Anɛ O Ngɛ O He Dlae Kɛ Ha Kaimi ɔ Lo?

Ngɛ jeha 33, Nisan 13 ɔ nɔ benɛ e piɛ gbɔkuɛ kake pɛ nɛ a maa gbe Yesu ɔ, e na kaa e sa nɛ e ná be kɛ ha e kaseli ɔmɛ. E kɛ mɛ maa ye e nyagbe Hetsɔmi ɔ, nɛ lɔ ɔ se ɔ, e maa to gbijlɔ ehe nɛ ji Nyɔmtsɛ ɔ Gbɔkuɛ Niye Ní ɔ sisi. E ma bi nɛ a dla a he saminya kɛ ha gbijlɔ nɛ he hia pe kulaa nɛ ɔ yemi. Enɛ ɔ he ɔ, e tsɔ Petro kɛ Yohane kaa a ya to blɔ nya kɛ ha gbijlɔ ɔ yemi. (Luka 22:7-13) Kɛ je jamɛ a be ɔ mi kɛ ma nɛ ɔ, daa jeha a, Kristofohi nɛ a suɔ kaa a maa ye Kaimi ɔ dlaa a he saminya. (Luka 22:19) Mɛni ji níhi nɛ e sa nɛ waa pee kɛ dla wa he kɛ ha Kaimi nɛ wa maa ye ngɛ April 3 nɔ ɔ?

Níhi Nɛ Asafo Mi Nikɔtɔmahi Maa Pee Kɛ Dla A He:

Nyɛɛ to blɔ nya konɛ nyɛɛ ye Kaimi ɔ ngɛ Matsɛ Yemi Asa a nɔ loo he kpa ko nɛ sa. Nyɛ ná sɛhi nɛ hiɛ bɔ nɛ sa, nɛ nyɛɛ hyɛ kaa kane, kɛ kɔɔhiɔ ngɛ lejɛ ɔ lo. Nyɛɛ to blɔ nya mla nɛ nyɛ dla he nɛ nyɛ maa ye Kaimi ɔ ngɛ ɔ saminya.
Nyɛɛ hla munyu tulɔ nɛ sa, sɛnɔhilɔ, kɛ nyɛmimɛ nyumuhi nɛ a maa sɔle kɛ pue abolo ɔ kɛ wai ɔ nɔ.
Ke pi asafo kake nɛ maa kpe ngɛ he nɛ nyɛ maa ye Kaimi ɔ ngɛ ɔ, nyɛ ha nɛ asafo kpa amɛ nɛ a le be nɛ asafo nɛ maa sɛ hlami ɔ ma kpa, kɛ be nɛ asafo nɛ maa nyɛɛ se ɔ maa sɛ tsu ɔ mi, kɛ bɔ nɛ e sa nɛ a to lɔlehi ha konɛ nɔ́ tsuaa nɔ́ nɛ ya nɔ saminya.
Nyɛɛ hla nibwɔhi a kpeeli, kɛ nihi nɛ a kɛ abolo ɔ kɛ wai ɔ ma ha a, nɛ nyɛɛ tsɔɔ mɛ nɔ́ nɛ a maa pee.
E sa nɛ nyɛɛ to abolo kɛ wai nɛ sa he blɔ nya, nɛ nyɛ ná plɛɛtehi, wai kpluhi, okplɔɔ, kɛ okplɔɔ nɔ hami bo nɛ sa.

Níhi Nɛ Fiɛɛli Maa Pee Kɛ Dla A He:

Moo to blɔ nya nɛ o kɛ o he nɛ wo Kaimi ɔ he nine fɔmi womi ɔ gbami mi vii.
Ngmaa o Baiblo mi ní kaseli, o weku li, o sukuu bi, nihi nɛ o kɛ mɛ tsuɔ ní, kɛ ni kpahi nɛ o le mɛ ɔ a biɛ konɛ o fɔ mɛ tsuo nine.
Bɔɔ mɔde nɛ o kane Ngmamihi nɛ kɔɔ Kaimi ɔ he ɔ, nɛ o susu he saminya.
Moo ya Kaimi ɔ sisi mla konɛ o nya nibwɔhi a he.