Petro Kua Yesu

Benɛ Yesu kɛ e kaseli ɔmɛ ngɛ hiɔwe tsu ɔ mi ɔ, e de mɛ ke: ‘Nyɔ nɛ ɔ mi ɔ, nyɛ tsuo nyɛ maa je ye he.’ Petro de Yesu ke: ‘Imi lɛɛ i piɛɛ we he! Ke ni kpa amɛ je o he po ɔ, imi lɛɛ i be o he jee gblegbleegble.’ Se Yesu de Petro ke: ‘Loko kungwɔ ma kpã nɔ́ ɔ, o ma de si etɛ ke o li mi.’

Benɛ ta buli ɔmɛ ngɔ Yesu kɛ ho Kayafa we ɔ mi ya a, bɔfo ɔmɛ a kpɛti nihi fuu tu fo kɛ je. Se a kpɛti ni enyɔ nyɛɛ ni ɔmɛ a se kɛ ho. Nɔ kake ji Petro. E nyɛɛ a se kɛ ya Kayafa we ɔ mi, nɛ e ya ngɛ la hluee ngɛ lejɛ ɔ. Mawayo ko na Petro ngɛ la a he, nɛ e de lɛ ke: ‘I le mo! O piɛɛ Yesu he!’

Petro de lɛ ke: ‘Dɛbi, i piɛɛ we e he! I li nɔ́ nɛ o ngɛ dee ɔ he nɔ́ ko!’ Petro ngɔ e hɛ mi kɛ tsɔɔ agbo ɔ nya blɔ. Se benɛ e yaa a, mawayo kpa ko hu na lɛ, nɛ e de ni ɔmɛ ke: ‘Nyumu nɛ ɔ piɛɛ Yesu he!’ Petro de lɛ ke: ‘I li nɔ nɛ a tsɛɛ lɛ ke Yesu ɔ po!’ Nyumu ko de Petro ke: ‘Yesu kaseli ɔmɛ a ti nɔ kake ji mo! O munyu tumi tsɔɔ kaa o je Galilea kaa Yesu nɔuu.’ Se Petro ka kita ke: ‘I li lɛ!’

Jamɛ a be ɔ mi nɔuu nɛ kungwɔ kpã nɔ́. Petro na kaa Yesu plɛ nɛ e ngɛ lɛ hyɛe. Petro kai munyu nɛ Yesu tu ɔ, nɛ e je kpo nɛ e ya fo ya wawɛɛ.

Sanhedri ɔ kpe konɛ a bi Yesu nya mi munyu ngɛ Kayafa we ɔ mi. Se a ma a juɛmi nya si momo kaa a maa gbe Yesu, nɛ a ngɛ nɔ́ ko hlae nɛ a maa da nɔ kɛ gbe lɛ. Se a nɛ́ nɔ́ yaya ko ngɛ e he. Nyagbe kulaa a, Kayafa bi Yesu ke: ‘Mo ji Mawu Bi ɔ lo?’ Yesu ha lɛ heto ke: ‘Ee, imi.’ Kayafa de ke: ‘Odase kpa ko he hia we wɔ hu. E bɔ musu!’ Kojoli ɔmɛ kplɛɛ nɔ, nɛ a de ke: ‘Nyumu nɛ ɔ sa gbenɔ.’ A gba Yesu tue mi ma, nɛ a su lada kɛ pue e nɔ, nɛ a ha e hɛ mi, nɛ a gba lɛ ma, nɛ a de lɛ ke: ‘Ke gbalɔ ji mo ɔ, moo tsɔɔ wɔ nɔ nɛ gba mo ma a!’

Benɛ je na a, a ngɔ Yesu kɛ ho Sanhedri asa a nɔ ya nɛ a kpale bi lɛ ke: ‘Mo ji Mawu Bi ɔ lo?’ Yesu ha mɛ heto ke: ‘Jã nɛ nyɛ nitsɛmɛ nyɛ de ɔ nɛ.’ Kɛkɛ nɛ a bu lɛ fɔ kaa e bɔ musu, nɛ a kɛ lɛ ho Pontio Pilato, nɛ ji Roma amlaalo ɔ we ɔ mi ya. Lɔ ɔ se ɔ, mɛni ba? Ha nɛ waa hyɛ.