Bɔnɛ O Ma Dla O He Kɛ Ha Sɔmɔmi Kpe ɔ
1. Mɛni ji yi mi tomi nɛ ngɛ Sɔmɔmi Kpe ɔ he, nɛ mɛni blɔ nɔ wa maa gu kɛ ná he se kɛ pi si?
1 A to Sɔmɔmi Kpe ɔ he blɔ nya konɛ e ye bua wɔ nɛ wa fiɛɛmi nítsumi ɔ nɛ wo yiblii. Munyu titli nɛ wa susuɔ he ɔ kɔɔ Matsɛ Yemi ɔ he sane kpakpa a fiɛɛmi, kaseli peemi, kɛ Mawu kojomi nɛ ma a jajemi he. (Mat. 28:19, 20; Mar. 13:10; 2 Pet. 3:7) Wa náa kpe nɛ he hia nɛ ɔ he se kɛ pii si ke wa dla wa he saminya nɛ wa ngɔ wa he kɛ wo mi.
2. Mɛni wa ma nyɛ maa pee kɛ dla wa he kɛ bu munyu nɛ a ma ha tue?
2 Munyu Hami: A tsɔɔ he nɛ a je munyu ɔ kɛ je ɔ ngɛ blɔ tsɔɔmi kɛ ha munyu tulɔ ɔ mi. O ma nyɛ maa kane mi nɛ́ o susu ngmami ɔmɛ a he, konɛ o hyɛ kaa mɛni blɔ nɔ o maa gu nɛ o kɛ tsu ní ngɛ o fiɛɛmi nítsumi ɔ mi.
3. Mɛni wa ma nyɛ maa pee kɛ dla wa he ha sane bimi kɛ heto hami nikasemi ɔ?
3 Sane Bimi Kɛ Heto Hami: A peeɔ lɛ kaa bɔnɛ a peeɔ Watchtower Nikasemi ɔ. A bliɔ nya nɛ a mwɔɔ nya kɛ munyu kpiti. Poo munyu otihi nɛ ngɛ kuku tsuaa kuku mi ɔ a sisi, konɛ o pee klaalo kaa o ma ha hetohi nɛ ngɛ kpiti nɛ sisi numi ngɛ he.
4. Mɛni wa ma nyɛ maa pee kɛ dla wa he kɛ ha nikasemi nɛ biɔ kaa a kɛ tue buli nɛ sɛɛ ní?
4 Tue Buli Kɛ Ní Sɛɛmi: A tsuɔ he ní kaa munyu hami, se munyu tulɔ ɔ ma bi tue buli sane komɛ. Ke o po oti ɔmɛ a sisi nɛ o kane ngmami ɔmɛ ɔ, o ma nyɛ ma ha sanehi nɛ a ma bi ɔ a heto. Nyɛminyumu nɛ maa hyɛ nikasemi ɔ nɔ ɔ maa bɔ mɔde kaa e ma bi tue buli sanehi kɛ je oti ɔmɛ kpo.
5. Mɛni ma ha nɛ wa ná nɔhyɛ níhi nɛ a maa pee ɔ a he se kɛ pi si?
5 Nɔhyɛ Níhi Nɛ A Peeɔ Kɛ Tsɔɔ: Nikasemi ɔ fa komɛ biɔ kaa a pee bɔnɛ a kɛ nɔ́ nɛ a kase ɔ ma tsu ní ngɛ zugba kpɔ mi ha he nɔhyɛ nɔ́ kɛ tsɔɔ. Asafo mi nikɔtɔmahi, fiɛɛli nɛ a he be, loo blɔ gbali ji nihi nɛ a ma ha nɛ a pee. Ke o ngɛ o he dlae ɔ, o ma nyɛ maa po bɔnɛ a maa pee nɔhyɛ nɔ́ ɔ ha he foni ngɛ o juɛmi mi. Ke a pee nɔhyɛ níhi nɛ a ngma ngɛ Wa Matsɛ Yemi Sɔmɔmi ɔ mi kɛ tsɔɔ ɔ, moo hyɛ bɔnɛ mo nitsɛ o ma de lɛ ha, kɛ bɔnɛ o ma plɛ mi ha ke o kɛ nihi munomuno kpe. Moo ngɔ womi loo womi tɛtlɛɛ nɛ a kɛ maa pee nɔhyɛ nɔ́ ɔ kɛ ya nikasemi ɔ. E maa hi kaa nyɛ ma nylɔ nɔhyɛ ní nɛ ɔmɛ ekomɛ a mi ngɛ nyɛ gbɔkuɛ Weku Mawu Jami ɔ mi.
6. Mɛni ji yi mi tomi komɛ a heje nɛ sa kaa wa dla wa he kɛ ha Sɔmɔmi Kpe ɔ?
6 Ke wa dla wa he nɛ wa le ní kpakpahi nɛ a ma susu he ngɛ Sɔmɔmi Kpe ɔ, wa ma ná bua jɔmi nitsɛ. Blɔ tsɔɔmi nɛ ɔmɛ nɛ waa kɛ ma tsu ní ɔ, ma ha nɛ waa wo wa sibi he wami saminya. (Rom. 1:11, 12) Ke wa ná be kɛ dla wa he saminya kɛ ha Sɔmɔmi Kpe ɔ, wa he maa su kɛ tsu nítsumi nɛ a ha wɔ ɔ.—2 Tim. 3:17.