Wa Fiɛɛmi Nítsumi ɔ Ji Suɔmi Kpo Nɛ Wa Jeɔ Ha Mawu
1. Mɛni suɔmi nɛ Yesu ngɛ ha Mawu ɔ wo lɛ he wami nɛ e pee?
1 Suɔmi wo Yesu he wami nɛ e tsu e sɔmɔmi ɔ he ní. Bɔnɛ Yesu tsu e sɔmɔmi nítsumi ɔ ha a ji odase yemi agbo kaa e suɔ Yehowa. Yesu de ke: “E sa kaa je ɔ tsuo nɛ le kaa i suɔ Tsɛ ɔ, lɔɔ he ɔ, nɔ́ tsuaa nɔ́ nɛ e fa a, i peeɔ.” (Yoh. 14:31) Akɛnɛ Yesu se nyɛɛli ji wɔ heje ɔ, wɔ hu wa ngɛ he blɔ nɛ́ waa kɛ maa tsɔɔ kaa wa suɔ Mawu ngɛ wa fiɛɛmi nítsumi ɔ mi.—Mat. 22:37; Efe. 5:1, 2.
2. Kɛ suɔmi nɛ wa ngɛ ha Yehowa haa wa tsuɔ wa fiɛɛmi nítsumi ɔ kɛɛ?
2 “O Biɛ ɔ He Nɛ Tsɔ”: Ke wa ngɔɔ he blɔhi tsuo nɛ wa náa kɛ tuɔ Yehowa kɛ e Matsɛ Yemi ɔ he munyu ha nihi kɛ kã a, wa ngɛ tsɔɔe kaa wa suɔ Mawu nɛ wa ngɛ e biɛ ɔ he tsɔe. (La 83:18; Ezek. 36:23; Mat. 6:9) Kaa bɔnɛ e ji ngɛ Yesu fiɛɛmi nítsumi ɔ mi ɔ, wa guu wa fiɛɛmi nítsumi ɔ nɔ kɛ tsɔɔ daa kaa wa suɔ nɛ Yehowa biɛ ɔ he nɛ tsɔ, nɛ á pee e suɔmi nya ní.—Mat. 26:39.
3. Suɔmi nɛ wa ngɛ ha Yehowa a yeɔ bua wɔ nɛ wa yeɔ blɔ tsimi níhi a nɔ ngɛ mɛni blɔ nɔ?
3 Suɔmi Woɔ Wɔ He Wami Nɛ Wa Yeɔ Blɔ Tsimi Níhi A Nɔ: Suɔmi nɛ wa ma ná ha Mawu ɔ ma nyɛ maa ye blɔ tsimi níhi kulaa nɔ. (1 Kor. 13:4, 7) Yesu kɛ haomi slɔɔtohi kpe ngɛ e si himi mi nɛ jinɛ lɔɔ ko nyɛ tsi e fiɛɛmi nítsumi ɔ nya. Se suɔmi nɛ mi wa nɛ e ngɛ kaa e maa pee Yehowa suɔmi nya ní ɔ ye bua lɛ nɛ e ye blɔ tsimi ní ɔmɛ a nɔ kunimi. (Mar. 3:21; 1 Pet. 2:18-23) Wɔ hu waa kɛ haomihi babauu ngɛ kpee, se suɔmi nɛ wa ngɛ ha Mawu ɔ maa ye bua wɔ konɛ waa ye a nɔ. Ke wa nyɛɛ nɔhyɛ nɔ́ nɛ Kristo pee fɔ si ɔ se bɛbɛɛbɛ ɔ, e maa wo wɔ kã konɛ wa tsu fiɛɛmi nítsumi ɔ kɛ he wami. E ngɛ mi kaa eko ɔ, wa wekuli teɔ si kɛ woɔ wɔ, nɛ hiɔ loo bwɔmi haoɔ wɔ, loo nihi bui munyu ɔ tue mohu lɛɛ, se wa yaa nɔ nɛ wa tsuɔ wa fiɛɛmi nítsumi ɔ saminya nɛ waa kɛ tsɔɔ kaa wa suɔ Yehowa.
4. Mɛni ji he blɔ nɛ wa ná nɛ waa kɛ ma je suɔmi nɛ wa ngɛ ha Yehowa a kpo?
4 Suɔmi ngɛ he wami saminya, nɛ e ji jɔɔmi kaa wa nyɛɛ guu wa fiɛɛmi nítsumi ɔ nɔ kɛ jeɔ suɔmi nitsɛnitsɛ nɛ wa ngɛ ha Mawu ɔ kpo. (1 Kor. 13:13) Akɛnɛ be nɛ Yehowa kɛ ma tsɔ e biɛ ɔ he si kake nyɔngloo ngɛ sue nɛ ɔ, e ba mi kaa ‘suɔmi nɛ wa ngɛ kɛ ha wa sibi ɔ mi maa wa daa.’—Fil. 1:9; Mat. 22:36-38.