Mɛni Nike Ní Wa Ma Nyɛ Ma Ha Yehowa?

BE KO Ɔ, Yesu de ke: “Bua jɔmi babauu ngɛ nɔ́ hami mi pe nɔ́ ngɔmi.” (Níts. 20:35) Anɔkuale munyu nɛ ɔ kɔɔ huɛ bɔmi nɛ ngɛ waa kɛ Yehowa wa kpɛti ɔ he. Ngɛ mɛni blɔ nɔ? Yehowa ha wɔ nike níhi fuu nɛ haa nɛ wa náa bua jɔmi. Se ke wa ke Yehowa ní ɔ, wa ma nyɛ ma ná bua jɔmi babauu pe jã. Mɛni nike ní wa ma nyɛ ma ha Yehowa? Baiblo ɔ de ke: “Ngɔɔ o níhi nɛ a he jua wa a kɛ wo Yehowa hɛ mi nyami.” (Abɛ 3:9, NW) Wa “níhi nɛ a he jua wa” a ekomɛ ji wa be, níhi nɛ wa le peemi, wa he wami, kɛ wa he lo nya níhi. Ke wa ngɔ ní nɛ ɔmɛ kɛ fĩ anɔkuale jami se ɔ, lɔ ɔ tsɔɔ kaa wa ke Yehowa ní, nɛ wa ma ná bua jɔmi babauu.

Mɛni maa ye bua wɔ konɛ wa hɛ ko je nɔ kaa wa maa ngɔ he lo nya níhi nɛ wa ngɛ ɔ kɛ ke Yehowa? Bɔfo Paulo de Korinto asafo ɔ ke a “je nɔ́ ko ngɔ to” nɛ a kɛ ye bua. (1 Kor. 16:2) Ke o suɔ nɛ o le níhi fuu kɛ kɔ blɔ slɔɔtohi nɛ o ma nyɛ maa gu nɔ kɛ ha yemi kɛ buami ngɛ he nɛ o ngɛ ɔ, mɛni o ma nyɛ maa pee? Wa kpa mo pɛɛ nɛ o hyɛ daka nɛ ngɛ sisi ɔ.

Tsa pi mahi tsuo nɛ blɔ nya tomi nɛ ɔ tsuɔ ní ngɛ mi. Se ke o ya donations blɔ he ɔ ngɛ wa wɛbsaiti ɔ nɔ ɔ, a tsɔɔ blɔ kpahi nɛ nihi ma nyɛ maa gu nɔ kɛ ha yemi kɛ buami. Ngɛ ma komɛ a nɔ ɔ, a ha sanehi nɛ nihi pɔɔ bimi ngɛ yemi buami he ɔ a heto ngɛ wɛbsaiti nɛ ɔ nɔ.