BAIBLO MI SANE BIMIHI NƐ A HA HETO
Mɛnɔmɛ maa ya hiɔwe, nɛ mɛni heje?
Nimli ayɔhi abɔ he ye kaa a maa ya hiɔwe. Yesu tsɔɔ kaa e bɔfo anɔkualetsɛmɛ ɔmɛ maa ya hiɔwe. Loko Yesu ma gbo ɔ, e wo e bɔfo ɔmɛ si kaa e yaa dla he ko ngɛ e hiɔwe Tsɛ ɔ ngɔ kɛ to mɛ.—Kane Yohane 14:2.
Mɛni heje nɛ a ma tle nihi si ngɛ zugba a nɔ kɛ ho hiɔwe ya a? Mɛni a ma ya pee ngɛ lejɛ ɔ? Yesu de e bɔfo ɔmɛ kaa a maa pee matsɛmɛ. A maa ye zugba a nɔ.—Kane Luka 22:28-30; Kpojemi 5:10.
Anɛ nimli kpakpahi tsuo maa ya hiɔwe lo?
Ngɛ mahi fuu a nɔ ɔ, nihi bɔɔ ko pɛ ji nɔ yeli. Akɛnɛ Yesu ma tle nihi si kɛ ho hiɔwe ya konɛ a ye zugba a nɔ heje ɔ, e sa nɛ waa hyɛ blɔ kaa nimli bɔɔ ko pɛ nɛ e maa hla. (Luka 12:32) Baiblo ɔ tsɔɔ nihi nɛ a maa piɛɛ Yesu he kɛ ye matsɛ ɔ a yibɔ.—Kane Kpojemi 14:1.
Yesu dla he ko ngɛ hiɔwe kɛ ha e se nyɛɛli ɔmɛ ekomɛ. Anɛ o le nɔ́ nɛ a ma ya tsu ngɛ lejɛ ɔ lo?
Tsa pi nihi nɛ a maa ya hiɔwe ɔ pɛ nɛ a ma ná jɔɔmi. Anɔkualetsɛmɛ komɛ hu ma ná jɔɔmi. Mawu ma tsake zugba a kɛ pee paradeiso ekohu. Anɔkualetsɛmɛ nɛ ɔmɛ maa hi Yesu Matsɛ Yemi ɔ sisi kɛ ya neneene ngɛ paradeiso mi ngɛ zugba a nɔ. (Yohane 3:16) A ma he ni komɛ a yi wami ke a kpata je yaya nɛ ɔ hɛ mi ɔ, nɛ a ma ná he blɔ kɛ sɛ Paradeiso ɔ mi. A ma tle ni komɛ hu si kɛ ba Paradeiso ɔ mi.—Kane La 37:29; Yohane 5:28, 29.