Bɔɔ Mɔde Nɛ O Fiɛɛ Ha Nyumuhi
1. Mɛni he ba hia wawɛɛ ngɛ Matsɛ Yemi ɔ he nítsumi ɔ mi?
1 Benɛ Matsɛ Yemi ɔ he nítsumi ɔ ngɛ hɛ mi yae ngɛ nyagbe ligbi nɛ ɔmɛ a mi nɛ ɔ, nyumuhi nɛ su Ngmami ɔ mi hlami níhi a he nɛ a maa nyɛɛ hɛ mi ɔ a he ba hia wawɛɛ. (Mar. 4:30-32; Níts. 20:28; 1 Tim. 3:1-13) Se ngɛ he komɛ ɔ, yihi fuu ngɛ Matsɛ Yemi sɛgbi ɔ nɔ kplɛɛe pe nyumuhi. Ngɛ ma komɛ a mi ɔ, nyumuhi tsɛ̃ɛ Mawu jami kɛ fɔɔ a yihi a nɔ, nɛ a susuɔ kaa mɛ ji nihi nɛ sa kaa a tsɔɔ a bimɛ ɔmɛ Mawu he ní. Mɛni blɔ nɔ wa maa gu kɛ ye bua nyumuhi konɛ Mawu jami he nɛ hia mɛ nɛ a ba piɛɛ wa he ngɛ anɔkuale jami ɔ mi?
2. Mɛni nɔ́ kpakpa je mɔde nɛ Paulo kɛ Petro bɔ kɛ ye nyumuhi odase ɔ mi kɛ ba?
2 Mo Hlá Nyumuhi Nɛ O Fiɛɛ Ha Mɛ: Ke weku yi ko kplɛɛ anɔkuale ɔ nɔ ɔ, behi fuu ɔ, e náa e yo kɛ e bimɛ a nɔ he wami nɛ a ba piɛɛ e he ngɛ anɔkuale jami ɔ mi. Kaa nɔ hyɛmi nɔ́ ɔ, benɛ a wo Paulo kɛ Sila tsu ngɛ fiɛɛmi ɔ heje ɔ, a ye pamitsɛmɛ a nɔ hyɛlɔ ɔ odase. A baptisi nyumu ɔ kɛ e we ɔ mi bimɛ tsuo. (Níts. 16:25-34) Kɛ gu Paulo fiɛɛmi ngɛ Korinto ɔ nɔ ɔ, “kpe he ɔ nɔkɔtɔma nɛ a tsɛɛ lɛ Krispo ɔ, kɛ e we tsuo he Nyɔmtsɛ ɔ ye.” (Níts. 18:8) Yehowa ha Petro ye asafoatsɛ ko nɛ a tsɛɛ lɛ Kornelio, nɛ ji ‘Mawu jalɔ nɛ yee Mawu gbeye’ ɔ odase. A baptisi Kornelio kɛ e wekuli kɛ e huɛmɛ tsuo.—Níts. 10:1-48.
3. Kaa bɔnɛ Filipo pee ɔ, mɛnɔmɛ nɛ a “hɛɛ blɔ nya” o ma nyɛ maa ye mɛ odase?
3 Ke wa ye nyumuhi nɛ “hɛɛ blɔ nya” odase ɔ, se nami babauu ma nyɛ maa je mi kɛ ba. (1 Tim. 2:1, 2) Nɔ hyɛmi nɔ́ ji kaa, Yehowa bɔfo de Filipo kaa e kɛ “tsɔlɔ nɔkɔtɔma” nɛ hyɛɛ Etiopia manyɛ ɔ weto ní ɔ tsuo nɔ ɔ nɛ ya tu munyu. Filipo nu nɛ “nyumu ɔ ngɛ gbalɔ Yesaya womi ɔ kanee,” nɛ e ya tsɔɔ lɛ sane kpakpa a nɛ kɔɔ Yesu he ɔ nya. Etiopiano nɛ ɔ ba plɛ pee kaselɔ, nɛ eko ɔ, e fiɛɛ sane kpakpa a ngɛ blɔ ɔ nɔ kɛ ya su e ma mi. Eko ɔ, e ye manyɛ ɔ kɛ nihi nɛ ngɛ we ɔ mi nɛ jinɛ a ko nui sane kpakpa a odase.—Níts. 8:26-39.
