O Kɛ Sɔlemi He Nɔ Hyɛmi Nɔ́ ɔ Mi Munyu Nɛ Tsu Ní Fã 1

1. Ke wa ngɛ fiɛɛe ɔ, kɛ waa kɛ Yesu sɔlemi nɛ ngɛ Mateo 6:9-13 ɔ ma nyɛ ma tsu ní ha kɛɛ?

NIHI fuu le munyu nɛ ngɛ sɔlemi nɛ a ngma ngɛ Mateo 6:9-13 ɔ. Ke wa ngɛ fiɛɛe ɔ, waa kɛ munyu nɛ ngɛ sɔlemi nɛ ɔ mi ɔ tsɔɔ nihi kaa Matsɛ Yemi ɔ ji nɔ yemi nitsɛnitsɛ nɛ je Mawu ngɔ, nɛ e ma ba tsake zugba a kɛ pee paradeiso. Waa kɛ munyu nɛ ji “o biɛ ɔ he nɛ tsɔ” ɔ hu tsɔɔ nihi kaa Mawu ngɛ biɛ, nɛ e sa kaa wa ha nɛ e he nɛ tsɔ.​—Mateo 6:9.

2. Kɛ wa plɛ kɛ le kaa Yesu sume nɛ waa tĩ munyu kake too mi si abɔ ke wa ngɛ sɔlee kɛɛ?

² Anɛ Yesu ngɛ hlae kaa be tsuaa be nɛ wa maa sɔle ɔ, waa tĩ jamɛ sɔlemi ɔ mi kaa bɔ nɛ nihi fuu peeɔ ɔ lo? Dɛbi. Yesu de ke: “Ke o ngɛ sɔlee ɔ, koo tĩ munyu kake too ɔ nɔuu mi si abɔ.” (Mateo 6:7, NW) Be ko hu ɔ, benɛ Yesu ngɛ e kaseli ɔmɛ bɔ nɛ e sa kaa a sɔle ha tsɔɔe ɔ, e tsɔɔ mɛ sɔlemi nɛ ɔ nɔuu, se e tsake e mi munyu ɔmɛ a hɛ mi. (Luka 11:1-4) Enɛ ɔ ji sɔlemi he nɔ hyɛmi nɔ́ nɛ Yesu pee ha wɔ konɛ ke wa ngɛ sɔlee ɔ, waa le níhi nɛ wa ma nyɛ ma bi.

3. Mɛni sanehi wa ma nyɛ ma bi wa he ke wa ngɛ sɔlemi he nɔ hyɛmi nɔ́ ɔ he susue?

³ Wa ma susu sɔlemi he nɔ hyɛmi nɔ́ nɛ ɔ he ngɛ ní kasemi nɛ ɔ, kɛ ní kasemi nɛ nyɛɛ enɛ ɔ se ɔ mi. Ke wa ngɛ jã pee ɔ, mo bi o he ke, ‘Mɛni blɔ nɔ sɔlemi nɛ ɔ maa ye bua mi konɛ ye sɔlemi nɛ nu tso?’ E he hia wawɛɛ nɛ wa bi wa he hu ke, ‘Anɛ i kɛ munyu nɛ ngɛ sɔlemi he nɔ hyɛmi nɔ́ nɛ ɔ mi ɔ tsuɔ ní lo?’

“WA TSƐ NƐ NGƐ HIƆWE”

