Moo Tsɔɔ Nihi Nɛ Li Ní Kanemi Kpakpa Ko ɔ Ní
1. Mɛni si fɔfɔɛ waa kɛ kpee ngɛ fiɛɛmi mi be komɛ?
1 Ke wa ngɛ fiɛɛe ɔ, behi ngɛ nɛ waa kɛ nihi nɛ li ní kanemi kpakpa ko kpee nɛ́ sa kaa waa tsɔɔ mɛ anɔkuale ɔ. Mɛni wa ma nyɛ maa pee?
2. Mɛni blɔ nɔ wa maa gu kɛ je bumi kpo ha nihi nɛ li ní kanemi kpakpa ko, nɛ mɛni heje?
2 Mo Je Bumi Kpo Ha Mɛ: Yehowa a, nɔ tsui mi e hyɛɛ, se pi he nɛ nɔ ya sukuu kɛ ya su. (1 Sam. 16:7; Abɛ 21:2) Enɛ ɔ he ɔ, e sɛ kaa wa buu nihi nɛ li ní kanemi kpakpa ko ɔ kaa a he hia we. Ke wa je bumi kɛ tsui si tomi kpo ha nihi kaa jã a, e be yee ha mɛ kaa a maa kplɛɛ yemi kɛ buami nɛ waa kɛ ma ha mɛ ɔ nɔ. (1 Pet. 3:15, 16) Enɛ ɔ tsɔɔ kaa e sɛ nɛ wa deɔ nɔ ɔ ke e kane ngmami loo kuku ko doo. Ke nɔ ɔ ba le Baiblo ɔ mi anɔkualehi nɛ a he jua wa a bɔnɛ sa a, eko ɔ, e maa suɔ kaa é le ní kanemi saminya bɔnɛ pee nɛ e nyɛ nɛ e kane Mawu Munyu ɔ nɛ e ‘susu he nyɔ kɛ pia.’—La 1:2, 3.
3. Mɛni blɔhi a nɔ wa ma nyɛ maa gu kɛ tsɔɔ nihi nɛ li ní kanemi kpakpa ko ɔ ní?
3 Blɔhi A Nɔ Nɛ Wa Maa Gu Kɛ Pee Baiblo Mi Nikasemi: Fonihi nɛ a kɛ tsuɔ ní ngɛ ní tsɔɔmi mi ɔ yeɔ bua ní kaselɔ ɔ saminya nɛ e hɛ ji nɔ́ nɛ e kase ɔ nɔ. O ma nyɛ ma bi ní kaselɔ ɔ nɛ́ e tsɔɔ nɔ́ nɛ e na ngɛ foni nɛ ngɛ womi nɛ nyɛ ngɛ kasee ɔ mi. Lɔɔ se ɔ, bi lɛ sanehi pɔtɛɛ nɛ maa ye bua lɛ konɛ e nu nɔ́ nɛ foni ɔmɛ ngɛ tsɔɔe ɔ sisi. Ngɔɔ ngmamihi nɛ maa foni ɔ mi oti ɔmɛ a nɔ mi ɔ kɛ tsu ní. O ma nyɛ maa da foni ɔmɛ a nɔ kɛ nylɔ nikasemi ɔ mi hulɔ. Nyɛ ko kase níhi fuu ngɛ be kake mi. Moo ti nikasemi ɔ yi kɛ oti ɔmɛ a mi, nɛ koo ngɔ ní kpahi nɛ kɔ we nikasemi ɔ he kɛ piɛɛ he. Moo kane ngmami ɔmɛ kɛ je Baiblo ɔ mi tɛɛ, nɛ́ o bi lɛ sanehi nɛ o kɛ hyɛ kaa e nu nɔ́ nɛ o kane ɔ sisi lo. Enɛ ɔ ma nyɛ ma ha nɛ́ e suɔ kaa e maa kase ní kanemi saminya bɔnɛ pee nɛ lɛ nitsɛ e nyɛ nɛ e kase Baiblo mi anɔkualehi fuu kɛ piɛɛ he.
4. Mɛni blɔ nɔ wa ma nyɛ maa ye bua wa ní kaselɔ konɛ e le ní kanemi saminya?
4 Níhi Nɛ Maa Ye Bua Nɔ Kɛ Kase Ní Kanemi Saminya: Nihi nɛ li ní kanemi kpakpa ko loo a ná we he blɔ nɛ a kase ní kanemi ɔ nyɛɔ nuɔ níhi a sisi saminya nɛ a hɛ ji nɔ. O ma nyɛ maa wo nɔ ko kaa jã he wami konɛ ke nihi nɛ le ní kanemi ngɛ ní kanee ɔ, e bu tue saminya, nɛ e hyɛ nɔ ngɛ e womi ɔ mi, nɛ e tsɛ munyungu ɔmɛ ngɛ e nya he. Enɛ ɔ maa ye bua nɔ ɔ nɛ e maa le ní kanemi. Jehanɛ ɔ, womi nɛ ji Apply Yourself to Reading and Writing (Moo Kase Ní Kanemi Kɛ Ní Ngmami) ɔ hu maa ye bua lɛ. Ngɛ he komɛ ɔ, asafo mi nikɔtɔma amɛ to ní kanemi sukuu he blɔ nya ngɛ asafo ɔ mi. Blɔ tsɔɔmi nɛ ɔmɛ ma wa wɔ konɛ waa ye bua nihi nɛ li ní kanemi kpakpa ko ɔ nɛ a nu “ngmami klɔuklɔu ɔ” nɛ ma ha nɛ a le ní ɔ sisi, konɛ a he a yi wami.—2 Tim. 3:15.