Anɛ E Sa Nɛ Waa Sɔle Kɛ Ha Yesu Lo?

LINGMI nɛ ɔ, níhi a mi hlalɔ ko bi nihewi kɛ yihewi 800 nɛ a je jami slɔɔtohi a mi ɔ nɛ a tsɔɔ nɔ nɛ a he ye kaa e haa sɔlemihi a heto. A kpɛti nihi nɛ hiɛ pe 480 he ye kaa Yesu lɛ haa sɔlemihi a heto. Se yiheyo kake pɛ nɛ e tsɔɔ kaa “Mawu” lɛ haa sɔlemihi a heto.

Kɛ o susu kɛɛ? Anɛ e sa nɛ waa sɔle kɛ ha Yesu aloo Mawu?a Bɔ nɛ pee nɛ waa na heto ɔ, kekleekle ɔ, ha nɛ wa susu bɔ nɛ Yesu tsɔɔ e kaseli ɔmɛ kaa a sɔle ha a he.

MƐNƆ NƐ YESU TSƆƆ WƆ KAA WAA SƆLE KƐ HA?

Yesu tsɔɔ wɔ nɔ nɛ waa sɔle kɛ ha, nɛ e pee sɔlemi he nɔ hyɛmi nɔ́.

E NÍ TSƆƆMI: Benɛ Yesu kaseli ɔmɛ a ti nɔ kake de lɛ ke, “Nyɔmtsɛ, tsɔɔ wɔ sɔlemi” ɔ, Yesu de ke: “Ke nyɛ ngɛ sɔlee ɔ, nyɛ de ke, ‘Wa Tsɛ.’” (Luka 11:1, 2) Jehanɛ hu, ngɛ e Yoku ɔ nɔ Fiɛɛmi ɔ mi ɔ, Yesu wo e tue buli ɔmɛ he wami nɛ a sɔle. E de ke: ‘Nyɛɛ sɔle ngɔ ha nyɛ Tsɛ ɔ.’ Jehanɛ hu e wo a bua, nɛ e de mɛ ke: “Loko nyɛ ma de ke nyɛ ngɛ nyɛ Tsɛ ɔ nɔ́ ko bie ɔ, lɛɛ e le níhi nɛ hia nyɛ ɔ momo.” (Mateo 6:6, 8) Gbɔkuɛ nɛ e nɔ jena Yesu ma gbo ɔ, e de e kaseli ɔmɛ ke: “Nɔ́ tsuaa nɔ́ he pɛɛ nɛ nyɛ ma kpa Tsɛ ɔ ngɛ ye biɛ mi ɔ, e maa pee ha nyɛ.” (Yohane 16:23) Kɛ gu enɛ ɔ nɔ ɔ, Yesu tsɔɔ wɔ kaa waa sɔle kɛ ha e Tsɛ kɛ wɔ hu wa Tsɛ nɛ ji, Yehowa Mawu ɔ.​—Yohane 20:17.

E NƆ HYƐMI NƆ́: Yesu nitsɛ hu sɔle kaa bɔ nɛ e tsɔɔ nihi kaa a sɔle ɔ. E sɔle ke: “Tsaatsɛ, hiɔwe kɛ zugba Nyɔmtsɛ, i naa mo si.” (Luka 10:21) Ngɛ be kpa ko hu mi ɔ, “Yesu wo e hɛ nɔ nɛ e hyɛ hiɔwe, nɛ e de ke, ‘Tsaatsɛ, i naa mo si kaa o buɔ mi tue.’” (Yohane 11:41) Be nɛ Yesu ngɛ gboe ɔ, e sɔle ke: “Tsaatsɛ, i tu ye mumi ɔ kɛ wo o dɛ mi!” (Luka 23:46) Yesu sɔle kɛ ha e Tsɛ nɛ ngɛ hiɔwe nɛ ji, “Hiɔwe kɛ zugba Nyɔmtsɛ” ɔ, nɛ e kɛ pee nɔ hyɛmi nɔ́ kɛ fɔ si ha wɔ nɛ waa nyɛɛ se. (Mateo 11:25; 26:41, 42; 1 Yohane 2:6) Anɛ jã ji bɔ nɛ Yesu kaseli nɛ a hi si blema a nu blɔ tsɔɔmihi nɛ Yesu kɛ ha a sisi lo?

MƐNƆ NƐ KEKLE KRISTOFO ƆMƐ SƆLE KƐ HA?

Be nɛ Yesu ho hiɔwe ya otsi bɔɔ se ɔ, si temi kɛ woli gba e kaseli ɔmɛ a nya, nɛ a wo a he gbeye. (Bɔfo Ɔmɛ A Ní Tsumi 4:18) Ngɛ anɔkuale mi ɔ, a sɔle kɛ bi yemi kɛ buami​—se mɛnɔ nɛ a sɔle kɛ ha? “A kɛ juɛmi kake fa kue ha Mawu” kaa e ya nɔ nɛ e ye bua mɛ ‘kɛ gu e tsɔlɔ klɔuklɔu Yesu ɔ biɛ mi.’ (Bɔfo Ɔmɛ A Ní Tsumi 4:24, 30) Lɔ ɔ he ɔ, kaseli ɔmɛ ngɔ blɔ tsɔɔmi nɛ Yesu kɛ ha ngɛ sɔlemi he ɔ kɛ tsu ní. A sɔle kɛ ha Mawu, se pi Yesu.

Jehahi komɛ a se ɔ, bɔfo Paulo tu bɔ nɛ e kɛ e nyɛmimɛ sɔle ha a he munyu. E ngma kɛ ya ha e nyɛmimɛ Kristofo ɔmɛ ke: “Ke wa ngɛ sɔlee ha nyɛ ɔ, wa naa Mawu wa Nyɔmtsɛ Yesu Kristo Tsɛ ɔ si daa.” (Kolose Bi 1:3) Jehanɛ hu, Paulo ngma kɛ ha e nyɛmimɛ Kristofohi ke, ‘be tsuaa be ɔ, nyɛɛ na Tsɛ Mawu si ngɛ nɔ́ tsuaa nɔ́ he ngɛ wa Nyɔmtsɛ Yesu Kristo biɛ mi.’ (Efeso Bi 5:20) Ngɛ munyu nɛ ɔmɛ a mi ɔ, wa na kaa “be tsuaa be ɔ,” Paulo woɔ nihi he wami kaa a sɔle kɛ ha ‘Tsɛ Mawu ɔ ngɛ nɔ́ tsuaa nɔ́ he’ ngɛ Yesu biɛ mi.​—Kolose Bi 3:17.

Ke waa kɛ Yesu ga womi nɛ kɔɔ sɔlemi he ɔ tsu ní kaa bɔ nɛ kekle Kristofo ɔmɛ pee ɔ, lɔ ɔ tsɔɔ kaa wa suɔ lɛ. (Yohane 14:15) Ke wa sɔleɔ kɛ haa wa Tsɛ nɛ ngɛ hiɔwe ɔ pɛ ɔ, wa ma ná hemi kɛ yemi ngɛ munyuhi nɛ ngɛ La 116:1, 2 ɔ mi. Lejɛ ɔ ke: ‘I suɔ Yehowa, ejakaa e buɔ mi tue. Ma tsɛ lɛ ye wami be tsuo.’b