Anɔkuale Nɛ Kɔɔ Mawu Matsɛ Yemi ɔ He
Yesu tsɔɔ e se nyɛɛli ɔmɛ kaa a sɔle ke: “Wa Tsɛ nɛ o ngɛ hiɔwe, ha nɛ o biɛ ɔ he nɛ tsɔ. Ha nɛ o Matsɛ Yemi ɔ nɛ ba. Ha nɛ a pee o suɔmi nya ní ngɛ zugba a nɔ kaa bɔ nɛ a peeɔ ngɛ hiɔwe ɔ.” (Mateo 6:9, 10) Mɛni ji Mawu Matsɛ Yemi ɔ? Mɛni Mawu Matsɛ Yemi ɔ ngɛ pee? Nɛ mɛni he je nɛ e sa nɛ waa sɔle konɛ e ba a?
Yesu ji Mawu Matsɛ Yemi ɔ nya Matsɛ.
Luka 1:31-33: “O maa wo lɛ biɛ ke Yesu. E ma ba pee nɔmlɔ ngua, nɛ a ma tsɛ lɛ ke Hiɔwe Lokoo No ɔ Bi, nɛ Yehowa Mawu maa ngɔ e tsɛ David matsɛ sɛ ɔ kɛ ha lɛ, nɛ e maa ye Yakɔb we ɔ nɔ Matsɛ kɛ maa ya neneene, nɛ e Matsɛ Yemi ɔ se be poe.”
Matsɛ Yemi ɔ ji nɔ́ titli nɛ Yesu tu he munyu ngɛ e fiɛɛmi ní tsumi ɔ mi.
Mateo 9:35: “Yesu ya kpa ma amɛ kɛ kɔpe ɔmɛ tsuo a mi nɛ e tsɔɔ ní ngɛ a kpe he ɔmɛ, nɛ e fiɛɛ Matsɛ Yemi ɔ he sane kpakpa a, nɛ e tsa hiɔ slɔɔtohi kɛ gbɔjɔmi slɔɔtohi ngɛ nihi a he.”
Yesu tsɔɔ e kaseli ɔmɛ okadi nɛ ma ha nɛ a le kaa Matsɛ Yemi ɔ su si ta.
Mateo 24:7: “Ejakaa ma maa te si ngɔ wo ma nɛ matsɛ yemi maa te si ngɔ wo matsɛ yemi, nɛ hwɔ maa ba, nɛ zugba ma mimiɛɛ ngɛ he slɔɔtohi.”
Yesu se nyɛɛli nɛ a ngɛ mwɔnɛ ɔ ngɛ Matsɛ Yemi sɛ gbi ɔ fiɛɛe ngɛ je kɛ wɛ.
Mateo 24:14: “Nɛ sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ hehi tsuo nɛ nimli ngɛ ɔ nɛ a kɛ maa ye je ma amɛ tsuo odase, nɛ lɔ ɔ se loko nyagbe ɔ maa ba.”