4. Mɛni munyu nɛ ji “wa Tsɛ” ɔ kaiɔ wɔ, nɛ Yehowa ji wa Tsɛ ngɛ mɛni blɔ nɔ?

⁴ Yesu je e sɔlemi ɔ sisi ke, “Wa Tsɛ.” Enɛ ɔ kaiɔ wɔ kaa waa kɛ wa nyɛmimɛ nyumuhi kɛ yihi nɛ a ngɛ je kɛ wɛ ɔ tsuo wa Tsɛ ji Yehowa. (1 Petro 2:17) Yehowa ngɔ nihi nɛ a maa ya hiɔwe ɔ kɛ pee e bimɛ, enɛ ɔ he ɔ, ngɛ a blɔ fa mi ɔ, Yehowa ji a Tsɛ ngɛ blɔ klɛdɛɛ ko nɔ. (Roma Bi 8:15-17) Nihi nɛ a maa hi si kɛ ya neneene ngɛ zugba a nɔ ɔ hu ma nyɛ ma tsɛ Yehowa ke a “Tsɛ.” Yehowa lɛ ha mɛ wami, nɛ e jeɔ suɔmi mi nɛ e haa mɛ a hiami níhi. Ke a ye mluku nɛ a ya nɔ nɛ a ye Yehowa anɔkuale ngɛ nyagbe ka a mi ɔ, a ma tsɛ mɛ ke “Mawu bimɛ.”​—Roma Bi 8:21; Kpojemi 20:7, 8.

5, 6. Mɛni ji nike ní nɛ se be nɛ fɔli ma nyɛ ma ha a bimɛ, nɛ mɛni e sa kaa bi tsuaa bi nɛ e pee ngɛ nike ní nɛ ɔ he? (Moo hyɛ foni nɛ ngɛ ní kasemi ɔ sisije ɔ.)

⁵ Ke fɔli ye bua a bimɛ nɛ a nu sisi kaa Yehowa ji a hiɔwe Tsɛ, nɛ a tsɔɔ mɛ kaa a sɔle kɛ ha lɛ ɔ, lɔ ɔ tsɔɔ kaa a kɛ nike ní kpakpa ngɛ a bimɛ hae. Kpɔmi nɔ hyɛlɔ ko ngɛ South Africa a de ke: “Kɛ je benɛ wa fɔ wa bi yi ɔmɛ ɔ, daa gbɔkuɛ ɔ, i kɛ mɛ sɔleɔ, ja ligbi nɛ i hia blɔ. Behi fuu ɔ, wa bi yi ɔmɛ tsɔɔ kaa a kaii we munyu pɔtɛɛ nɛ i tuɔ ke i kɛ mɛ ngɛ sɔlee ɔ. Se a kaiɔ kaa waa kɛ wa Tsɛ Yehowa ngɛ ní sɛɛe, nɛ a nuɔ he kaa a tsui nɔ a mi nɛ a ngɛ slɔkee. Benɛ a wa saii nɛ a ma nyɛ maa sɔle ɔ, i wo mɛ he wami kaa a wo a gbi nɔ kɛ sɔle konɛ ma nu ní nɛ a kɛ Yehowa ngɛ sɛɛe ɔ. Enɛ ɔ ha nɛ i ná he blɔ nɛ se be nɛ i kɛ le níhi nɛ ngɛ ye bimɛ ɔmɛ a tsui mi. Lɔ ɔ ha nɛ i nyɛ nɛ i tsɔɔ mɛ níhi nɛ a he hia nɛ a wo ta ngɛ sɔlemi he nɔ hyɛmi nɔ́ ɔ mi ɔ konɛ a sɔlemi nɛ nu tso.”

⁶ Benɛ e biyi ɔmɛ ba wa a, huɛ bɔmi kpakpa ngɛ a kɛ Yehowa a kpɛti. Amlɔ nɛ ɔ, a ngɛ gba we, nɛ a kɛ a huno ɔmɛ ngɔ a be tsuo kɛ ngɛ Yehowa sɔmɔe. Nike ní nɛ se be nɛ fɔli ma nyɛ ma ha a bimɛ ji, nɛ a maa tsɔɔ mɛ kaa Yehowa ji Nɔ ko nɛ ngɛ nitsɛnitsɛ, nɛ a kɛ lɛ ma nyɛ maa pee a huɛ. Se e he hia nɛ bi tsuaa bi nɛ ha nɛ huɛ bɔmi gbagbanii nɛ hi e kɛ Yehowa a kpɛti.​—La 5:11, 12; 91:14.

