Yesu Tle Gbogboehi Si

JOKUƐ yoyo ɔ nɛ o ngɛ hyɛe ngɛ foni ɔ mi ɔ ye jeha 12. Yesu ji nɔ nɛ pɛtɛ e nine he ɔ nɛ, nɛ e nyɛ kɛ e tsɛ nɛ a daa si ɔ nɛ. Anɛ o le nɔ́ nɛ ha a bua jɔ ɔ lo? Ha nɛ waa hyɛ.

Jokuɛ yoyo ɔ tsɛ ji nɔmlɔ nguaa ko nɛ a tsɛɛ lɛ Yairo. Ligbi ko ɔ, e biyo ɔ nu hiɔ, nɛ a ngɔ lɛ kɛ fɔ sa nɔ. Se e hiɔ ɔ jɔɛ ha lɛ. E mi ba wa mohu. Yairo kɛ e yo ɔ hao wawɛɛ, ejakaa e pee kaa nɔ́ nɛ a biyo ɔ ma gbo. Lɛ pɛ ji a biyo. Lɔɔ he ɔ, Yairo ho konɛ e ya hla Yesu. Ejakaa e nu nyakpɛ níhi nɛ Yesu pee ɔ he.

Benɛ Yairo na Yesu ɔ, e na kaa nimli babauu bɔle lɛ. Se Yairo gu nimli babauu ɔ a kpɛti nɛ e ya kpla si ngɛ Yesu nane nya. Nɛ e de lɛ ke: ‘Ye biyo be he wami kulaa, i kpa mo pɛɛ, ba nɛ o ba tsa lɛ.’ Yesu kplɛɛ kaa e maa ya.

Benɛ a yaa ngɛ blɔ ɔ nɔ ɔ, nimli babauu ɔ ngɛ a sibi tsitsɛɛe konɛ a kɛ su Yesu he. Si kake too ɔ, Yesu da si. Nɛ e bi ke: ‘Mɛnɔ nɛ ta ye he ɔ?’ Yesu nu he kaa he wami je e mi, lɔɔ he ɔ, e le kaa nɔ ko ta e he. Se mɛnɔ? E ji yo ko nɛ e nu hiɔ jeha 12. Yo ɔ ba ta Yesu tade ɔ he, nɛ e ná he wami!

Enɛ ɔ ha Yairo tsui nɔ e mi, ejakaa e na kaa e yí ha Yesu kulaa kaa e ma tsa nɔ ko. Se e kɛ we nɛ tsɔlɔ ko ba. Nɛ e ba de Yairo ke: ‘Koo hao Yesu hu. O biyo ɔ gbo.’ Yesu nu munyu ɔ, nɛ e de Yairo ke: ‘Koo ye tsui, e maa te si ekohu.’

Nyagbe ɔ, benɛ a ya su Yairo we ɔ mi ɔ, nihi ngɛ ya foe wawɛɛ. Se Yesu de mɛ ke: ‘Nyɛɛ jɔɔ ya fomi. Jokuɛ ɔ gbo we. Mahe kɛkɛ nɛ e hwɔ.’ Se a muɔ Yesu nɛ a ye e he fɛu, ejakaa a le kaa jokuɛ ɔ gbo.

Kɛkɛ nɛ Yesu ngɔ jokuɛ ɔ tsɛ kɛ e nyɛ kɛ e bɔfo ɔmɛ a kpɛti nihi etɛ, nɛ a ho he nɛ jokuɛ ɔ hwɔɔ si ngɛ ɔ ya. E pɛtɛ e nine he nɛ e de ke: ‘Tee si!’ Kɛkɛ nɛ jokuɛ ɔ hɛ tsiɛ, kaa bɔnɛ o na ngɛ foni ɔ mi ɔ. Nɛ e te si, nɛ e nyɛɛ! Enɛ ɔ heje nɛ e nyɛ kɛ e tsɛ ɔ bua jɔ wawɛɛ ɔ nɛ.

Pi jokuɛ yoyo nɛ ɔ ji kekleekle nɔ nɛ Yesu tle lɛ si kɛ je gbeje. Nɔ kekleekle nɛ Baiblo ɔ tu e he munyu ji yalɔyo ko nɛ hi Nain ma a mi binyumu. Lɔɔ se ɔ, Yesu tle Maria kɛ Marta nyɛminyumu Lazaro hu si kɛ je gbeje. Ke Yesu ba ye matsɛ ɔ, e maa tle nimli nɛ a gbo fuu si kɛ ba wami mi ekohu. Anɛ pi bua jɔmi munyu ji nɛ ɔ lo?