4. Mɛni wa maa pee konɛ nyumuhi nɛ nu sane kpakpa a?
4 Blɔ Nɔ Nɛ Wa Maa Gu Kɛ Na Nyumuhi Nɛ Waa Fiɛɛ Ha Mɛ: Akɛnɛ nyumuhi pɔɔ a nítsumi hehi himi ngɛ ligbi ɔ mi heje ɔ, anɛ o ma nyɛ maa to o be he blɔ nya konɛ o ngɔ be fuu kɛ fiɛɛ gbɔkuɛ gbɔkuɛ, Hɔ kɛ Hɔgba, loo hejɔɔmi ligbi lo? Nítsumi hehi nɛ o maa pɔ fiɛɛmi ngɛ ɔ ma bli blɔ ha mo konɛ o fiɛɛ ha nyumuhi nɛ pɔɛ we mi himi ɔ. Nyɛminyumuhi ma nyɛ maa bɔ mɔde konɛ a ye nyumuhi nɛ a kɛ mɛ tsuɔ ní ngɛ he kake ɔ odase. Ke wa ya wehi a mi fiɛɛmi ngɛ zugba kpɔ nɛ wa pɔɔ mi nítsumi mi ɔ, nyɛminyumuhi ma nyɛ ma bi nyumu nɛ ngɛ we ɔ mi ɔ si nɛ a kɛ lɛ nɛ sɛɛ ní.
5. Ke nyɛmiyo ya na nyumu nɛ e bua jɔ Matsɛ Yemi sɛgbi ɔ he ɔ, mɛni e sa kaa e pee?
5 Ke nyɛmiyo ya na nyumu nɛ e bua jɔ anɔkuale ɔ he ɔ, lɛ nɔ kake e ko kpale kɛ ya e ngɔ. E kɛ e huno loo fiɛɛlɔ kpa nɛ ya. Ke nɔ ɔ ya nɔ nɛ e je bua jɔmi kpo ngɛ nikasemi ɔ he ɔ, e hi saminya kaa a kɛ lɛ ma ha nyɛminyumu nɛ sa.
6. Mɛni blɔ nɔ wa maa kase bɔfo Paulo bɔnɛ pee nɛ wa “nine nɛ su nihi babauu a nɔ”?
6 Moo Hla Munyuhi Nɛ Nyumuhi A Bua Jɔ He: Bɔfo Paulo susu e tue buli ɔmɛ a he nɛ e tsake e munyu ɔ mi bɔnɛ pee nɛ e “nine nɛ su nihi babauu a nɔ.” (1 Kor. 9:19-23) E sa kaa wɔ hu waa hyɛ munyuhi nɛ sa nɛ́ nyumuhi nɛ wa maa na a bua maa jɔ he konɛ waa ngɔ lɔɔ kɛ dla wa he. Kaa nɔ hyɛmi nɔ́ ɔ, níhi nɛ nyumuhi pɔɔ he susumi ji, sika he blɔ nya tomi, nɔyemi kpakpa, kɛ a weku ɔ nɛ maa pee slɔkee. Eko ɔ, a maa suɔ kaa á le nɔ́ heje nɛ a ngɛ je mi ngɛ, bɔnɛ zugba a ma ji ha hwɔɔ se, kɛ nɔ́ heje nɛ Mawu ngmɛ nɔ́ nami blɔ. Ke waa kɛ níhi a se kɔmi kaa jã tsu ní ngɛ Matsɛ Yemi sɛgbi ɔ fiɛɛmi mi ɔ, a maa bu tue.—Abɛ 16:23.
7. Mɛni blɔ nɔ asafo mi bi ɔmɛ tsuo ma nyɛ ma ná hunomɛ nɛ be asafo ɔ mi nɛ maa ba nikasemi ɔ a nɔ he wami kpakpa ngɛ?
7 Moo Su Hunomɛ Nɛ Be Asafo ɔ Mi ɔ He Nɛ O Ye Bua Mɛ: Anɔkuale, nyɛmiyihi Kristofoli a jemiba nɛ ngɛ fɛu ɔ náa a hunomɛ nɛ he we yi ɔ a nɔ he wami kpakpa, se asafo mi bi ɔmɛ hu ma nyɛ maa ye bua. (1 Pet. 3:1-4) Ke huno nɛ he we yi kɛ e yo odasefono ba nikasemi ɔ, bɔnɛ asafo mi bi ɔmɛ ma he lɛ atuu kɛ bua jɔmi ha a maa pee odase agbo ha lɛ. Nikasemi he ɔ nɛ e ba a tsɔɔ kaa e bua jɔ anɔkuale ɔ he, nɛ eko ɔ, e maa kplɛɛ kaa a kɛ lɛ nɛ kase Baiblo ɔ.
8. Mɛni blɔhi a nɔ nyɛminyumuhi ma nyɛ maa su nyɛmiyihi a hunomɛ nɛ be asafo ɔ mi nɛ a be anɔkuale ɔ he bua jɔmi kpakpa ko ɔ a he?