“O BIƐ Ɔ HE NƐ TSƆ”

7. Mɛni he blɔ ngua wa ná, se mɛni e sa kaa waa pee?

⁷ E ji he blɔ ngua nɛ wa ná kaa wa le Mawu biɛ, nɛ wa ji nihi nɛ e ‘hla ngɔ ha e he.’ (Bɔfo Ɔmɛ A Ní Tsumi 15:14; Yesaya 43:10) Wa sɔleɔ ke, “O biɛ ɔ he nɛ tsɔ,” nɛ tsɔɔ kaa a pee lɛ klɔuklɔu. Wa sɔleɔ kɛ haa Yehowa konɛ e ye bua wɔ nɛ wa ko pee nɔ́ ko aloo wa de nɔ́ ko nɛ maa gbe e he guɛ. E sɛ nɛ waa pee wa ní kaa ni komɛ nɛ a hi si ngɛ kaseli ɔmɛ a be ɔ mi nɛ a fiɛɛɔ nɔ́ kpa nɛ peeɔ nɔ́ kpa a. Paulo ngma womi ya ha mɛ ke: “Nyɛ he ɔ, ma je li ɔmɛ tuɔ musu bɔmi munyuhi kɛ siɔ Mawu.”​—Roma Bi 2:21-24.

8, 9. Mo ha nɔ hyɛmi nɔ́ ko nɛ tsɔɔ kaa Yehowa yeɔ bua nihi nɛ a suɔ kaa a ma tsɔ e biɛ ɔ he ɔ.

⁸ Wa bɔɔ mɔde wawɛɛ kaa wa maa wo Yehowa biɛ ɔ hɛ mi nyami. Nyɛmiyo ko nɛ e ngɛ Norway ɔ huno gbo benɛ a binyumuyo ɔ ye jeha enyɔ pɛ. E de ke: “I kɛ si himi ko nɛ mi wa kaa jã kpi hyɛ. I sɔleɔ daa ligbi, lɔ ɔ ji kaa ngmlɛfia tsuaa ngmlɛfia a, i sɔleɔ nɛ Yehowa nɛ wo mi he wami konɛ i kɛ hɛ si kami nɛ tsu níhi a he ní nɛ ma ko pee nɔ́ ko yaya nɛ ma ha nɛ Satan nɛ bɔ Yehowa ahlua. I suɔ kaa ma ha nɛ Yehowa biɛ ɔ he nɛ tsɔ, nɛ i suɔ nɛ ye binyumu ɔ nɛ na e papaa ngɛ Paradeiso ɔ mi ekohu.”​—Abɛ 27:11.

⁹ Anɛ Yehowa bu e sɔlemi ɔ tue lo? Ee. Akɛnɛ e kɛ nyɛmimɛ nyumuhi kɛ yihi bɔɔ he je ɔ, lɔ ɔ wo lɛ he wami. Jeha enuɔ se ɔ, e ya gba asafo mi nɔkɔtɔma ko. Amlɔ nɛ ɔ, e binyumu ɔ ye jeha 20, nɛ e ji nyɛmi nɛ a baptisi lɛ. E de ke: “Ye bua jɔ kaa ye huno ɔ ye bua mi kɛ tsɔse lɛ.”

10. Kɛ Mawu ma plɛ kɛ tsɔ e biɛ ɔ he ha kɛɛ?

¹⁰ Ke Yehowa kpata nihi nɛ a bui lɛ nɛ a sume kaa e ye a nɔ ɔ tsuo a hɛ mi ɔ, e biɛ ɔ he ma tsɔ. (Kane Ezekiel 38:22, 23.) Jamɛ a be ɔ mi ɔ, adesahi maa ye mluku, nɛ nihi tsuo nɛ a ngɛ hiɔwe kɛ zugba a nɔ ɔ ma ja Yehowa, nɛ a maa wo e biɛ klɔuklɔu ɔ hɛ mi nyami. Nyagbenyagbe ɔ, wa Tsɛ nɛ ngɛ suɔmi ɔ “maa ye ní ɔmɛ tsuo a nɔ.”​—1 Korinto Bi 15:28.

