A He Nihi Kpaanyɔ A Yi Wami

Noa kɛ e weku ɔ, kɛ lohwe ɔmɛ ya sɛ daka a mi. Yehowa nga sinya a, kɛkɛ nɛ hiɔmi bɔni nɛmi. Hiɔmi ɔ nɛ wawɛɛ, nɛ daka a ba da nyu ɔ hɛ mi. Bɔɔbɔɔbɔɔ ɔ, nyu ɔ ha zugba a nɔ tsuo. Nihi nɛ a be daka a mi, nɛ ji nimli yayami ɔmɛ tsuo gbo. Se akɛnɛ Noa kɛ e weku ɔ ngɛ daka a mi he je ɔ, a gbo we. Hyɛ bɔ nɛ a bua maa jɔ ha kaa a bu Yehowa tue.

Hiɔmi ɔ nɛ nyɔ kɛ pia ligbi 40 loko e kpa. Nyu ɔ bɔni miimi bɔɔbɔɔbɔɔ. Nyagbe kulaa a, daka a ya sa si ngɛ yoku ɔmɛ a nɔ. Se loloolo ɔ, nyu fuu ha zugba a nɔ, enɛ ɔ he ɔ, Noa kɛ e weku ɔ nyɛ we nɛ a je kpo ngɛ daka a mi.

Bɔɔbɔɔbɔɔ ɔ, nyu ɔ ba mii. Noa kɛ e weku ɔ hi daka a mi pe jeha kake. Lɔ ɔ se ɔ, Yehowa de mɛ ke a je kpo ngɛ daka a mi konɛ a ya hi zugba nɛ pee kaa je ehe ɔ nɔ. A bua jɔ wawɛɛ kaa Yehowa he a yi wami. Enɛ ɔ he ɔ, a sã afɔle kɛ na Yehowa si.

Yehowa bua jɔ afɔle nɛ a sã ha lɛ ɔ he. Yehowa wo si kaa e be nyu kpekpemi ngɔe kɛ kpata níhi nɛ ngɛ zugba a nɔ ɔ a hɛ mi hu. E ha nɛ alale po ngɛ bɔku ɔ mi kɛ tsɔɔ kaa e maa ye jamɛ a si womi ɔ nɔ. Lɔ ɔ ji kekleekle alale nɛ po. Anɛ o na alale hyɛ lo?

Enɛ ɔ se ɔ, Yehowa de Noa kɛ e weku ɔ kaa a fɔ nɛ a he nɛ hiɛ fuu ngɛ zugba a nɔ.