Kɛ O Buu Baiblo ɔ Ha Kɛɛ?

NƆ́ NƐ BAIBLO Ɔ DE

“Ngmami tsuaa ngmami ɔ, Mawu mumi ɔ lɛ ha nɛ nihi ngma.”—2 Timoteo 3:16, Ngmami Klɔuklɔu ɔ.

BƆNƐ O MA NÁ HE SE HA

E haa sanehi nɛ haoɔ wɔ ngɛ wa si himi mi ɔ a heto nɛ wa tsui nɔɔ wa mi.​—Abɛ 2:1-5.

E kudɔɔ wɔ ngɛ níhi nɛ wa peeɔ daa ligbi ɔ a mi.​—La 119:105.

E haa nihi náa hɛ kɛ nɔ fɔmi nitsɛ.​—Romabi 15:4.

ANƐ WA MA NYƐ MA HE NƆ́ NƐ BAIBLO Ɔ DEƆ MAA YE NIINƐ LO?

Ee, ke e hí kulaa a, ngɛ yi mi tomi etɛ a heje:

• E mi munyu ɔmɛ kɛ a he kɔ. Nimli slɔɔtoslɔɔtohi maa pee 40 ngɔ jeha nɛ hiɛ pe 1,600 kɛ ngma Baiblo ɔ. A kpɛti nihi fuu nɛ a sibi hyɛ. Se kɛ̃ ɔ, munyuhi nɛ ngɛ Baiblo mluku ɔ mi ɔ kɛ a he kɔ, nɛ Baiblo mluku ɔ tsuo hɛɛ munyuyi kake!

• E mi yinɔ sanehi da. Behi fuu ɔ, yinɔ sane ngmali ngmɛ́ a mahi a nɔ kunimi nɛ nihi ye ɔ kɛ fɔɛ si. Se nihi nɛ a ngma Baiblo ɔ lɛɛ, a laa we mɛ nitsɛmɛ a tɔmihi aloo a mahi a nɔ kunimi nɛ nihi ye ɔ nɔ.​—2 Kronika 36:15, 16; La 51:1-4.

• E mi gbamihi baa mi. Baiblo ɔ sɛ hlami gba kɛ fɔ si kaa a ma kpata blema Babilon ma a hɛ mi. E gba gbami nɛ ɔ maa pee jeha 200 loko a kpata Babilon hɛ mi. (Yesaya 13:17-22) Baiblo ɔ tsɔɔ bɔnɛ a ma plɛ kɛ kpata Babilon ma a hɛ mi ha, kɛ nɔ nɛ ma kpata ma a hɛ mi!​—Yesaya 45:1-3.

  Baiblo gbami kpahi fuu hu ba mi pɛpɛɛpɛ. Anɛ e sɛ nɛ waa hyɛ blɔ kaa gbamihi nɛ ngɛ Mawu Munyu ɔ mi ɔ maa ba mi lo?​—2 Petro 1:21.