8 Hunomɛ komɛ hu ngɛ nɛ sisije ɔ, a be Baiblo ɔ kasemi he bua jɔmi kpakpa ko, se eko ɔ, pee se ɔ, a maa suɔ kaa nyɛminyumu ko nɛ a le e hɛ mi saminya kɛ mɛ nɛ kase Baiblo ɔ. Nyɛminyumu komɛ nɛ ngɛ asafo ko mi ya hii weku ko slaae. Ke a ya a, a bɔɔ mɔde wawɛɛ kaa a kɛ huno ɔ nɛ be asafo ɔ mi ɔ maa sɛɛ níhi nɛ e bua jɔ he. Kɛ gu enɛ ɔ nɔ ɔ, a bɔni Baiblo ɔ mi ní sɛɛmi, nɛ amlɔ nɛ ɔ, a baptisi lɛ. Ngɛ he kpa ko hu ɔ, nyɛminyumu ko ye bua nyɛmiyo ko huno nɛ be asafo ɔ mi, nɛ́ haa nɔ hɛ mi, kɛ po piɛ kɛ wo e we he. Kɛ gu yemi kɛ buami nɛ ɔ nɛ e kɛ ha lɛ ɔ nɔ ɔ, e bɔni Baiblo ɔ kasemi. (Gal. 6:10; Fil. 2:4) Ke Kristofono nyumu ji mo ɔ, anɛ o ma nyɛ maa bɔ mɔde konɛ o su nyɛmiyo ko huno nɛ be asafo ɔ mi ɔ he lo?
9. Mɛni ma nyɛ maa je tsɔsemi nɛ Kristofoli nyumuhi ma ná a mi kɛ ba?
9 Nyɛ Tsɔse Nyumuhi Ha Hwɔɔ Se: Nyumuhi nɛ buɔ Matsɛ Yemi sɛgbi ɔ tue nɛ a bɔɔ mɔde kaa a maa su blɔ nya nítsumihi a he ngɛ Yehowa sɔmɔmi ɔ mi ɔ ma nyɛ ma ba piɛɛ ‘nimli nɛ ji nike ní’ ɔ a he. A ji Kristofoli asafo mi nikɔtɔmahi nɛ ngɔɔ a nyɛmi kɛ a he wami kɛ sɔmɔɔ ngɛ Yehowa asafo ɔmɛ a mi. (Efe. 4:8; La 68:18) Nyumuhi kaa jã hyɛɛ asafo ɔ nɔ ngɛ suɔmi kɛ bua jɔmi mi. (1 Pet. 5:2, 3) A ji jɔɔmi nitsɛ ha nyɛmimɛ ngɛ je kɛ wɛ tsuo!
10. Mɛni blɔ nɔ mɔde nɛ Anania bɔ kɛ ye bua Paulo ɔ he ba se nami ha nihi fuu?
10 Kaa nɔ hyɛmi nɔ́ ɔ, Saulo ba plɛ ‘bɔfo kɛ ha ma jeli ɔmɛ,’ e ngɛ mi kaa e wa Kristofoli yi mi be ko nɛ be. (Rom. 11:13) Enɛ ɔ heje ɔ, sisije ɔ, kaselɔ Anania sume kaa e maa fiɛɛ ha Saulo. Se kɛ̃ ɔ, Anania bu Nyɔmtsɛ ɔ tue nɛ e fiɛɛ ha nyumu nɛ ba plɛ pee bɔfo Paulo ɔ. Kɛ ba si amlɔ nɛ ɔ, Paulo fiɛɛmi nítsumi ɔ he ba se nami ha nimli akpehi abɔ, kɛ nihi ayɔhi abɔ nɛ kaneɔ womihi nɛ mumi klɔuklɔu ɔ ye bua lɛ kɛ ngma nɛ ngɛ Baiblo ɔ mi ɔ.—Níts. 9:3-19; 2 Tim. 3:16, 17.
11. Mɛni heje e sa nɛ waa pee tsakemi nɛ sa bɔnɛ pee nɛ waa ye nyumuhi odase?
11 Enɛ ɔ heje ɔ, nyɛ ha nɛ waa pee tsakemi nɛ sa, bɔnɛ pee nɛ wa nyɛ nɛ waa ye nyumuhi odase. Ke wa tsu oti nɛ ɔ he ní ɔ, Yehowa maa jɔɔ mɔde nɛ wa ngɛ bɔe kaa wa maa sa e hɛ mi konɛ wa tsu Matsɛ Yemi ɔ he ní saminya a nɔ.