“Mɛni He Je Nɛ Mawu Pee We Nɔ́ Ko ɔ?”
“I BIƆ KE: MƐNI HE JE NƐ MAWU PEE WE NƆ́ KO Ɔ?”—Pope Benedict XVI lɛ tu munyu nɛ ɔ benɛ e ya slaa nya tsimi he ko nɛ a waa nihi yi mi ngɛ be ko nɛ be ɔ ngɛ Auschwitz, Poland.
KE OSLAAHI BA A, ANƐ O BIƆ KE, ‘JIJE MAWU NGƐ LO?’ ALOO MO NITSƐ O KƐ NYAGBA KO KPE NGƐ O SI HIMI MI, NƐ O BI HYƐ KAA MAWU SUSUƆ O HE NIINƐ LO?
Eko ɔ, o nu he kaa bɔ nɛ Sheila nɛ e ngɛ United States ɔ nu he ɔ. A tsɔse lɛ ngɛ weku ko nɛ a kɛ Mawu jami fiɛ we kulaa a mi. E de ke: “Kɛ je ye jokuɛ mi tɔɔ nɛ i ná suɔmi kɛ ha Mawu ejakaa lɛ ji wa Bɔlɔ. Se kɛ̃ ɔ, huɛ bɔmi ko be i kɛ lɛ wa kpɛti. I kɛ Mawu wa kpɛti kɛ, se i le kaa e ngɛ mi hyɛe. I le kaa e nyɛ́ mi mohu lɛɛ, se i he we yi kaa e susuɔ ye he.” Mɛni he je nɛ Sheila yi mi pee lɛ enyɔɔnyɔ ɔ? E de ke: “Ye weku ɔ kɛ haomihi kpe nɔtonɔto, nɛ e ngɛ kaa nɔ́ nɛ Mawu pee we wa haomi ɔmɛ a he nɔ́ ko.”
Kaa bɔ nɛ e ji ngɛ Sheila blɔ fami ɔ, eko ɔ, o he ye kaa Mawu Ope ɔ ngɛ. Se kɛ̃ ɔ, o ma bi ke ji e susuɔ o he niinɛ lo. Anɔkualetsɛ Hiob, nɛ e ngɛ hemi kɛ yemi ngɛ Bɔlɔ ɔ mi, nɛ e he ye kaa Mawu ngɛ he wami kɛ nile ɔ po yi mi pee lɛ enyɔɔnyɔ. (Hiob 2:3; 9:4) Benɛ Hiob kɛ haomi kpe nɔtonɔto nɛ e hɛ nɔ kami tsuo ta a, e bi Mawu ke: “Mɛni he je o kɛ o hɛ mi laa mi ɔ? Mɛni he je o kɛ mi ngɛ ní toe kaa o he nyɛlɔ ɔ?”—Hiob 13:24.
Mɛni Baiblo ɔ de? Anɛ ke oslaa ko ba a, Mawu nɛ e sa nɛ wa pia lo? Anɛ odase yemi ko ngɛ nɛ tsɔɔ kaa Mawu susuɔ adesahi tsuo kɛ wa kpɛti nɔ fɛɛ nɔ he niinɛ lo? Ke o hyɛ ɔ, wa ti nɔ ko ma nyɛ maa de kɛ nɔ mi mami kaa Mawu toɔ wa he hɛ, e nuɔ wɔ sisi, e nuɔ nɔ́ he ha wɔ, nɛ e yeɔ bua wɔ ngɛ haomihi behi a mi lo?
Ngɛ munyuhi nɛ nyɛɛ se ɔ mi ɔ, wa ma susu bɔ nɛ adebɔ níhi maa nɔ mi ha wɔ kaa Mawu susuɔ wa he ɔ he. (Roma Bi 1:20) Lɔ ɔ se ɔ, wa ma susu Baiblo ɔ mi munyuhi nɛ tsɔɔ kaa Mawu susuɔ wa he ɔ he. Ke o ‘ba le Mawu’ kɛ gu níhi nɛ e bɔ kɛ e Munyu ɔ nɔ ɔ, o ma ná nɔ mi mami kaa ‘e susuɔ o he.’—1 Yohane 2:3; 1 Petro 5:7.