Yehowa Ye Bua Yehoshafat

Yehoshafat nɛ ji Yuda bi ɔmɛ a matsɛ ɔ puɛ Baal afɔle sami la tɛhi kɛ amagahi tsuo nɛ ngɛ Yuda ma a mi ɔ. E suɔ kaa nihi nɛ a le Yehowa mlaa amɛ. Enɛ ɔ he ɔ, e tsɔ ma nikɔtɔma amɛ, kɛ Levi bi ɔmɛ kɛ ho Yuda ma amɛ tsuo a nɔ ya konɛ a ya tsɔɔ mɛ Yehowa mlaa amɛ.

Mahi nɛ bɔle Yuda bi ɔmɛ nyɛ we nɛ a tua mɛ, ejakaa a le kaa Yehowa kɛ mɛ ngɛ. A ba ke Matsɛ Yehoshafat ní po. Se Moab bi ɔmɛ, kɛ Amon bi ɔmɛ, kɛ nihi nɛ a je Seir ní ɔmɛ a mi ɔ ba konɛ a kɛ Yuda bi ɔmɛ nɛ ba hwu ta. Yehoshafat le kaa e hia Yehowa yemi kɛ buami. E ha nɛ nyumuhi kɛ yihi, kɛ jokuɛwi tsuo ba Yerusalɛm. E sɔle ngɛ mɛ tsuo a hɛ mi nɛ e de ke: ‘Yehowa, ke o piɛɛ we wa he ɔ, wa be nyɛe maa ye kunimi. Wa kpa mo pɛɛ nɛ o tsɔɔ wɔ nɔ́ nɛ e sa kaa waa pee.’

Yehowa ha a sɔlemi ɔ heto ke: ‘Nyɛ ko ye gbeye. Ma ye bua nyɛ. Nyɛ ya da nyɛ blɔ hehi ngɛ nyɛ ta a nya, nɛ nyɛ maa na bɔ nɛ ma plɛ kɛ he nyɛ yi wami ha.’ Kɛ Yehowa plɛ kɛ he a yi wami ha kɛɛ?

E nɔ jena a, Yehoshafat bua lali a nya, nɛ e de mɛ ke a la kɛ nyɛɛ ma a hɛ mi. Lali ɔmɛ nyɛɛ kɛ je Yerusalɛm kɛ ya he nɛ a maa hwu ta a ngɛ ɔ. A tsɛɛ lejɛ ɔ ke Tekoa.

Benɛ lali ɔmɛ ngɛ lae wawɛɛ kɛ ngɛ Yehowa yi jee kɛ bua jɔmi ɔ, Yehowa hwu ta a ha e we bi ɔmɛ. E ha nɛ Amon bi ɔmɛ kɛ Moab bi ɔmɛ bɔni basabasa peemi, kɛkɛ nɛ a bɔni a he gbemi hluu kɛ ya si benɛ mɛ tsuo a gbo. Se Yehowa bu Yuda bi ɔmɛ, kɛ a ta buli ɔmɛ, kɛ osɔfo ɔmɛ a he. Mahi tsuo nɛ bɔle mɛ ɔ nu nɔ́ nɛ Yehowa pee ɔ he, nɛ a na kaa loloolo ɔ, Yehowa piɛɛ e we bi ɔmɛ a he. Mɛni blɔ nɔ Yehowa guɔ kɛ heɔ e we bi a yi wami? E guɔ blɔhi fuu a nɔ kɛ peeɔ jã. E hia we nɛ nimli nɛ a ye bua lɛ loko e pee jã.