Níhi nɛ Mawu bɔ ɔ tsuo pee kake, nɛ a ná tue mi jɔmi ngɛ e nɔ yemi ɔ sisi

Mɛni He Je Nɛ Wa Hia Mawu Matsɛ Yemi ɔ?

Sisije ɔ, benɛ a bɔ Adam kɛ Hawa a, wa Bɔlɔ nɛ e biɛ ji Yehowa a pɛ ji Nɔ Yelɔ. E je suɔmi mi kɛ ye a nɔ. E pee abɔɔ ko nɛ ngɛ fɛu ngɛ Eden nɛ e ngɔ kɛ ha adesahi kaa a we. Nɛ e ha mɛ niye ní babauu. Jehanɛ se hu ɔ, e ngɔ ní tsumi nɛ ngɛ bua jɔmi kɛ wo a dɛ. (1 Mose 1:28, 29; 2:8, 15) Kaa adesahi ya nɔ nɛ a hi Mawu nɔ yemi ɔ sisi ɔ, jinɛ a ko ná tue mi jɔmi.

Adam nɛ e hɛɛ tso yiblii ɔ nɛ a de mɛ ke a ko ye ɔ nɛ Hawa kɛ ha lɛ ɔ. — Adam kɛ Hawa kua Mawu kaa a Nɔ Yelɔ

Baiblo ɔ tsɔɔ kaa bɔfo atuã tsɔlɔ ko, nɛ́ pee se ɔ a ba le lɛ kaa Satan Abosiami ɔ te si kɛ wo he blɔ nɛ Mawu ngɛ kaa lɛ ji nɔ nɛ sa kaa e ye adesahi a nɔ ɔ. E tsɔɔ kaa adesahi ma ná bua jɔmi ke a be Mawu nɔ yemi kɛ e blɔ tsɔɔmi sisi. Aywilɛho sane ji kaa, Adam kɛ Hawa ya bu Satan lakpa munyu ɔ tue, nɛ a te si kɛ wo Mawu.—1 Mose 3:1-6; Kpo Jemi 12:9.

Akɛnɛ Adam kɛ Hawa kua Mawu kaa a Nɔ Yelɔ he je ɔ, Paradeiso ɔ je a dɛ, nɛ he blɔ nɛ a ná kaa a maa hi si kɛ ya neneene nɛ a be hiɔ nue ɔ hu bɔ mɛ. (1 Mose 3:17-19) Jehanɛ se hu ɔ, yi mi kpɔ nɛ a mwɔ ɔ ye bimɛ nɛ a ba fɔ ɔ awi. Baiblo ɔ tsɔɔ kaa akɛnɛ Adam pee yayami he je ɔ, “yayami ba je ɔ mi, nɛ gbenɔ gu yayami nɔ kɛ ba.” (Roma Bi 5:12) Yayami nɛ ɔ nɔuu ngɔ nyagba kpa ko kɛ ba, nɛ lɔ ɔ ji kaa “ni komɛ ngɔɔ blɔ nya nɛ a na a kɛ yeɔ a nyɛmimɛ awi.” (Fiɛlɔ 8:9) Enɛ ɔ tsɔɔ kaa ke adesahi ye mɛ nitsɛmɛ a he nɔ ɔ, e kɛ nyagbahi lɛ maa ba.

ADESAHI BƆNI NƆ YEMI

Nimrod he nɔ wolɔ nɛ e daa si. Ngɛ e se ɔ, nihi ngɛ tsu ko mae. — Nimrod te si kɛ si Yehowa

Nɔ kekleekle nɛ e ye nɔ ngɛ zugba a nɔ nɛ Baiblo ɔ wo e biɛ ta ji Nimrod. Nɛ e te si kɛ si he blɔ nɛ Yehowa ngɛ kaa e yeɔ adesahi a nɔ ɔ. Kɛ je Nimrod be ɔ mi kɛ ba si amlɔ nɛ ɔ, adesahi ngɔɔ blɔ nya nɛ a ngɛ ɔ kɛ yeɔ ni kpahi awi. Maa pee jeha 3,000 ji nɛ ɔ, Matsɛ Salomo ngma ke: “Nɔ́ nali ngɛ ya foe, nɛ nɔ ko be nɛ maa jɔɔ a bua. Bua wolɔ ko be mɛ, ejakaa nihi nɛ ngɛ mɛ yi mi wae ɔ, he wami ngɛ a dɛ.”—Fiɛlɔ 4:1.

Jã nɔuu nɛ níhi ngɛ nɔ yae kɛ ba si mwɔnɛ ɔ. Ngɛ jeha 2009 ɔ mi ɔ, Je Mahi A Kake Peemi Kuu ɔ womi ko de ke, nɔ yeli nɛ a nyɛ we nɛ a kudɔ níhi saminya a ji “nɔ́ kake nɛ haa nɛ ní yayamihi ngɛ nɔ yae ngɛ je ɔ mi.”

BE SU KƐ HA TSAKEMI!

Adesahi hia nɔ yeli kpakpahi kɛ nɔ yemi kpakpa. Nɛ enɛ ɔ ji nɔ́ nɛ wa Bɔlɔ ɔ wo he si ɔ nɛ!

Foto: Níhi nɛ jeɔ adesa nɔ yemi mi kɛ baa. 1. Asia yo ko nɛ e hii si ngɛ he ko nɛ sɛ mu nɛ e wo e bi nɛ ngɛ ya foe ɔ. 2. Nyumu nɔkɔtɔma ko nɛ e be he wami nɛ e ngɛ hiɔ sa nɔ. 3. Ta buli nɛ a ngɛ tu fiae be mi nɛ a ngɛ ta hwue. 4. Nihi nɛ a ngɛ basabasa pee nɛ a ngɛ huhui kpae, nɛ a hɛɛ níhi ngɛ a dɛ mi. 5. Yo ko kɛ e biyo nɛ a daa si ngɛ a tsu se nɛ a na kaa glaasi nɛ ngɛ a sinya a nya a ywia. 6. Ma ngua ko nɛ e nɔ pee kɛ la su ku kɛ níhi nɛ la su ku guɔ mi kɛ jeɔ kpo kɛ electricity kpahi. — Nɔ yeli nɛ a bɔ mɔde wawɛɛ ɔ po nyɛ we nɛ a tsu nyagbahi nɛ a mi wa nɛ adesahi kɛ kpe ɔmɛ a he ní

Mawu to Matsɛ Yemi ko sisi nɛ́ e ma kpata adesa nɔ yemihi tsuo a hɛ mi, nɛ “e maa hi si kɛ maa ya neneene.” (Daniel 2:44) Matsɛ Yemi nɛ ɔ ji nɔ́ nɛ nimli ayɔhi abɔ sɔleɔ kaa e ba a nɛ. (Mateo 6:9, 10) Se pi Mawu nitsɛ nɛ e maa ye nɔ ngɛ Matsɛ Yemi nɛ ɔ nya. Mohu ɔ, e hla nɔ ko nɛ́ e ba hi si hyɛ kaa adesa konɛ e pee Nɔ Yelɔ. Mɛnɔ nɛ Mawu hla a?