“O MATSƐ YEMI Ɔ NƐ BA”

11, 12. Ngɛ jeha 1876 mi ɔ, mɛni Yehowa ye bua e we bi nɛ a le?

¹¹ Loko Yesu maa je kɛ ho hiɔwe ya a, e kaseli ɔmɛ bi lɛ ke: “Nyɔmtsɛ, anɛ kikɛmɛ a be nɛ ɔ mi nɛ o maa kpale ngɔ matsɛ yemi ɔ kɛ ha Israel ɔ lo?” Yesu ha mɛ heto nɛ e tsɔɔ kaa e sui be nɛ a maa le be nɛ Mawu Matsɛ Yemi ɔ ma bɔni nɔ yemi ɔ lolo. E de e kaseli ɔmɛ kaa a ngɔ a juɛmi kɛ ma ní tsumi nɛ he hia nɛ ji fiɛɛmi ní tsumi ɔ nɔ. (Kane Bɔfo Ɔmɛ A Ní Tsumi 1:6-8.) Se e tsɔɔ mɛ kaa a sɔle nɛ Mawu Matsɛ Yemi ɔ nɛ ba nɛ a hyɛ jamɛ a be ɔ blɔ. Enɛ ɔ he nɛ loloolo ɔ, wa sɔleɔ kaa Matsɛ Yemi ɔ nɛ ba a nɛ.

¹² Benɛ e piɛ bɔɔ nɛ Yesu ma bɔni nɔ yemi ngɛ hiɔwe ɔ, Yehowa ye bua e we bi nɛ a le be nɛ enɛ ɔ maa ba. Ngɛ jeha 1876 ɔ mi ɔ, Charles Taze Russell ngma munyu nɛ ji, “Gentile Times: When Do They End?” (Je Ma A Amɛ A Be ɔ: Mɛni Be E Maa Ba Nyagbe?) E tsɔɔ nya kaa “jeha kpaago” aloo be kpaago nɛ a wo ta ngɛ Daniel gbami ɔ mi ɔ kɛ ‘je ma amɛ a be’ nɛ Yesu gba kɛ fɔ si ɔ kɔ. E tsɔɔ ngɛ munyu nɛ e ngma a mi kaa jamɛ a be ɔ maa ba nyagbe ngɛ jeha 1914 ɔ mi.a (Hyɛ sisi ningma.)​—Daniel 4:16; Luka 21:24.

13. Mɛni ya nɔ ngɛ jeha 1914 ɔ mi, nɛ níhi nɛ ngɛ nɔ yae ngɛ je ɔ mi kɛ je jeha 1914 ɔ tsɔɔ mɛni?

¹³ Ngɛ jeha 1914 ɔ mi ɔ, ta te si ngɛ Yuropa, nɛ ngɛ be kpiti mi ɔ, e sã mahi tsuo nɛ ngɛ je ɔ mi ɔ. Ta a ngɔ hwɔ nɛ nya wa kɛ ba. Benɛ ta a ba nyagbe ngɛ jeha 1918 ɔ mi ɔ, gbenɔ hiɔ nɛ ji aja a hu sɛ nimli a kpɛti. E tane nihi a yi pe ta a po. Enɛ ɔmɛ tsuo piɛɛ “okadi” nɛ Yesu kɛ ha a he. Okadi nɛ ɔ ma nɔ mi kaa a wo Yesu Matsɛ ngɛ hiɔwe ngɛ jeha 1914 ɔ mi. (Mateo 24:3-8; Luka 21:10, 11) Ngɛ jamɛ a jeha a mi ɔ, Yesu ‘je kpo kaa kunimi yelɔ nɛ yaa gbe e kunimi yemi ɔ nya.’ (Kpojemi 6:2) Yesu sake Satan kɛ e daimonio ɔmɛ kɛ je hiɔwe ba fɔ zugba a nɔ. Kɛ je lɔ ɔ se ɔ, gbami nɛ nyɛɛ se nɛ ɔ bɔni mi bami: “Je ɔ, kɛ wo, nyɛɛ lɛɛ musu tloo nyɛ! Abosiami kple si kɛ ba nyɛ ngɔ. E mi mi fu wawɛɛ, ejakaa e le kaa be bɔɔ kɛkɛ nɛ piɛ ha lɛ.”​—Kpojemi 12:7-12.

