Yesu Tle Lazaro Si

Benɛ Yesu maa sɛkɛ Marta, kɛ Maria ya kpe ngɛ Betania ma a nya a, e kɛ mɛ ho he nɛ a pu Lazaro ngɛ ɔ ya. A pu Lazaro ngɛ tɛ puɔ ko mi, nɛ a ngɔ tɛ ngua ko kɛ tsi muɔ ɔ nya. Benɛ a ya su yɔkɔ ɔ he ɔ, Yesu fa ke: “Nyɛ je tɛ ɔ.” Nɔ́ nɛ Yesu de ɔ pee Marta yaa bɔɔ. Enɛ ɔ he ɔ, e de ke: “Nyɔmtsɛ, be nɛ ɔ mi ɔ, nɔ ɔ puɛ, ejakaa ligbi eywiɛ sɔuu ji nɛ ɔ nɛ e gbo.” Se Yesu de lɛ ke: “Anɛ i de we mo ke, ke o he ye ɔ, o maa na Mawu hɛ mi nyami ɔ lo?”​​—Yohane 11:39, 40.

Kɛkɛ nɛ a kpɛne tɛ ɔ kɛ je yɔkɔ ɔ nya, nɛ Yesu wo e yi nɔ nɛ e hyɛ hiɔwe, nɛ e sɔle ke: “Tsaatsɛ, i naa mo si kaa o buɔ mi tue. I le kaa o buɔ mi tue be tsuaa be; se i ngɛ enɛ ɔ dee ngɛ nihi nɛ pueɔ si nɛ ɔ a he, bɔ nɛ pee nɛ a he ye kaa mo nɛ o tsɔ mi.” Sɔlemi nɛ Yesu sɔle ngɛ ma hɛ mi ɔ ha nɛ nihi nɛ a ngɛ lejɛ ɔ na kaa Mawu ma ha lɛ he wami nɛ e kɛ maa pee nɔ́ ko. Jehanɛ ɔ, Yesu wo e gbi nɔ nɛ e de ke: “Lazaro, lee-ee, jee kpo!” Kɛkɛ nɛ Lazaro je kpo ngɛ yɔkɔ ɔ mi kɛ e he bo nɛ a kɛ pu lɛ ɔ. A kɛ bo blaa e nine kɛ e nane, kɛ e yi. Benɛ e je kpo ɔ, Yesu de ni ɔmɛ ke: “Nyɛɛ pɛne lɛ nɛ nyɛ ha e ya.”​​—Yohane 11:41-44.

Yuda bi fuu nɛ a ba ngɛ Marta kɛ Maria bua woe ɔ na nyakpɛ ní nɛ Yesu pee ɔ, nɛ a he lɛ ye. Se ni komɛ je, nɛ a ya de Farisi bi ɔmɛ nɔ́ nɛ Yesu pee ɔ. Nɔuu nɛ Farisi bi ɔmɛ kɛ osɔfo nikɔtɔma amɛ tsɛ kpe ngɛ Yuda bi a kojomi he ngua nɛ ji Sanhedrin ɔ. Osɔfo nɔkɔtɔma pe kulaa nɛ a tsɛɛ lɛ ke Kayafa a hu piɛɛ a he. A ti ni komɛ de ke: “Kɛ wa maa pee kɛɛ? Nyɛɛ hyɛ níhi tsuo nɛ nyumu nɛ ɔ ngɛ pee kɛ ngɛ okadi toe. Ke wa ngmɛ lɛ blɔ nɛ e ya nɔ ngɛ ní nɛ ɔmɛ pee ɔ, ma a tsuo ma he lɛ maa ye. Kɛkɛ ɔ, Roma bi ɔmɛ maa ba ba kpata wa sɔlemi we ɔ, kɛ wa ma a tsuo hɛ mi.” (Yohane 11:47, 48) E ngɛ mi kaa nihi ye ‘níhi fuu nɛ Yesu pee kɛ to okadi’ ɔ he odase kɛ tsɔɔ Farisi bi ɔmɛ kɛ mlaa tsɔɔli ɔmɛ mohu lɛɛ, se a bua jɔɛ níhi nɛ Mawu gu Yesu nɔ kɛ ngɛ pee ɔ he. Blɔ nya nɛ a ngɛ ɔ mohu he nɛ a ngɛ susue.

Lazaro nɛ Yesu tle lɛ si ɔ ha nɛ Saduki bi ɔmɛ a hɛ mi pue si, ejakaa mɛɛ lɛɛ a he we gbogboehi a si temi ɔ yi. Jehanɛ ɔ, Kayafa nɛ e ji Saduki no ɔ de ke: “Nyɛ biɛ pɛ! Anɛ nyɛ li kaa ke nyɛ ha nɔ kake mohu gbo ngɛ ma a tsuo nane mi ɔ, e hi pe nɛ a ma kpata ma a tsuo hɛ mi lo?”​​—Yohane 11:49, 50; Bɔfo Ɔmɛ A Ní Tsumi 5:17; 23:8.

‘Pi Kayafa nitsɛ nɛ e to e yi mi kɛ de’ nɔ́ nɛ ɔ, mohu ɔ, akɛnɛ e ji osɔfo nɔkɔtɔma pe kulaa ngɛ jamɛ a be ɔ mi he je ɔ, Mawu ha nɛ e tu jamɛ a munyu ɔ. Kayafa ngɛ tsɔɔe kaa e sa nɛ a gbe Yesu konɛ e kpa a he guɛ gbemi. Kayafa gbami ɔ maa nɔ mi kaa pi Yuda bi pɛ nɛ Yesu gbenɔ ɔ ma kpɔ, mohu ɔ, e ma kpɔ “Mawu bimɛ tsuo nɛ a gbɛ fia” je ɔ mi ɔ.​​—Yohane 11:51, 52.

Sanhedrin bi ɔmɛ a bua jɔ nɔ́ nɛ Kayafa de ɔ he, nɛ a to kaa a maa gbe Yesu. Anɛ Yesu huɛ Nikodemo nɛ e ji Sanhedrin ɔ mi no ɔ ma ya wó Yesu tue nɔ ngɛ ga yaya nɛ a to ngɛ e he ɔ he lo? Nikodemo ya de lɛ jio, e ya de we lɛ jio ɔ, Yesu je Yerusalem kpɔ ɔ mi oya bɔ nɛ pee nɛ a ko gbe lɛ, ejakaa be nɛ Mawu to ɔ sui lolo.