Mose​—Nyumu Nɛ E Ngɛ Hemi Kɛ Yemi

MƐNI JI HEMI KƐ YEMI?

Kaa bɔnɛ Baiblo ɔ tsɔɔ ɔ, “hemi kɛ yemi” ji odase yemi nɛ pi si nɛ nɔ ko ngɛ nɛ ha nɛ e kplɛɛ nɔ́ ko nɔ. Nɔ nɛ ngɛ hemi kɛ yemi ngɛ Mawu mi ɔ ngɛ hɛ kɛ nɔ fɔmi kaa Mawu maa ye e si womihi tsuo a nɔ.

KƐ MOSE PLƐ KƐ JE HEMI KƐ YEMI KPO HA KƐƐ?

Mose kɛ e hɛ fɔ Mawu si womi ɔmɛ a nɔ. (1 Mose 22:15-18) E ná he blɔ kaa e maa hi si himi nɛ ngɛ gbɔjɔɔ mi ngɛ Egipt, se e ngmɛɛ he blɔ nɛ ɔ he, nɛ “e suɔ mohu kaa e kɛ Mawu ma a nɛ na amanehlu pe nɔ́ nɛ e maa ye ngɔɔmi ngɛ yayami peemi mi be bɔɔ ko.” (Hebribi 11:25) Anɛ e pia e he kaa e pee jã lo? Dɛbi, ejakaa Baiblo ɔ tsɔɔ kaa ‘Mawu nɛ e nɛ́ kɛ e hɛngmɛ ɔ, e ya nɔ pɛtɛ e he wawɛɛ kaa nɔ́ nɛ e ngɛ lɛ hyɛe paa.’ (Hebribi 11:27) Mose pia we e he kɔkɔɔkɔ ngɛ juɛmi nɛ e pee ɔ he, ejakaa e ngɛ hemi kɛ yemi ngɛ Mawu si womi ɔmɛ a mi.

Mose suɔ kaa e maa ye bua nihi konɛ a hemi kɛ yemi mi nɛ wa. Kaa nɔ hyɛmi nɔ́ ɔ, mo susu nɔ́ nɛ ba benɛ Israelbi ɔmɛ ya je Farao ta buli ɔmɛ kɛ Wo Tsu ɔ a kpɛti ɔ he nɛ o hyɛ. Akɛnɛ Israelbi ɔmɛ a tsui po kaa a hɛ mi ma kpatami heje ɔ, a kpa ngmlaa nɛ a tsɛ Yehowa kɛ Mose. Kɛ Mose pee e ní ha kɛɛ?

Eko ɔ, Mose li kaa Mawu ma gba Wo Tsu ɔ mi konɛ Israelbi ɔmɛ nɛ a gu mi kɛ je. Se Mose ngɛ hɛ kɛ nɔ fɔmi kaa Mawu maa pee nɔ́ ko kɛ po e webi a he piɛ. Mose suɔ kaa e nyɛmimɛ Israelbi ɔmɛ hu nɛ a ná hɛ kɛ nɔ fɔmi nɛ ɔ. Wa kaneɔ ke: ‘Mose de ma a ke, “Nyɛ ko je fɔ̃, nyɛɛ da si kaa nyumuhi, nɛ nyɛ maa na bɔnɛ Yehowa maa pee kɛ he nyɛ yi wami mwɔnɛ ɔ.”’ (2 Mose 14:13) Anɛ Mose ye bua Israelbi ɔmɛ nɛ a hemi kɛ yemi mi wa lo? Ngɛ anɔkuale mi ɔ, Baiblo ɔ de kɛ kɔ Mose kɛ Israelbi ɔmɛ tsuo a he ke: ‘Hemi kɛ yemi lɛ ha Israel ma a po Wo Tsu ɔ kaa nɔ́ nɛ zugba gbigbli nɔ nɛ a ngɛ nyɛɛe.’ (Hebribi 11:29) Mose ná hemi kɛ yemi ngɛ Yehowa mi nɛ e ná he se, nɛ jã kɛ̃ nɛ nɔ tsuaa nɔ nɛ náa hemi kɛ yemi ngɛ Yehowa mi ɔ hu náa he se.

MƐNI WA MA NYƐ MAA KASE KƐ JE MI?

Wa ma nyɛ maa kase Mose kɛ gu wa hɛ nɛ waa kɛ maa fɔ Mawu si womihi a nɔ ɔ nɔ. Kaa nɔ hyɛmi nɔ́ ɔ, Mawu wo si kaa ke waa kɛ e sɔmɔmi ɔ pee nɔ́ titli ngɛ wa si himi mi ɔ, e ma ha wɔ wa helo nya hiami níhi. (Mateo 6:33) Ngɛ anɔkuale mi ɔ, akɛnɛ nihi babauu diɔ helo nya níhi fuu a se mwɔnɛ ɔ heje ɔ, eko ɔ, e maa ye ha wɔ kaa wa maa yu wa he ngɛ jamɛ a su ɔ he. Se ke wa bɔ mɔde nɛ wa pee wa si himi kpokploo, nɛ waa kɛ wa juɛmi ma Yehowa jami nɔ ɔ, wa ma nyɛ ma ná nɔ mi mami kaa Yehowa ma ha wɔ nɔ́ tsuaa nɔ́ nɛ hia wɔ. Yehowa wo si ke: “I be mo sie, nɛ i be mo kuae gblegbleegble.”—Hebribi 13:5.

E sa nɛ wɔ hu waa bɔ mɔde nɛ waa ye bua nihi nɛ mɛ hu a hemi kɛ yemi mi nɛ wa. Kaa nɔ hyɛmi nɔ́ ɔ, fɔli nɛ a ngɛ nile ɔ yɔseɔ kaa e sa nɛ a ye bua a bimɛ ɔmɛ konɛ a ná hemi kɛ yemi ngɛ Mawu mi. E sa nɛ fɔli nɛ a tsɔɔ a bimɛ ɔmɛ kɛ je a jokuɛ mi kaa Mawu ngɛ, nɛ lɛ nɛ e tsɔɔ wɔ níhi nɛ waa pee. Jehanɛ se hu ɔ, e sa nɛ a ha nɛ a bimɛ ɔmɛ nɛ a le kaa ke a kɛ Mawu mlaahi tsu ní ɔ, a ma ná he se wawɛɛ nitsɛ. (Yesaya 48:17, 18) Ke fɔli yeɔ bua a bimɛ ɔmɛ konɛ a ná hemi kɛ yemi kaa ‘Mawu ngɛ, nɛ nihi nɛ hlaa e se blɔ ɔ, e gbaa mɛ’ ɔ, enɛ ɔ tsɔɔ kaa a ha a bimɛ ɔmɛ nike ní ko nɛ he jua wa.—Hebribi 11:6.