kami. Jehanɛ se, e haa wa náa su kpakpahi kaa mɔbɔ nami, suɔmi, bua jɔmi, he jɔmi, mi himi kɛ hemi kɛ yemi. (Galatabi 5:22, 23; Efesobi 4:24, 32) Su nɛ ɔmɛ haa wa peeɔ hunomɛ aloo yigbayi kpakpahi, tsɛmɛ aloo nyɛmɛ kpakpahi, kɛ binyumuhi aloo biyihi kpakpahi.

Anɛ o susu hwɔɔ se he hyɛ lo? Baiblo gbamihi ha wa le be nɛ wa ngɛ mi amlɔ nɛ ɔ. Pi bɔnɛ je ɔ si fɔfɔɛ ngɛ ha amlɔ nɛ ɔ kɛkɛ nɛ gbami ɔmɛ ha wa le, se mohu wa le hu kaa e be kɛe nɛ Mawu ma tsake zugba a kɛ pee paradeiso.—Kpojemi 21:3, 4.

Yemi kɛ Buami kɛ ha Baiblo ɔ Sisi Numi

Eko ɔ, o bɔ mɔde kaa o maa kane Baiblo ɔ, se o nui sisi. Eko ɔ, o li he nɛ o maa hyɛ ngɛ Baiblo ɔ mi konɛ o na o sane bimi ɔmɛ a heto ɔmɛ. Ke jã ji sane ɔ, pi mo nɔ kake too nɛ o kɛ nyagba nɛ ɔ kpe. Yemi kɛ buami he hia wɔ tsuo kɛ ha Mawu Munyu ɔ sisi numi. Yehowa Odasefoli nɛ ngɛ zugbahi nɛ nya su 235 nɔ, ngɔɔ Baiblo mi tsɔsemi kɛ haa nihi akpehi abɔ yaka. A bua maa jɔ he kaa a maa ye bua mo hulɔ.

Behi fuu ɔ, e hi kaa o maa ngɔ Baiblo sisije tsɔɔmi ɔmɛ kɛ je Baiblo ɔ kasemi sisi bɔɔbɔɔ. (Hebribi 6:1) Benɛ o ní kasemi ɔ ngɛ hɛ mi yae ɔ, o ma bɔni “niye ní nitsɛ” yemi, nɛ tsɔɔ kaa o ma ba nu anɔkualehi nɛ́ a mi kuɔ ɔmɛ a sisi. (Hebribi 5:14) Baiblo ɔ ji nɔ dami nɔ́ nɛ́ atsinyɛ jemi ko be he. Baiblo kasemi womihi, nɛ eko ji Mini Mawu Ngɛ Hlae ngɛ Wa Dɛ? ɔ, maa ye bua mo konɛ o nu Ngmamihi nɛ́ kɔɔ sane slɔɔtohi a he ɔ sisi.

Anɛ O Suɔ kaa O Ngɔ Be Daa Otsi kɛ Kase Baiblo ɔ Konɛ O Nu Sisi Lo?

A ma nyɛ kɛ mo maa pee Baiblo mi ní kasemi ngɛ be nɛ hi ha mo ɔ mi, kɛ he nɛ o suɔ nɛ́ a pee ngɛ. A kɛ nihi fuu peeɔ ngɛ mɛ nitsɛmɛ a wehi a mi. A kɛ ni komɛ po peeɔ ní kasemi ɔ ngɛ tɛlifoo nɔ. Ní kasemi blɔ nya tomi nɛ ɔ be kaa sukuu tsu mi ní kasemi, mohu ɔ, e ji blɔ nya tomi nɛ́ kɛ nɔ nitsɛ si himi kɛ e womi mi lemi kɔɔ. A pee we kami, nɛ a be o hɛ mi si hu puee. A ma ha o sane bimihi nɛ́ je Baiblo ɔ mi ɔ heto, nɛ o maa kase bɔnɛ o maa pee ha konɛ o hɛ kɛ su Mawu he.

O be Baiblo mi ní kasemi kaa kikɛ nɛ ɔ he hiɔ woe. (Mateo 10:8) A kɛ nihi ngɛ́ jami tsuaa jami mi kɛ nihi nɛ be jami ko mi, se a bua jɔ he wawɛɛ kaa a ma na Mawu Munyu ɔ mi níle babauu ɔ, peeɔ ní kasemi nɛ́ a he we nɔ́ ko.

Mɛnɔmɛ ma nyɛ maa piɛɛ ní kasemi ɔ he? O weku ɔ mi bi ɔmɛ tsuo. O huɛ saisaa nɛ́ o suɔ kaa o fɔ lɛ nine ɔ hu ma nyɛ ma piɛɛ he. Nɛ ke o suɔ kaa á kɛ mo nɔ kake pɛ nɛ́ kase hu a maa pee lɛ ja.

Nihi fuu ngɔɔ ngmlɛfia kake daa otsi kɛ kaseɔ Baiblo ɔ. Ke be fuu nɛ o ma nyɛ ma ná ngɛ otsi ɔ mi jio, be bɔɔ ko o ma ná jio ɔ, Odasefoli ɔmɛ maa ngɔ a he kɛ ha konɛ a ye bua mo.

A Ngɛ Mo He Wami Woe konɛ O Kase Ní

Wa ngɛ mo he wami woe konɛ o hla Yehowa Odasefoli a se blɔ. Blɔ kake nɛ́ o maa gu nɔ kɛ pee enɛ ɔ ji kaa o maa ngɔ adrɛs nɛ́ sa ngɛ sisi ɔ kɛ ngma womi ya ha mɛ. Kɛkɛ ɔ, a maa to blɔ nya konɛ nɔ ko kɛ mo nɛ́ ba kase ní.

□ Nyɛɛ ngɔ Mini Mawu Ngɛ Hlae ngɛ Wa Dɛ? womi ɔ eko kɛ mane mi.

□ I kpa nyɛ pɛɛ konɛ nyɛɛ kɛ mi ba pee we mi Baiblo mi ní kasemi nɛ́ a he we nɔ́ ko.

Ngmamihi nɛ a tsɛ ɔmɛ je Dangme Ngmami Klɔuklɔu Ɔ mi. He nɛ NW tsa Ngmami ko nɔ ngɛ ɔ, sisi tsɔɔmi ɔ je New World Translation of the Holy Scriptures​—With References ɔ mi.