Anɛ O Ma Nyɛ Maa Ye Bua Gba Si Himi Mi He Piɛɛlɔ Ko Nɛ E Be Asafo ɔ Mi Konɛ E Ba Le Anɔkuale ɔ Lo?
1. Mɛni heje nɛ pi Kristofoli nɛ a hunomɛ loo a yihi be asafo ɔ mi ɔ pɛ nɛ a suɔ kaa a gba si himi mi he piɛɛli ɔmɛ nɛ a ba le anɔkuale ɔ?
1 Anɛ fiɛɛli komɛ ngɛ o we asafo ɔ mi nɛ a hunomɛ loo a yihi be asafo ɔ mi lo? Ke jã a, atsinyɛ jemi ko be he kaa fiɛɛli nɛ ɔmɛ maa suɔ nɛ a huno ɔmɛ loo a yi ɔmɛ nɛ ba piɛɛ a he ngɛ asafo ɔ mi. Se pi mɛ pɛ nɛ a suɔ kaa a gba si himi he piɛɛli ɔmɛ nɛ a ba le anɔkuale ɔ. Kaa bɔnɛ Mawu suɔ nɛ “nimli tsuo nɛ le anɔkuale ɔ, konɛ a he a yi wami” ɔ, jã nɔuu nɛ asafo mluku ɔ hu suɔ nɛ nihi tsuo nɛ a le anɔkuale ɔ. (1 Tim. 2:4) Mɛni blɔ nɔ wa ma nyɛ maa gu kɛ ye bua nihi nɛ a be asafo ɔ mi se a hunomɛ loo a yihi ngɛ wa we asafo ɔ mi ɔ?
2. Mɛni blɔ nɔ lɛ nɔ́ se kɔmi ma nyɛ maa ye bua wɔ nɛ waa ye bua gba si himi mi he piɛɛlɔ ko nɛ be asafo ɔ mi se e huno loo e yo ngɛ mi ɔ konɛ e ba le anɔkuale ɔ?
2 Kekleekle ɔ, e sa nɛ waa le bɔnɛ gba si himi mi he piɛɛlɔ nɛ e be asafo ɔ mi ɔ susuɔ ha. Gba si himi mi he piɛɛli fuu nɛ a be asafo ɔ mi ɔ ngɛ suɔmi kɛ ha a wekuhi, nɛ a bɔɔ mɔde konɛ a pee a he hunomɛ loo yigbayi loo fɔli kpakpahi. Eko ɔ, e slo a hemi kɛ yemi ngɛ wa nɔ́ ɔ he. E ma nyɛ maa ba kaa a li Yehowa Odasefoli a he sane tsɔ kaa wa he munyu yayahi nɛ nihi tuɔ nɛ a nuɔ ɔ pɛ. Be nɛ a ti ni komɛ a gba si himi mi he piɛɛli ɔmɛ kɛ jaa Mawu nɛ a ná we deka kɛ ha we a weku ɔ hu ɔ, ji nɔ́ nɛ a bua jɔɛ he ɔ nɛ. Ke wa kɔɔ nɔ́ se ɔ, lɔɔ maa ye bua wɔ nɛ waa kɛ nihi nɛ a be asafo ɔ mi ɔ maa hi si ngɛ mi mi jɔmi kɛ bumi mi, nɛ wa be a hɛ mi gbeye yee.—Abɛ 16:20-23.
3. Mɛni ji blɔ nɛ hi pe kulaa nɛ wa ma nyɛ maa gu nɔ kɛ ye bua gba si himi mi he piɛɛlɔ ko nɛ e be asafo ɔ mi se e yo loo e huno ngɛ mi ɔ konɛ e ba le anɔkuale ɔ?
3 Mo Ná E He Bua Jɔmi: Wa je mi bami ji blɔ kekleekle nɛ se be nɛ wa ma nyɛ maa gu nɔ kɛ ye bua nɔ ko nɛ e be asafo ɔ mi se e he piɛɛlɔ ngɛ asafo ɔ mi ɔ nɛ́ e ba le anɔkuale ɔ, se pi Baiblo mi ní sɛɛmi. (1 Pet. 3:1, 2) Nɔ́ nɛ he hia ngɛ enɛ ɔ peemi mi ji, a he bua jɔmi nɛ wa ma ná. Nyɛmimɛ yihi nɛ a ngɛ asafo ɔ mi ɔ, ma nyɛ ma ná yigbayihi nɛ a be asafo ɔ mi, se a hunomɛ ngɛ mi ɔ a he bua jɔmi, nɛ jã kɛ̃ nɛ nyɛmimɛ nyumuhi hu ma nyɛ ma ná hunomɛ nɛ a be asafo ɔ mi se a yihi ngɛ mi ɔ, a he bua jɔmi. Mɛni blɔ nɔ wa maa gu kɛ pee enɛ ɔ?
