Sɛ Womi Nɛ Je Blɔ Tsɔɔmi Ajla Toli Ɔmɛ A Ngɔ

Nyɛmimɛ Nɛ Wa Suɔ:

Akɛnɛ wa ji Yehowa sɔmɔli he je ɔ, wa bua jɔ Mawu Munyu nɛ ji Baiblo ɔ he. Wa ngɛ nɔ mi mami kaa níhi nɛ ya nɔ blema nɛ a ngma ngɛ Baiblo ɔ mi ɔ da. Ga womi kpakpahi ngɛ Baiblo ɔ mi nɛ yeɔ bua wɔ. Baiblo ɔ ha nɛ wa na kaa Yehowa suɔ adesahi tsuo. (La 119:105; Luka 1:3; 1 Yohane 4:19) Wa suɔ kaa wa maa ye bua nihi konɛ a kase anɔkuale munyuhi nɛ ngɛ Mawu Munyu ɔ mi ɔ. Enɛ ɔ he ɔ, wa bua jɔ kaa wa pee womi nɛ ji, Níhi Nɛ O Ma Nyɛ Maa Kase Ngɛ Baiblo ɔ Mi. Ha nɛ wa de mo nɔ́ ko bɔɔ ngɛ womi nɛ ɔ he.

A pee womi nɛ ɔ kɛ ha jokuɛwi titli. Se e ma nyɛ maa ye bua nikɔtɔmahi nɛ a suɔ kaa a maa kase níhi fuu ngɛ Baiblo ɔ mi ɔ hulɔ. Akɛnɛ a ngma Baiblo ɔ kɛ ha nɔ fɛɛ nɔ he je ɔ, ke wɔ tsuo wa kase níhi nɛ ngɛ womi nɛ ɔ mi ɔ, wa bua maa jɔ wawɛɛ nitsɛ.

A da Baiblo mi sane ɔmɛ a nɔ kɛ ngma womi nɛ ɔ. Womi nɛ ɔ tsɔɔ níhi nɛ ya nɔ ngɛ adesahi a si himi mi kɛ je benɛ a bɔ je ɔ. Baiblo mi sanehi nɛ ngɛ womi nɛ ɔ mi ɔ a sisi numi yi kulaa. A to sane ɔmɛ a nya kaa bɔ nɛ níhi ya nɔ ɔ pɛpɛɛpɛ.

Se pi Baiblo mi sanehi pɛ nɛ ngɛ womi nɛ ɔ mi. Ke o hyɛ munyuhi kɛ fonihi nɛ ngɛ mi ɔ, e peeɔ mo kaa nɔ́ nɛ o ngɛ lejɛ ɔ loko Baiblo mi sane nɛ ɔmɛ ya nɔ. Jehanɛ hu ɔ, e haa nɛ o naa si himi nɛ nihi nɛ a ngɛ a he munyu tue ɔ gu mi.

Womi nɛ ɔ maa ye bua wɔ konɛ waa na kaa Baiblo ɔ tu nimli nɛ a hi si hyɛ a he munyu. Nimli nɛ ɔmɛ a ti ni komɛ bu Yehowa tue, nɛ ni komɛ hu bui lɛ tue. Womi ɔ maa ye bua wɔ konɛ waa kase ní kɛ je níhi nɛ a pee ɔ mi. (Roma Bi 15:4; 1 Korinto Bi 10:6) Womi ɔ hɛɛ fã kakaaka 14. Ngɛ fã tsuaa fã sisije ɔ, a tsɔɔ níhi nɛ wa maa kase ngɛ jamɛ a fã a mi.

Ke fɔlɔ ji mo ɔ, o kɛ o bi ɔ ma nyɛ maa kane ní kasemi ɔ eko, konɛ nyɛ susu fonihi nɛ ngɛ mi ɔ he. Lɔ ɔ se ɔ, nyɛ ni enyɔ ɔmɛ ma nyɛ maa kane ngmamihi nɛ a kɛ ní kasemi ɔ da nɔ ɔ. Moo ye bua o bi ɔ konɛ e na bɔ nɛ ngmami ɔmɛ kɔɔ ní kasemi ɔ he ha. Ke o ngɛ hlae nɛ o ye bua nɔ ko nɛ e wa konɛ e nu Baiblo ɔ sisi ɔ, o ma nyɛ maa gu blɔ nɛ ɔ nɔ kɛ ye bua lɛ.

Wa he ye kaa womi nɛ ɔ maa ye bua jokuɛwi kɛ nikɔtɔmahi tsuo nɛ a suɔ kaa a maa kase Mawu he ní ɔ, konɛ a kase Mawu Munyu ɔ, nɛ a kɛ níhi nɛ a kase ɔ nɛ tsu ní. Enɛ ɔ maa ye bua mɛ, nɛ mɛ hu a ma ba piɛɛ Yehowa weku nɛ e suɔ wawɛɛ ɔ he kɛ sɔmɔ lɛ.