Mose​—Nyumu Nɛ E Ngɛ Suɔmi

MƐNI JI SUƆMI?

Suɔmi tsɔɔ nihi a he nɛ a susuɔ wawɛɛ. Ke nɔ ko ngɛ suɔmi ɔ, e kɛ e munyu tumi kɛ e ní peepeehi tsɔɔ bɔnɛ e nuɔ he ha ngɛ nihi nɛ e suɔ mɛ wawɛɛ ɔ a he, ke enɛ ɔ biɔ nɛ e kɛ níhi nɛ sã afɔle ngɛ a he po.

KƐ MOSE PLƐ KƐ JE SUƆMI KPO HA KƐƐ?

Mose suɔ Mawu. Ngɛ mɛni blɔ nɔ? Moo lɛɛ mo kai munyu nɛ a ngma ngɛ 1 Yohane 5:3 ɔ. E ke: “Ke wa suɔ Mawu ɔ, wa yeɔ e mlaahi a nɔ.” Mose kɛ sisi tomi mlaa nɛ ɔ tsu ní. Mose pee níhi tsuo nɛ Mawu de lɛ ke e pee ɔ. Ní nɛ ɔmɛ ekomɛ a mi wa nɛ ekomɛ hu a mi wɛ. Ní nɛmɛ nɛ a mi wa a eko ji Farao hɛ mi nɛ e ya da, nɛ ní nɛmɛ nɛ a mi wɛ ɔ eko ji tso nɔ nɛ e wo kɛ tsɔɔ Wo Tsu ɔ. Fami nɛ Mawu kɛ ha Mose ɔ kle jio, e klɛ we jio, Mose tsu he ní. ‘Mose pee kaa bɔ nɛ Yehowa fa lɛ ɔ pɛpɛɛpɛ.’—2 Mose 40:16.

Mose je suɔmi kpo kɛ tsɔɔ e nyɛmimɛ Israelbi ɔmɛ. Israelbi ɔmɛ yɔse kaa Yehowa gu Mose nɔ kɛ ngɛ mɛ blɔ tsɔɔe, enɛ ɔ he ɔ, a kɛ a nyagbahi tsuo ba fɔɔ Mose hɛ mi. Wa kaneɔ ke: ‘Ma a tsuo daa si ngɛ Mose kuɛ nɔ kɛ je mɔtu kɛ ya si gbɔkuɛ.’ (2 Mose 18:13-16) Mo susu bɔnɛ pɔ maa tɔ Mose he ha be mi nɛ e buɔ Israelbi ɔmɛ a ti nɔ tsuaa nɔ sane tue ɔ he nɛ o hyɛ! Se kɛ̃ ɔ, Mose bua jɔ he kaa e maa ye bua mɛ, ejakaa e suɔ mɛ.

Mose sɔle kɛ ha Israelbi ɔmɛ hulɔ. E sɔle kɛ ha nihi nɛ a tɔ̃ e nɔ po! Kaa nɔ hyɛmi nɔ́ ɔ, benɛ Mose nyɛmiyo Miriam tu munyu kɛ si Mose ɔ, Yehowa ha nɛ kpiti pue Miriam he. Amlɔ nɔuu nɛ Mose kpa Mawu pɛɛ konɛ e na Miriam mɔbɔ mohu pe nɛ e bua maa jɔ kaa Mawu gbla Miriam tue. Mose sɔle ke “Mawu lee, i kpa mo pɛɛ nɛ o tsa lɛ!” (4 Mose 12:13) Suɔmi nɛ ha nɛ Mose sɔle sɔlemi nɛ ɔ nɛ.

MƐNI WA MA NYƐ MAA KASE KƐ JE MI?

Wa ma nyɛ maa kase Mose konɛ wa ná suɔmi nɛ mi kuɔ kɛ ha Mawu. Suɔmi kaa kikɛ ɔ woɔ wɔ he wami nɛ waa kɛ wa “tsui tsuo” yeɔ Mawu mlaahi a nɔ. (Romabi 6:17) Ke wa je wa tsui mi nɛ wa bu Yehowa tue ɔ, e náa bua jɔmi. (Abɛ 27:11) Wɔ hu wa náa he se. Ke suɔmi nitsɛnitsɛ nɛ wa ngɛ ha Mawu ɔ ji nɔ́ nɛ haa nɛ wa sɔmɔɔ Mawu ɔ, lɛɛ pi nɛ wa maa pee níhi nɛ da kɛkɛ, se wa bua maa jɔ he kaa wa maa pee nɔ́ nɛ da!—La 100:2.

Blɔ kpa nɛ wa ma nyɛ maa gu nɔ kɛ kase Mose ji kaa wa ma ná suɔmi nɛ haa nɛ nɔ ngɔɔ e he kɛ sãa afɔle ngɛ ni kpahi a he ɔ. Ke wa huɛmɛ loo wa weku mi bimɛ ngɔ a hiami níhi ba fɔ wa hɛ mi ɔ, suɔmi ma ha nɛ (1) wa maa je wa tsui mi kɛ bu mɛ tue; (2) wa mi mi maa sã wɔ ngɛ a he; kɛ (3) wa ma ha nɛ a le kaa wa susuɔ a he.

Wɔ hu wa ma nyɛ maa sɔle kɛ ha wa suɔli kaa bɔnɛ Mose pee ɔ. Be komɛ ɔ, ke a kɛ a haomihi ba fɔ wa hɛ mi ɔ, e maa pee wɔ kaa wa be nyɛe maa ye bua mɛ. Eko ɔ, wa ma de po ke, “I kpa mo pɛɛ nɔ́ pɛ nɛ ma nyɛ ma pee ha mo ji, ma sɔle ha mo.” Se mo kai kaa Baiblo ɔ de ke: “Ke nɔ nɛ peeɔ nɔ́ nɛ da fa kue ha Mawu ɔ, e tsuɔ ní saminya.” (Yakobo 5:16) Ngɛ anɔkuale mi ɔ, eko ɔ, wa sɔlemi ɔ maa wo Yehowa he wami konɛ e pee nɔ́ ko kɛ ha nɔ ɔ nɛ́ jinɛ eko ɔ, e be pee. Lɛɛ, mɛni yemi kɛ buami kpa ko hu nɛ waa kɛ ma nyɛ ma ha wa suɔli nɛ hi pe sɔlemi nɛ wa maa sɔle ha mɛ?a

Anɛ o kplɛɛ we nɔ kaa wa ma nyɛ maa kase níhi fuu ngɛ Mose he lo? E ngɛ mi kaa e ji adesa kɛkɛ mohu lɛɛ, se e je hemi kɛ yemi, he si bami, kɛ suɔmi kpo ngɛ blɔ nɛ ngɛ nyakpɛ nɔ. Ke wa kase Mose wawɛɛ ɔ, wa ma ná he se nɛ ni kpahi hu ma ná he se.—Romabi 15:4.