BƆ NƐ O MAA PEE NIHI KASELI HA
NÍ KASEMI 11
Ngɔɔ Munyuhi Nɛ A Sisi Numi Yi Kɛ Tsɔɔ Ní
Sisi Tomi Mlaa: “Ke a nui lilɛ slɔɔto nɛ nyɛ tuɔ ɔ sisi saminya a, kɛ nɔ ko ma plɛ kɛ le nɔ́ nɛ nyɛ ngɛ dee ɔ ha kɛɛ?”—1 Kor. 14:9.
Nɔ́ Nɛ Yesu Pee
1. Moo hyɛ VIDEO ɔ, aloo moo kane Mateo 6:25-27. Lɔ ɔ se ɔ, mo susu sane bimihi nɛ nyɛɛ se ɔmɛ a he:
Mɛni Yesu pee nɛ tsɔɔ kaa Yehowa susuɔ wa he?
E ngɛ mi kaa Yesu le níhi fuu kɛ kɔ lohwe pɛlitsɛmɛ a he mohu lɛɛ, se mɛni ji nɔ́ kake ko nɛ e sisi numi yi nɛ e ngɔ e juɛmi kɛ ma nɔ? Mɛni he je nɛ blɔ nɛ e gu nɔ kɛ tsɔɔ ní ɔ hi saminya a?
Mɛni Wa Kaseɔ Ngɛ Yesu Nɔ Hyɛmi Nɔ́ Nɛ ɔ Mi?
2. Ke waa kɛ munyuhi nɛ a sisi numi yi tsɔɔ nihi ní ɔ, lɔ ɔ maa ta a tsui he nɛ a hɛ be nɔ jee.
Moo Kase Yesu
3. Koo tu munyu fuu. O kɛ o juɛmi nɛ ma oti nɛ nyɛ ngɛ he susue ngɛ womi ɔ mi ɔ nɔ mohu pe nɛ o maa tu níhi tsuo nɛ o le kɛ kɔ nɔ́ ɔ he ɔ he munyu. Ke o bi sane ɔ, moo to o tsui si ha ní kaselɔ ɔ konɛ e ha heto. Ke e li heto ɔ aloo e susumi ɔ kɛ Baiblo ɔ kɔ we ɔ, mo bi lɛ sane kpahi konɛ e ye bua lɛ kɛ na heto ɔ. Ke ní kaselɔ ɔ nu oti ɔ sisi ɔ, lɛɛ nyɛ tsa nɔ.
4. Ye bua o Baiblo kaselɔ ɔ nɛ e ngɔ ní hehi nɛ e kase ɔ kɛ to níhi nɛ e kase momo ɔ he. Kaa nɔ hyɛmi nɔ́ ɔ, ke o kɛ ní kaselɔ ɔ ma ní kasemi nɛ kɔɔ gbogboehi a si tlemi he ɔ sisi jemi ɔ, o kɛ lɛ ma nyɛ ma nylɔ nɔ́ nɛ nyɛ kase kɛ kɔ si fɔfɔɛ mi nɛ gbogboe ɔmɛ ngɛ ɔ mi kpiti loko nyɛ tsa nɔ.
5. Ngɔɔ nɔ́ he tomi níhi kɛ tsu ní saminya. Loko o kɛ nɔ́ he tomi nɔ́ ko ma tsu ní ɔ, bi o he ke:
‘Anɛ nɔ́ he tomi nɔ́ nɛ ɔ ngɛ kpiti lo?’
‘Anɛ ye Baiblo kaselɔ ɔ maa nu sisi lo?’
‘Anɛ nɔ́ he tomi nɔ́ ɔ maa ye bua ye Baiblo kaselɔ ɔ konɛ e kai oti nɛ wa ngɛ he susue ɔ lo?’