KPALE YA SLAA NIHI NƐ A BUA JƆ MUNYU Ɔ HE
NÍ KASEMI 9
Mo Je Mi Mi Sami Kpo
Sisi Tomi Mlaa: “Nyɛɛ kɛ nihi nɛ a ngɛ nyae ɔ nɛ nya; nyɛɛ kɛ nihi nɛ a ngɛ ya foe ɔ nɛ fo.”—Rom. 12:15.
Nɔ́ Nɛ Yesu Pee
1. Moo hyɛ VIDEO ɔ, aloo moo kane Maako 6:30-34. Lɔ ɔ se ɔ, mo susu sane bimihi nɛ nyɛɛ se ɔmɛ a he:
Mɛni he je nɛ Yesu kɛ e bɔfo ɔmɛ ngɛ he ko hlae nɛ ‘mɛ pɛ a ya hi’ ɔ?
Mɛni wo Yesu he wami nɛ e tsɔɔ asafo kuu ngua a ní ɔ?
Mɛni Wa Kaseɔ Ngɛ Yesu Nɔ Hyɛmi Nɔ́ Nɛ ɔ Mi?
2. Ke wa ngɛ mi mi sami ɔ, wa susuɔ ni kpahi a he se pi wa sɛ gbi ɔ pɛ he.
Moo Kase Yesu
3. Moo bu lɛ tue saminya. Moo ngmɛ nɔ ɔ blɔ nɛ e de bɔ nɛ e ngɛ he nue ha. O he ko sɔ kɛ po e munyu ɔ nɔ nɛ koo fia e susumihi aloo bɔ nɛ e ngɛ he nue ha a ngɔ fɔ he. Ke o bu lɛ tue saminya a, lɔ ɔ tsɔɔ kaa o susuɔ e he.
4. Mo susu nɔ nɛ e bua jɔ munyu ɔ he ɔ he. Ke o kɛ lɛ ngɛ ní sɛɛe ɔ, mo bi o he ke:
‘Mɛni he je nɛ e sa kaa e nu anɔkuale ɔ?’
‘Kɛ Baiblo ɔ nɛ e maa kase ɔ ma tsake e si himi amlɔ nɛ ɔ kɛ hwɔɔ se ha kɛɛ?’
5. O kɛ lɛ nɛ sɛɛ níhi nɛ maa ye bua lɛ ɔ a he ní. Tsɔɔ lɛ bɔ nɛ Baiblo ɔ nɛ e maa kase ɔ maa ye bua lɛ ha konɛ e na e sane bimi ɔmɛ a heto kɛ jehanɛ ɔ se hu, bɔ nɛ e maa ye bua lɛ ngɛ e si himi mi ha.