Bɔ Nɛ Wa Maa Pee Kɛ Ye Bua Nihi Nɛ A Li Ní Kanemi Kpakpa Ko ɔ

1. Mɛni haomi wa ma nyɛ ma kɛ kpe ke waa kɛ nihi nɛ a li ní kanemi kpakpa ko ɔ ngɛ Baiblo ɔ kasee?

¹ Wetsɛ komɛ ngɛ nɛ a li ní kanemi kpakpa ko se a bua jɔ Baiblo ɔ mi munyuhi a he. Se ke e ba kaa a kane Baiblo ɔ loo womi kpa ko ɔ, e woɔ a he gbeye. Enɛ ɔ he ɔ, ke o ha nihi kaa kikɛ Baiblo Tsɔɔmi womi ɔ kekle be ɔ, eko ɔ, e be manyɛ yee. Mɛni blɔ nɔ wa maa gu kɛ ye bua mɛ konɛ a le Mawu he ní? Wa bi fiɛɛli nɛ a ngɛ níhi a si kpami ngɛ je mahi 20 a nɔ ɔ nɔ́ nɛ a peeɔ. A kɛ ga womihi nɛ nyɛɛ se ɔ ha.

2. Mɛni womihi nɛ wa ma nyɛ maa ngɔ kɛ ye bua nihi nɛ a li ní kanemi kpakpa ko ɔ?

² Ke ní kaselɔ ɔ li ní kanemi kpakpa ko loo e li ní kanemi kulaa a, o kɛ lɛ ma nyɛ maa je Bu Mawu Tue loo Bu Mawu Tue Nɛ́ O Hi Si Kɛ Ya Neneene womiyo ɔ sisi. Fiɛɛlɔ ko nɛ ngɛ United States ɔ ngɔɔ womiyo enyɔ ɔmɛ kɛ tsɔɔ nɔ ɔ nɛ e biɔ lɛ nɔ́ nɛ e bua jɔ he. Asafo ɔ ní tsumi kɔni nɛ ngɛ Kenya a bɔ amaniɛ kaa womiyo nɛ ɔmɛ kɛ ní tsumi yeɔ manye wawɛɛ ejakaa ngɛ Afrika a, a guɔ sane gbami nɔ kɛ tsɔɔ nihi ní mohu pe nɛ o ma bi mɛ sane nɛ a ha heto. Enɛ ɔ he ɔ, ke o kɛ nɔ ko nɛ yɛ sukuu kpakpa ko kaseɔ ní, nɛ nyɛ maa kane nɛ e ha heto ɔ, e maa hao lɛ; se nihi nɛ a ya sukuu ɔ maa suɔ nɛ a kane konɛ a bi mɛ sane ɔ. Fiɛɛli fuu suɔ kaa a kɛ ní kaselɔ nɛ nyɛɔ kaneɔ ní bɔɔ ɔ maa je ní kasemi ɔ sisi ngɛ Sane Kpakpa Nɛ Je Mawu Ngɔ! loo, O Ma Nyɛ Maa Pee Mawu Huɛ! loo eko ɔ, ngɛ Ye Womi nɛ Sɛɛɔ Baiblo Mi Sanehi ɔ mi.

3. Mɛni juɛmi ke wa ná ngɛ nihi nɛ a nyɛ we ní kanemi a he ɔ, e maa ye bua wɔ konɛ waa tsɔɔ mɛ ní?

³ Je E Yi: Zo peeɔ nihi nɛ a li ní kanemi ɔ, nɛ a ti nihi fuu susuɔ kaa bu be a he. Enɛ ɔ he ɔ, kekleekle nɔ́ nɛ wa maa pee kɛ ye bua mɛ konɛ waa tsɔɔ mɛ anɔkuale ɔ ji kaa wa ma ha nɛ a tsui nɛ nɔ a mi. Nihi fuu nɛ a nyɛ we ní kanemi ɔ a juɛmi nya wa nɛ a nyɛɔ kaseɔ ní. Mo je bumi kpo kɛ tsɔɔ mɛ, nɛ o ha nɛ a na kaa bu ngɛ a he. (1 Pet. 3:15) A ma na gɛjɛmi nɛ a ma tsa ni kasemi ɔ nɔ ke a na kaa se nami ngɛ a mɔde bɔmi ɔ he nɛ a ngɛ hɛ mi yae ngɛ Mawu he ní nɛ a ngɛ kasee ɔ mi. Lɔ ɔ he ɔ, moo je o tsui mi nɛ o je a yi.

4. Mɛni blɔ nɔ wa maa gu kɛ wo nihi nɛ a li ní kanemi kpakpa ko ɔ he wami konɛ a sɛ hlami nɛ a kase nɔ́ nɛ waa kɛ mɛ maa kase ɔ?

