Yehowa Ngɛ Wɔ Tsɔsee Kɛ Ha Nítsumi Nɛ ɔ
1. Ke Yehowa kɛ nítsumi wo adesahi a dɛ ɔ, mɛni hu nɛ e peeɔ?
1 Ke Yehowa kɛ nítsumi wo adesahi a dɛ ɔ, e yeɔ bua mɛ hulɔ konɛ a nyɛ nɛ a tsu nítsumi ɔ. Kaa nɔ hyɛmi nɔ́ ɔ, benɛ Yehowa de Noa kaa e kpɛ lɛ, nɛ Noa pee we eko hyɛ ɔ, e tsɔɔ lɛ bɔnɛ e ma plɛ kɛ kpɛ lɛ ɔ ha. (1 Mose 6:14-16) Benɛ Yehowa de Mose nɛ ji to hyɛlɔ nɛ he jɔ ɔ ke e kɛ Israel ma a mi nikɔtɔma amɛ kɛ Farao nɛ ya tu munyu ɔ, Yehowa ma nɔ mi kɛ ha Mose ke: “Ma ha o nya mi ma tsɔ, nɛ ma tsɔɔ mo nɔ́ nɛ o de.” (2 Mose 4:12) Yehowa tsɔɔ wɔ bɔnɛ wa ma plɛ kɛ tsu nítsumi nɛ e kɛ wo wa dɛ nɛ ji fiɛɛmi nítsumi ɔ ha. E tsɔseɔ wɔ kɛ guɔ Teokrase Sɔmɔmi Sukuu ɔ kɛ Sɔmɔmi Kpe ɔ nɔ konɛ wa nyɛ nɛ wa tsu nítsumi nɛ ɔ. Kɛ wa ma plɛ kɛ ná tsɔsemi nɛ ɔ he se kɛɛ?
2. Mɛni blɔ nɔ wa maa gu kɛ ná Teokrase Sɔmɔmi Sukuu ɔ he se?
2 Teokrase Sɔmɔmi Sukuu ɔ: Be tsuaa be ɔ, moo kase níhi nɛ a ma susu he ngɛ teokrase sɔmɔmi sukuu ɔ mi ɔ loko o ya kpe ɔ. Kɛkɛ ɔ, ke o ya kpe ɔ nɛ o ya na bɔnɛ sukuubi ɔmɛ ngɛ a ní peemi ɔmɛ a he ní tsue ha a, lɔɔ ma ha nɛ o maa le bɔnɛ a tsɔɔ ní nɛ e piɔ si ha. (Abɛ 27:17) Ke o maa ya asafo mi kpe ɔ, o kɛ o Ministry School womi ɔ nɛ ya nɛ o hyɛ mi benɛ ní peemi ɔ ngɛ nɔ yae ɔ. Ke sukuubi ɔmɛ a ti nɔ tsuaa nɔ ko gbe e ní peemi ɔ nya nɛ sukuu nɔ hyɛlɔ ɔ ngɛ nɔ́ ko he munyu tue ngɛ womi ɔ mi ɔ, moo po munyu otihi nɛ o suɔ kaa o kɛ ma tsu ní ɔ a sisi konɛ o ngma ní ngɛ blɔ nɛ a si ngɛ womi ɔ nya a. Loko o ma ná sukuu nɛ ɔ he se ɔ, ja o kɛ o he wo mi. Anɛ o ngma o biɛ ngɛ sukuu ɔ mi lo? Ke a ha mo nítsumi ko ngɛ Teokrase Sɔmɔmi Sukuu ɔ mi ɔ, moo kase lɛ saminya nɛ o kɛ ga womi nɛ a ma ha mo ɔ nɛ tsu ní. Ke o ya fiɛɛmi ɔ, o kɛ nɔ́ nɛ o kase ɔ nɛ tsu ní.
3. Mɛni maa ye bua wɔ konɛ wa ná Sɔmɔmi Kpe ɔ he se?
3 Sɔmɔmi Kpe ɔ: Ke wa sɛ hlami nɛ wa kase níhi nɛ a ma susu he ɔ nɛ wa dla wa he kaa wa ma ha sanehi a heto ɔ, lɔɔ ma ha nɛ ga womihi nɛ a kɛ ma ha ngɛ kpe ɔ maa tlɔ wa juɛmi mi saminya. Ke wa sane heto ɔ ngɛ kpiti ɔ, lɔɔ ma ha nɛ nihi fuu ma ná he blɔ nɛ mɛ hu a maa tu munyu. Mo kadi níhi nɛ a maa pee ngɛ peemi kɛ tsɔɔ ɔmɛ a mi ɔ saminya, nɛ o kɛ ga womihi nɛ o na kaa e maa ye bua mo wawɛɛ ngɛ o sɔmɔmi nítsumi ɔ mi ɔ nɛ tsu ní. Ke o na kaa níhi nɛ ngɛ Wa Matsɛ Yemi Sɔmɔmi ɔ eko mi maa ye bua mo ngɛ o sɔmɔmi ɔ mi ɔ, mo kɛ to.
4. Mɛni heje lɛ e sa nɛ waa kɛ teokrase tsɔsemi nɛ a haa wɔ ɔ nɛ tsu ní ngɛ?
4 Kaa bɔnɛ nítsumi nɛ a kɛ wo Noa kɛ Mose a dɛ ɔ mi wa a, jã nɔuu kɛ̃ nɛ nítsumi nɛ a kɛ wo wɔ hu wa dɛ kaa wa fiɛɛ sane kpakpa a kɛ kpa je ɔ mi tsuo ɔ mi wa. (Mat. 24:14) Ke waa kɛ wa hɛ fɔ Yehowa nɛ ji Tsɔɔlɔ Ngua a nɔ nɛ waa kɛ tsɔsemi nɛ e ngɛ wɔ hae ɔ tsu ní saminya a, wa maa ye manye.—Yes. 30:20.