Fã 1 ɔ Nya Blimi Munyu

Kekleekle womi nɛ ngɛ Baiblo ɔ mi ɔ tsɔɔ bɔ nɛ Yehowa plɛ kɛ bɔ níhi ha. Womi nɛ ɔ ha nɛ wa na kaa níhi nɛ Yehowa bɔ ngɛ hiɔwe kɛ zugba a nɔ ɔ tsuo ngɛ fɛu. Ke o ji fɔlɔ ɔ, moo ye bua o bi ɔ konɛ e na kaa Yehowa bɔ níhi fuu nɛ a ngɛ nyakpɛ. Ha nɛ o bi ɔ nɛ na kaa bɔ nɛ Mawu bɔ adesahi ha he je ɔ, a peeɔ níhi fuu nɛ lohwehi be nyɛe maa pee. Adesahi tuɔ munyu, a susuɔ níhi a he, a peeɔ klamahi, a laa, nɛ a sɔleɔ. Moo ye bua o bi ɔ konɛ e na kaa Yehowa ngɛ he wami kɛ nile, e suɔ wa ti nɔ fɛɛ nɔ, nɛ e bua jɔ ní kpahi tsuo nɛ e bɔ ɔ a he.