14. (a) Mɛni he je nɛ loloolo ɔ wa sɔleɔ kaa Mawu Matsɛ Yemi ɔ nɛ ba a? (b) Mɛni ní tsumi nɛ he hia lɛ e sa kaa wa tsu amlɔ nɛ ɔ?

¹⁴ Gbami nɛ ngɛ Kpojemi yi 12 ɔ, ye bua wɔ nɛ wa le nɔ́ he je nɛ kɛ je benɛ a wo Yesu Matsɛ ngɛ Mawu Matsɛ Yemi ɔ nya a, ní gbeyegbeyehi ngɛ nɔ yae ngɛ je ɔ mi ɔ. E ngɛ mi kaa Yesu ngɛ nɔ yee ngɛ hiɔwe mohu lɛɛ, se loloolo ɔ, Satan ngɛ zugba a nɔ yee. Se e be kɛe kulaa nɛ Yesu ‘maa gbe e kunimi yemi ɔ nya’ nɛ e maa po ní yayahi tsuo a se ngɛ zugba a nɔ. Se loko jamɛ a be ɔ maa su ɔ, e he hia nɛ waa ya nɔ nɛ waa sɔle konɛ Mawu Matsɛ Yemi ɔ nɛ ba, nɛ waa kɛ wa he hu nɛ wo Matsɛ Yemi fiɛɛmi ní tsumi ɔ mi vii. Wa fiɛɛmi ní tsumi ɔ ha nɛ Yesu gbami nɛ nyɛɛ se nɛ ɔ ngɛ mi bae: “Sane kpakpa nɛ ɔ nɛ kɔɔ matsɛ yemi ɔ he ɔ, a maa fiɛɛ kɛ kpa je ɔ mi tsuo, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.”​—Mateo 24:14.

“A PEE NƆ́ NƐ O SUƆ NGƐ ZUGBA A NƆ”

15, 16. Ke wa sɔleɔ kaa a pee Mawu suɔmi nya ní ngɛ zugba a nɔ ɔ, mɛni hu lɛ e sa nɛ waa pee?

¹⁵ Jinɛ maa pee jeha 6,000 nɛ be ɔ, a peeɔ Mawu suɔmi nya ní ngɛ zugba a nɔ. Lɔ ɔ he je nɛ benɛ Yehowa na nɔ́ tsuaa nɔ́ nɛ e pee ɔ, e “muɔ e hɛ saminya” a nɛ. (1 Mose 1:31) Pee se ɔ, Satan tsɔ Mawu hɛ mi atua, nɛ kɛ je jamɛ a be ɔ mi kɛ ma nɛ ɔ, nihi fuu pee we Mawu suɔmi nya ní hu. Se mwɔnɛ ɔ, nihi maa pee ayɔ kpaanyɔ ngɛ Yehowa sɔmɔe. A sɔleɔ kaa a pee Mawu suɔmi nya ní ngɛ zugba a nɔ, nɛ mɛ nitsɛmɛ hu a peeɔ Mawu suɔmi nya ní. A je mi bami saa Mawu hɛ mi, nɛ a kɛ kã fiɛɛɔ Mawu Matsɛ Yemi ɔ he sane ɔ kɛ tsɔɔ nihi.

