Mo Fĩ Mawu Matsɛ Yemi ɔ Se Piɔ!
Moo ngɔ lɛ kaa ahumi aloo kɔɔhiɔ ko nɛ nya wa ngɛ fiae kɛ ma o kpɔ ɔ mi he nɛ o ngɛ ɔ. Nɛ ma nikɔtɔma amɛ kɛ hɛdɔ ngɛ nihi nɛ a ngɛ lejɛ ɔ tsuo dee ke: “NYƐƐ JE ESƆ! NYƐ YA HLA HE KO NƐ NGƐ SLƆKEE!” Mɛni e sa kaa o pee? Nɔ́ jemi ko be he kaa, o maa tu fo kɛ ya he ko nɛ ngɛ slɔkee.
Ngɛ anɔkuale mi ɔ, e be kɛe nɛ waa kɛ si fɔfɔɛ ko nɛ ngɛ kaa “ahumi aloo kɔɔhiɔ nɛ nya wa” maa kpe. Lɔ ɔ ji “amanehlu ngua” a nɛ Yesu tu he munyu ɔ nɛ. (Mateo 24:21) Wa be nyɛe maa tu amanehlu nɛ ma a nya fo. Se nɔ́ ko ngɛ nɛ wa ma nyɛ maa pee konɛ wa ná he piɛ pomi. Mɛni wa maa pee?
Ngɛ Yesu Kristo Yoku ɔ Nɔ Fiɛɛmi ɔ mi ɔ, e de ke: “Enɛ ɔ he ɔ, nyɛɛ ya nɔ nɛ nyɛ hla [Mawu] Matsɛ Yemi ɔ kɛ níhi nɛ da ngɛ Mawu hɛ mi ɔ kekle.” (Mateo 6:33) Mɛni blɔ nɔ wa maa gu kɛ pee jã?
Hla Mawu Matsɛ Yemi ɔ kekle. Enɛ ɔ tsɔɔ kaa e sa nɛ waa na Mawu Matsɛ Yemi ɔ kaa e he hia pe nɔ́ fɛɛ nɔ́ ngɛ wa si himi mi. (Mateo 6:25, 32, 33) Mɛni he je nɛ e sa nɛ waa na lɛ jã a? Ejakaa adesahi nyɛ we nɛ a tsu nyagbahi nɛ a kɛ ngɛ kpee ɔmɛ a he ní. Mawu Matsɛ Yemi ɔ pɛ lɛ ma nyɛ ma tsu adesahi a nyagbahi a he ní.
Hla níhi nɛ da ngɛ Mawu hɛ mi ɔ. E sa nɛ waa bɔ mɔde kaa waa kɛ mlaahi kɛ sisi tomi mlaahi nɛ Mawu wo ɔ ma tsu ní ngɛ wa si himi mi. Mɛni he je? Ejakaa ke wɔ nitsɛmɛ wa mwɔ wa yi mi kpɔ ngɛ nɔ́ nɛ da kɛ nɔ́ nɛ dɛ he ɔ, lɛɛ waa kɛ nyagbahi fuu maa kpe. (Abɛ 16:25) Se ke waa kɛ mlaahi nɛ Mawu wo ɔmɛ tsu ní ɔ, e bua maa jɔ, nɛ wɔ nitsɛmɛ hu wa ma ná si himi kpakpa.—Yesaya 48:17, 18.
Yaa nɔ nɛ o hla Mawu Matsɛ Yemi ɔ kɛ níhi nɛ da ngɛ e hɛ mi ɔ kekle. Yesu de kaa ní komɛ ma je nihi a juɛmi kɛ je Mawu nɔ, nɛ a ma susu kaa ke a ná sika fuu ɔ, lɔ ɔ ma ha nɛ a maa hi si slɔkee. Ngɛ ni komɛ hu a blɔ fami ɔ, a maa bɔ mɔde kaa a maa ngɔ a be kɛ a he wami tsuo kɛ tsu si himi ɔ mi nyagbahi a he ní, nɛ enɛ ɔ be hae nɛ a ná be kulaa kɛ hla Mawu Matsɛ Yemi ɔ.—Mateo 6:19-21, 25-32.
