Nyɛ Dla Nyɛ He Saminya Kɛ To Kaimi ɔ Yemi
E ji bua jɔmi kɛ he blɔ kaa Kristo se nyɛɛli ma dla a he saminya daa jeha kɛ to gbɔkuɛ nɛ a ma kai Yesu Kristo gbenɔ ɔ! (Luka 22:19) Mɛni ji ní komɛ nɛ sa kaa waa pee kɛ dla níhi kɛ to Kaimi ɔ?
◼ Be Nɛ A Maa Pee Kɛ He Nɛ A Maa Pee Ngɛ: E sa kaa nɔ tsuaa nɔ nɛ le be nɛ a maa pee Kaimi ɔ kɛ he tutuutu nɛ a maa pee ngɛ. Ke asafo pe kake maa pee Kaimi ɔ ngɛ Matsɛ Yemi Asa kake nɔ ɔ, e hia kaa nyɛmimɛ nɛ ba su si ngɛ be nɔ, nɛ ke a kpa hu a je kpo mla konɛ a ko tsi nyɛmimɛ kpa amɛ blɔ, ejakaa be bɔɔ pɛ nɛ ngɛ blɔ nya tomi enyɔ ɔmɛ a kpɛti. Nyɛɛ bɔ mɔde nɛ nyɛ ko tsi blɔ ngɛ sinya amɛ a nya, ablanaa amɛ a nɔ, lɔle da he ɔmɛ, kɛ he nɛ nihi guu.
◼ Nine Fɔmi Womi Ɔmɛ: Anɛ fiɛɛli tsuo ná nine fɔmi womi ɔmɛ eko lo, nɛ a le nɔ́ nɛ ngɛ mi lo? Anɛ nyɛ nylɔ nɔ́ nɛ nyɛ ma de loko nyɛ ma kɛ ha nihi ɔ mi lo? Mɛnɔ nine nyɛ maa fɔ? Nyɛɛ bɔ mɔde kaa nyɛ ma gba nine fɔmi womi ɔmɛ tsuo.
◼ Lɔle Sɛmi: Eko ɔ, nihi nɛ ngɛ munyu ɔ he bua jɔmi kɛ nyɛmimɛ komɛ maa hia yemi kɛ buami ngɛ lɔle blɔ fa mi loo yemi kɛ buami ngɛ blɔ kpa ko nɔ. Mɛni blɔ nya nyɛ to konɛ nyɛ kɛ ye bua mɛ?
◼ Abolo Kɛ Wai ɔ: Nyɛɛ hyɛ nɛ a ko ngɔ abolo kɛ wai ɔ kɛ be ngɛ tue buli ɔmɛ a hɛ mi kɛ ya si benɛ pu maa nɔ si. Ke nɔ ko nɛ a pɔ lɛ nu ngɛ asafo ɔ mi, se e be nyɛe maa ba ejakaa e be nɔmlɔtso mi he wami ɔ, e sa nɛ a ya ha lɛ eko ngɛ we mi. E sa kaa a ná abolo kɛ wai nɛ sa, nɛ a ngɔ abolo ɔ kɛ wo plɛɛtehi nɛ sa mi, nɛ wai ɔ hu a plɛ kɛ wo kpluhi nɛ sa mi loko blɔ nya tomi ɔ nɛ je sisi.—Hyɛ February 15, 2003, Watchtower, bafa 14-15, kuku 14 kɛ 17.
◼ Matsɛ Yemi Asa a: E sa nɛ a dla Matsɛ Yemi Asa a nɔ nyaii loko be ɔ nɛ su. A ngɔ plɛɛtehi, wai kpluhi, okplɔɔ kɛ okplɔɔ nɔ hami bo nɛ sa kɛ ba asa a nɔ, nɛ a to a he blɔ nya kɛ fɔ si loko kpe ɔ nɛ je sisi. Ke a maa pee Kaimi ɔ ngɛ he kpa ko ɔ, e sa nɛ a ngɔ klama nɛ a tuɔ munyu kɛ guu nɔ kɛ tsu ní, bɔnɛ pee nɛ nɔ tsuaa nɔ nɛ nu munyu ɔ saminya. E sa kaa a hla nibwɔhi a kpeeli kɛ nihi nɛ maa ngɔ Kaimi ní ɔmɛ kɛ ha tue buli, nɛ́ a tsɔɔ mɛ níhi nɛ a ma tsu ɔ fitsofitso, kɛ bɔnɛ sa kaa a dla a he ha.
Wa suɔ kaa wɔ tsuo wa dla wa he saminya kaa ni kakaakahi, kɛ kaa asafo kɛ to gbijlɔ nɛ he hia pe kulaa nɛ ji Yesu Kristo gbenɔ Kaimi ɔ. Atsinyɛ jemi ko be he kaa Yehowa maa jɔɔ nihi tsuo nɛ je a tsui mi nɛ a je bua jɔmi kpo ngɛ níhi tsuo nɛ Yehowa gu e suɔmi Bi Yesu Kristo afɔle sami ɔ nɔ nɛ e pee ha adesahi ɔ he.