¹⁶ Kaa nɔ hyɛmi nɔ́ ɔ, nyɛmiyo ko nɛ e ji ma se sane kpakpa fiɛɛlɔ ngɛ Afrika nɛ e ye jeha 80 nɛ a baptisi lɛ ngɛ 1948 ɔ mi ɔ de ke: “Behi fuu ɔ, i sɔleɔ kaa wa nine nɛ su nihi nɛ a ngɛ kaa jijɔhi ɔ a nɔ, nɛ waa ye bua mɛ nɛ a ba le Yehowa loko be nɛ be. Jehanɛ se hu ɔ, ke i yaa ye nɔ ko odase ɔ, i sɔleɔ konɛ Mawu nɛ ha mi juɛmi konɛ ye munyu ɔ nɛ sɛ nɔ ɔ tsui mi. Nɛ ngɛ nihi nɛ a ngɛ kaa jijɔhi nɛ wa nine su a nɔ momo ɔ a blɔ fa mi ɔ, i sɔleɔ kaa Yehowa nɛ jɔɔ mɔde nɛ wa ngɛ bɔe kaa wa maa ye bua mɛ ɔ nɔ saminya.” Nyɛmiyo nɔkɔtɔma nɛ ɔ ye bua nihi fuu nɛ a ba le Yehowa. Anɛ o le ni komɛ nɛ a wa ngɛ jeha mi nɛ mɛ hu a kɛ kã ngɛ Yehowa suɔmi nya ní pee lo?​—Kane Filipi Bi 2:17.

17. Kɛ níhi nɛ Yehowa maa pee hwɔɔ se kɛ ha adesahi ngɛ zugba a nɔ ɔ haa nɛ o peeɔ o ní ha kɛɛ?

¹⁷ Wa maa ya nɔ maa sɔle kaa a pee Mawu suɔmi nya ní ngɛ zugba a nɔ hluu kɛ yaa si benɛ Yehowa ma kpata e hɛ nyɛli tsuo a hɛ mi ngɛ zugba a nɔ. Kɛkɛ ɔ, zugba a maa pee paradeiso, nɛ a ma tle nimli ayɔ akpehi abɔ si kɛ ba zugba a nɔ. Yesu tsɔɔ kaa “be maa su nɛ gbogboehi tsuo maa nu Mawu Bi ɔ gbi, nɛ a maa je kpo kɛ je a yɔkɔ ɔmɛ a mi.” (Yohane 5:28, 29) Hyɛ bua jɔmi nɛ wa ma ná ke wa ngɛ wa suɔli nɛ a gbo nɛ a tle mɛ si ɔ a he nyae! Mawu ‘ma tsu wa hɛ mi vo nyu tsuo.’ (Kpojemi 21:4) Nihi nɛ a ma tle mɛ si ɔ, a kpɛti nihi fuu ji “yayami peeli” aloo nihi nɛ a dɛ. A nui Yehowa kɛ Yesu he anɔkuale ɔ hyɛ. Waa kɛ bua jɔmi maa tsɔɔ mɛ Mawu suɔmi nya ní konɛ a pee nɛ a ná “neneene wami.”​—Bɔfo Ɔmɛ A Ní Tsumi 24:15; Yohane 17:3.

18. Mɛni ji adesahi a hiami níhi titli?

¹⁸ Ke Mawu Matsɛ Yemi ɔ ba a, e ma tsɔ Mawu biɛ ɔ he, nɛ nɔ tsuaa nɔ nɛ ngɛ hiɔwe kɛ zugba a nɔ ɔ maa pee kake kɛ ja Yehowa. Adesahi a hiami níhi titli ji kekleekle ní bimi etɛ nɛ ngɛ sɔlemi he nɔ hyɛmi nɔ́ ɔ mi ɔ nɛ. Lɔ ɔ he ɔ, ke Mawu ha jamɛ a ní bimi etɛ ɔmɛ a heto ɔ, lɔ ɔ tsɔɔ kaa e tsu adesahi a hiami ní titli ɔmɛ a he ní ha mɛ. Ngɛ munyu nɛ nyɛɛ enɛ ɔ se ɔ mi ɔ, wa ma susu ní kpahi nɛ a he hia nɛ Yesu tsɔɔ kaa waa sɔle kɛ bi ɔ a he.