Se kɛ̃ ɔ, Yesu wo si kaa nihi nɛ a fĩɔ Mawu Matsɛ Yemi ɔ se ɔ ma ná a hiami níhi amlɔ nɛ ɔ, nɛ a ma ná jɔɔmihi hwɔɔ se kɛ ya neneene.—Mateo 6:33.
E ngɛ mi kaa Yesu kaseli ɔmɛ nɛ a hi si blema a hla Mawu Matsɛ Yemi ɔ kɛ níhi nɛ da ngɛ Mawu hɛ mi ɔ kekle mohu lɛɛ, se mɛ hu a kɛ haomihi kpe ngɛ a si himi mi. Se a ná he piɛ pomi. Ngɛ mɛni blɔ nɔ?
A kɛ Mawu sisi tomi mlaa amɛ tsu ní, nɛ lɔ ɔ po a he piɛ, nɛ haomihi nɛ baa nihi nɛ a bui Mawu tue ɔ a nɔ ɔ bɛ a nɔ. Hemi kɛ yemi nɛ Yesu kaseli ɔmɛ ná kaa Matsɛ Yemi ɔ maa ba a ye bua mɛ nɛ a nyɛ da nyagbahi nɛ a mi wa nɛ a kɛ kpe ɔmɛ a nya. Jehanɛ se hu ɔ, Mawu ha mɛ “he wami nɛ pe adesahi a nɔ́ ɔ,” konɛ a nyɛ nɛ a da nyagbahi nɛ a kɛ kpe ɔmɛ a nya.—2 Korinto Bi 4:7-9.
ANƐ O MA HLA MAWU MATSƐ YEMI Ɔ KEKLE LO?
Kristofohi nɛ a hi si ngɛ kaseli ɔmɛ a be ɔ mi ɔ bu Yesu fami ɔ tue nɛ a hla Matsɛ Yemi ɔ kekle. A fiɛɛ Matsɛ Yemi ɔ he sane kpakpa a kɛ kpa he fɛɛ he ngɛ a be ɔ mi. (Kolose Bi 1:23) Anɛ ni komɛ ngɛ nɛ mɛ hu a ngɛ jã pee mwɔnɛ ɔ lo?
Ee! Yehowa Odasefohi yɔse kaa be nɛ Mawu Matsɛ Yemi ɔ kɛ ma ba kpata je nɛ ɔ hɛ mi ɔ su si ta. Enɛ ɔ he ɔ, a ngɔɔ a he wami tsuo kɛ tsuɔ ní tsumi nɛ Yesu de ke a ma tsu ɔ. Yesu de ke: “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ hehi tsuo nɛ nimli ngɛ ɔ nɛ a kɛ maa ye je ma amɛ tsuo odase, nɛ lɔ ɔ se loko nyagbe ɔ maa ba.”—Mateo 24:14.
Kɛ o maa pee o ní ngɛ sane kpakpa a nɛ a ngɛ fiɛɛe ɔ he ha kɛɛ? Wa ngɛ mo he wami woe konɛ o kase Beroya bi ɔmɛ nɛ a hi Makedonia ngɛ kaseli ɔmɛ a be ɔ mi ɔ a nɔ hyɛmi nɔ́ ɔ. Benɛ a nu sane kpakpa a nɛ kɔɔ Matsɛ Yemi ɔ he nɛ bɔfo Paulo fiɛɛ kɛ ha mɛ ɔ, a “kɛ a juɛmi tsuo” kplɛɛ sɛ gbi ɔ nɔ. Lɔ ɔ se ɔ, a ‘kpa Ngmami ɔ mi saminya’ konɛ a ná nɔ mi mami kaa níhi nɛ bɔfo Paulo tsɔɔ mɛ ɔ ji anɔkuale. Nɛ a kɛ nɔ́ nɛ a kase ɔ tsu ní.—Ní Tsumi 17:11, 12.
Mo hu o ma nyɛ maa pee jã. Ke o hla Mawu Matsɛ Yemi ɔ kɛ níhi nɛ da ngɛ Mawu hɛ mi ɔ kekle ɔ, o ma ná he piɛ pomi amlɔ nɛ ɔ, nɛ o ma ná tue mi jɔmi kɛ slɔkee si himi hwɔɔ se.