Yo Ko Ta Yesu Tade He, Nɛ E Ná Tsami

Yuda bi nɛ a ngɛ Galilea Wo ɔ beleku je ɔ nu kaa Yesu je Dekapoli kɛ ba. Eko ɔ, nihi fuu nu he kaa Yesu nga kɔɔhiɔ kɛ wo ɔ yi nɛ a ngmɛ dii, nɛ ni komɛ hu nu kaa e tsa nyumu komɛ nɛ mumi yayamihi ngɛ a mi. Enɛ ɔ he ɔ, “nihi babauu” ba bua a he nya ngɛ Kapernaum wo ɔ nya nɛ a ngɛ lɛ mlɛe. (Marko 5:21) Benɛ Yesu kple si ngɛ lɛ ɔ mi ɔ, ni ɔmɛ a bua jɔ wawɛɛ ejakaa a ngɛ blɔ hyɛe kaa a maa na lɛ.

Kapernaum kpe he ɔ nɔkɔtɔma nɛ a tsɛɛ lɛ Yairo ɔ hu ngɛ Yesu hlae. Benɛ e na Yesu ɔ, e kpla si ngɛ Yesu nane nya nɛ e kpa lɛ pɛɛ ke: ‘Ye biyo wayoo miɔ nɛ e ma gbo. Ba nɛ o kɛ o nine ba pue e nɔ, konɛ e ná he wami, nɛ e yi nɛ ná wami.’ (Marko 5:23) Mɛni Yesu maa pee ngɛ sane nɛ ɔ he? Yairo biyo kake pɛ nɛ e ye jeha 12 lɛ be he wami ɔ nɛ.​​—Luka 8:42.

Benɛ Yesu yaa Yairo we ɔ mi ɔ, e kɛ si fɔfɔɛ kpa ko nɛ ngɛ mɔbɔ ya kpe. Nihi fuu kɛ bua jɔmi nyɛɛ Yesu se ejakaa a ngɛ hlae nɛ a maa na nyakpɛ ní nɛ Yesu maa pee ɔ. Se yo ko ngɛ ni ɔmɛ a kpɛti nɛ e ngɛ hlae nɛ a tsa lɛ.

Muɔ ngɛ bee ngɛ yo nɛ ɔ he jeha 12 sɔuu. E kpa tsopatsɛmɛ a nɔ hluu nɛ e sika tsuo ta e dɛ. Se hiɔ ɔ jɔɛ, nɛ e ‘ngɛ nɔ puee mohu.’​​—Marko 5:26.

E ngɛ heii kaa hiɔ ɔ yeɔ lɛ, nɛ e pueɔ e hɛ mi si, nɛ e hii lɛ zo pee. Yihi pɔɛ hiɔhi kaa kikɛ he munyu tumi ngɛ gua mi. Nɛ ngɛ lɔ ɔ se hu ɔ, Mose Mlaa a tsɔɔ kaa ke muɔ ngɛ bee ngɛ yo ko he ɔ, e he tsɔ we. E biɔ nɛ nɔ tsuaa nɔ nɛ maa ta e he, loo e bohi nɛ muɔ sɛ mi ɔ he ɔ nɛ e fɔ e tadehi a he nɛ e du e he. Lɔ ɔ se ɔ, jã du bu loko e he ma tsɔ.​​—3 Mose 15:25-27.

Yo ɔ “nu Yesu he sane,” nɛ e ngɛ lɛ hlae. Akɛnɛ e he tsɔ we he je ɔ, e gu ni ɔmɛ a kpɛti blɛuu nɛ e ya ta Yesu tade ɔ he. E de ngɛ e yi mi ke: “Ke i ná ta e tade ɔ he kɛkɛ ɔ, ma ná he wami.” Benɛ e pɛtɛ Yesu tade ɔ he ɔ, nɔuu nɛ e nu he kaa muɔ ɔ kpa bemi ngɛ e he! “E nu he ngɛ e nɔmlɔ tso ɔ mi kaa a tsa lɛ.”​​—Marko 5:27-29.

Yesu bi si ke: “Mɛnɔ lɛ ta ye he ɔ?” Kɛ o susu kaa yo ɔ maa nu he ha kɛɛ benɛ e nu nɛ Yesu de jã a? Petro de Yesu ke: “Nyɔmtsɛ, nihi babauu nitsɛnitsɛ lɛ bɔle mo kɛ kpe nɛ a tɔtɔ mo ɔ nɛ.” Lɔ ɔ mɛni he je nɛ Yesu bi ke: “Mɛnɔ lɛ ta ye he ɔ?” Yesu de ke: “Nɔ ko ta ye he, ejakaa i nu he kaa he wami je ye mi.” (Luka 8:45, 46) Benɛ yo ɔ ta Yesu he ɔ, Yesu nu he kaa he wami ko je e mi.

Benɛ yo ɔ na kaa e hí lɛ laami hu ɔ, e kɛ he domi blibliibli ba kpla si ngɛ Yesu nane nya. E de Yesu nɔ́ he je nɛ e ta e he ɔ, kɛ bɔ nɛ e ná tsami amlɔ nɔuu ɔ ngɛ ni ɔmɛ tsuo a hɛ mi. Yesu je mi mi himi mi nɛ e wo e bua ke: “Biyo, o hemi kɛ yemi tsa mo! O hiɔ ɔ nɛ jɔ! Yaa ngɛ he jɔmi mi.”​​—Marko 5:34.

E ngɛ heii kaa Nɔ nɛ Mawu hla kaa e ye zugba a nɔ ɔ mi mi hi, nɛ e naa nɔ mɔbɔ, nɛ e susuɔ nihi a he, nɛ e ngɛ he wami nɛ e kɛ maa ye bua nihi hulɔ!