Yesu Bu Tue Be Tsuaa Be

Anɛ e he wa kaa be komɛ ɔ, o maa bu o fɔli tue lo?— E he wa be komɛ. O le kaa Yesu bu Yehowa kɛ e fɔli tue lo?— Bɔnɛ Yesu pee e ní ha a maa ye bua mo konɛ o bu o fɔli tue ke e he wa kaa o maa pee jã a po. Mo ha nɛ waa kase enɛ ɔ he ní.

Loko Yesu ba zugba a nɔ ɔ, e kɛ e Tsɛ Yehowa lɛ ngɛ hiɔwe. Se Yesu ngɛ fɔli hulɔ ngɛ zugba a nɔ. A tsɛ mɛ ke Yosef kɛ Maria. O le bɔnɛ pee nɛ a ba pee Yesu fɔli lo?—

Yehowa je Yesu wami kɛ je hiɔwe nɛ e kɛ ba wo Maria mi mi konɛ a fɔ Yesu nɛ e ba hi zugba a nɔ. E ji nyakpɛ ní. Yesu wa ngɛ Maria mi mi kaa bɔnɛ bimwɔwi waa ngɛ a nyɛmɛ a mi mi ɔ. Maa pee nyɔhiɔ nɛɛ se ɔ, a fɔ Yesu. Enɛ ɔ lɛ ha nɛ Maria kɛ e huno Yosef ba plɛ Yesu fɔli ɔ nɛ.

Benɛ Yesu ye jeha 12 ɔ, e pee nɔ́ ko nɛ tsɔɔ kaa e suɔ e Tsɛ, Yehowa saminya. Ní nɛ ɔ ya nɔ benɛ Yesu kɛ e fɔli hia blɔ gagaa kɛ ya Yerusalem konɛ a ya ye Hetsɔmi gbijlɔ ɔ. Benɛ a kpale a se kɛ ma we mi ɔ, Yosef kɛ Maria nɛ́ Yesu. O le he nɛ Yesu ho lo?—

Yosef kɛ Maria kpale a se ekohu kɛ ho Yerusalem ya nɛ a ya hla Yesu ngɛ he tsuaa he kaa a maa na lɛ lo. A hao saminya ejakaa a nɛ lɛ. Se ligbi etɛ se ɔ, a na lɛ ngɛ sɔlemi we ɔ! O le nɔ́ heje nɛ Yesu ngɛ sɔlemi we ɔ lo?— Ejakaa lejɛ ɔ ji he nɛ e ma nyɛ maa kase e Tsɛ, Yehowa a he ní ngɛ. E suɔ Yehowa nɛ e suɔ kaa e maa pee e suɔmi nya ní. Benɛ Yesu wa nɛ e pee nɔkɔtɔma po ɔ, e buɔ Yehowa tue be tsuaa be. Yesu peeɔ tue bumi ke e he wa ha lɛ nɛ e maa na nɔ́ po. Anɛ Yesu bu Yosef kɛ Maria hu tue lo?— Ee, Baiblo ɔ de kaa e pee jã.

Mɛni o ma nyɛ maa kase ngɛ Yesu nɔ hyɛmi nɔ́ ɔ mi?— E sa kaa o bu o fɔli tue ke e he wa ha mo kaa o maa pee jã po. O suɔ nɛ o maa pee jã lo?—