⁴ Ke ní kaselɔ ɔ nyɛ we ní kanemi kpakpa ko po ɔ, moo wo lɛ he wami nɛ e sɛ hlami nɛ e kase nɔ́ nɛ nyɛ maa kase ɔ mi. Fiɛɛli komɛ nɛ a ngɛ South Afrika a woɔ a ní kaseli he wami kaa a de a weku no ko loo a huɛ ko nɛ e le ní kanemi nɛ e ye bua mɛ. Fiɛɛlɔ ko nɛ ngɛ Britain ɔ ngɔɔ e womi nɛ e poo sane heto ɔmɛ a sisi ngɛ mi ɔ kɛ haa e ní kaseli be mi nɛ a ngɛ ní kasee. Enɛ ɔ haa nɛ ní kaseli ɔmɛ naa kaa ke a sɛ hlami nɛ a kase womi ɔ nɛ a po sane heto ɔmɛ a sisi ɔ, e he wɛ kaa a maa na heto ɔmɛ. Nyɛminyumu ko nɛ e ngɛ India woɔ e ní kaseli he wami kaa a hyɛ fonihi nɛ ngɛ ní kasemi nɛ maa nyɛɛ se ɔ mi ɔ nɛ a susu he.

5. Mɛni blɔ nɔ wa maa gu kɛ to wa tsui si ke waa kɛ nɔ ɔ ngɛ ní kasee?

⁵ Moo To O Tsui Si: Womi ɔ eko tsuaa eko nɛ nyɛ maa kase ɔ, moo tu otihi nɛ ngɛ mi ɔ pɛ he munyu, nɛ o ye bua lɛ nɛ e nu sisi wawɛɛ. Sisije ɔ, e maa hi kaa nyɛɛ kɛ hɛngmɛfia 10 loo 15 pɛ maa pee ní kasemi ɔ. Nyɛ ko kase ní ɔ fuu, kukuhi bɔɔ ko nɛ nyɛ maa kase ɔ maa hi. Ke ní kaselɔ ɔ kaneɔ ní blɛuu ɔ, moo to o tsui si ha lɛ. Ke e bɔni suɔmi nami ha Yehowa a, lɔ ɔ maa wo lɛ gɛjɛmi nɛ e maa bɔ e ní kanemi ɔ he mɔde. Bɔ nɛ pee nɛ e nyɛ nɛ e pee jã a, e sa nɛ o fɔ lɛ nine kɛ ba asafo mi kpehi benɛ nyɛ je ní kasemi sisi pɛ.

6. Mɛni blɔ nɔ wa ma nyɛ maa gu kɛ ye bua nihi nɛ́ a kase bɔ nɛ a kaneɔ ní ha?

⁶ Ke Baiblo kaseli kase ní kanemi ɔ, a maa wa ngɛ mumi mi mlamlaamla. (La 1:1-3) Nihi fuu ye bua a ní kaseli kɛ gu Moo Kase Ní Kanemi Kɛ Ní Ngmami womi ɔ nɛ a ngɔɔ hɛngmɛfia bɔɔ kɛ kaseɔ ke a gbe a ní kasemi ɔ nya a nɔ. Ke ní kaselɔ ɔ kɔni mi wo nyu ɔ, o ma nyɛ maa wo lɛ he wami kɛ gu ní komɛ nɛ e nyɛ kase nɛ o ma kai lɛ ɔ nɔ. Ha nɛ e le kaa Yehowa maa jɔɔ e mɔde bɔmi ɔ nɔ, nɛ o wo lɛ he wami nɛ e sɔle kɛ bi yemi kɛ buami. (Abɛ 16:3; 1 Yoh. 5:14, 15) Fiɛɛli komɛ nɛ a ngɛ Britain woɔ a ní kaseli he wami kaa a ngɔ oti komɛ kɛ ma a hɛ mi. Kekleekle ɔ, a ha nɛ a kaseɔ ningma okadi ɔmɛ. Lɔ ɔ se ɔ, a hla ngmami komɛ nɛ a kaneɔ, nɛ nyagbe ɔ, a ha nɛ a kaneɔ Baiblo kasemi womihi nɛ a kanemi yi. Nihi nɛ wa maa ye bua nɛ a kase ní kanemi ɔ hu biɔ nɛ waa wo mɛ he wami nɛ a bua nɛ jɔ ní kanemi he.

7. Mɛni he je nɛ e sɛ nɛ waa gbla wa nane si kaa wa maa tsɔɔ nihi nɛ a li ní kanemi kpakpa ko ɔ anɔkuale ɔ?

⁷ Yehowa buu nihi nɛ a yɛ sukuu kpakpa ko ɔ hu kaa a he hia. (Hiob 34:19) Yehowa lɛɛ nɔ tsui mi e hyɛɛ. (1 Kron. 28:9) Enɛ ɔ he ɔ, koo gbla o nane si kaa o maa tsɔɔ nihi nɛ a li ní kanemi kpakpa ko ɔ anɔkuale ɔ. Womihi fuu ngɛ nɛ o ma nyɛ kɛ mɛ maa kase. Kɛ yaa kɛ yaa a, o ma nyɛ ma plɛ ní kasemi ɔ kɛ ya Baiblo Tsɔɔmi womi ɔ nɔ konɛ e nu ngmami ɔ sisi saminya.