4. Mɛni wa ma nyɛ maa pee kɛ tsɔɔ kaa wa ngɛ gba si himi mi he piɛɛli nɛ a be asafo ɔ mi ɔ a he bua jɔmi?
4 Ke o kɛ nyɛmi Kristofono ɔ e huno ɔ loo e yo ɔ sɛɛ we ní lolo ɔ, lɛɛ o ma nyɛ maa pee jã keji o sɛ hlami nɛ o na nyɛmi Kristofono ɔ nɛ o kɛ lɛ susu níhi a he. Ke e ba kaa gba si himi mi he piɛɛlɔ nɛ be asafo ɔ mi ɔ bua jɔɛ wa he be mi nɛ wa ya slaa lɛ kekle ɔ, e sɛ nɛ wa kɔni mi nɛ jɔ. Ke wa ná e he bua jɔmi nɛ waa kɛ lɛ pee huɛ ɔ, lɔɔ ma nyɛ ma ha nɛ e ma ná Yehowa Odasefoli a he juɛmi kpakpa. (Rom. 12:20) Kristofoli komɛ nɛ a nane pi si ma nyɛ ma tsɛ gba si himi mi he piɛɛli nɛ a be asafo ɔ mi kɛ a wekuhi ní yemi bɔnɛ pee nɛ a le mɛ saminya, nɛ a kɛ dla juɛmi yaya ko nɛ a hɛɛ ngɛ Yehowa Odasefoli a he ɔ. A kɛ mɛ susuɔ níhi nɛ a bua jɔɔ he ɔ he mohu pe nɛ a kɛ mɛ maa sɛɛ Baiblo ɔ mi ní. Pee se ɔ, ke a na kaa gba si himi mi he piɛɛlɔ nɛ be asafo ɔ mi ɔ ná a he bua jɔmi ɔ, a kɛ lɛ nyɛɔ sɛɛɔ Ngmami ɔ mi ní. Aloo a ma nyɛ maa fɔ lɛ nine kɛ ba wa kpe ɔmɛ eko sisi konɛ e ba hyɛ nɔ́ nɛ e yo ɔ ngɛ kasee, titli ɔ, ke e le ni komɛ ngɛ asafo ɔ mi momo. Ke huno nɛ be asafo ɔ mi ɔ bua jɔɛ anɔkuale ɔ he po ɔ, wa ma nyɛ ma je e yi ngɛ yemi kɛ buami nɛ e kɛ haa e yo ɔ nɛ ji Odasefono ɔ he.
5. Mɛni blɔ nɔ asafo mi nikɔtɔmahi ma nyɛ maa gu kɛ ye bua gba si himi mi he piɛɛlɔ ko nɛ e be asafo ɔ mi se e he piɛɛlɔ ngɛ asafo ɔ mi ɔ?
5 E sa nɛ asafo mi nikɔtɔmahi titli nɛ a pee klaalo kaa a maa ye gba si himi mi he piɛɛli nɛ a be asafo ɔ mi se a hunomɛ loo a yihi ngɛ mi ɔ odase. Ke gba si himi mi he piɛɛlɔ ko nɛ e be asafo ɔ mi nɛ e bua jɔɛ kaa a kɛ lɛ nɛ sɛɛ Baiblo ɔ mi ní ɔ be he wami nɛ a tsi e nya ngɛ hiɔ tsami he, aloo hiɔ ko ngɛ lɛ haoe wawɛɛ ɔ, eko ɔ, e maa kplɛɛ nɛ a ngɔ Ngmami ɔ kɛ wo lɛ he wami. Ke haomi ko kaa gbenɔ ba sɛ weku ko nɛ pi e mi bimɛ tsuo ji Odasefoli ɔ mi ɔ, ke asafo mi nikɔtɔma amɛ ya konɛ a ya wo a bua a, a ma nyɛ ma bla gba si himi mi he piɛɛli enyɔ ɔmɛ tsuo nɛ a wo a bua.
6. Mɛni ji yi mi tomi komɛ a heje nɛ e sa kaa waa ye bua huno ko loo yogbayo ko nɛ e be asafo ɔ mi se e he piɛɛlɔ ngɛ asafo ɔ mi ɔ?
6 Ke a ye bua huno ko loo yogbayo ko nɛ e be asafo ɔ mi se e he piɛɛlɔ ngɛ asafo ɔ mi nɛ e ba le anɔkuale ɔ, lɔɔ ma ha nɛ e he piɛɛlɔ ɔ nɛ e ngɛ asafo ɔ mi ɔ bua maa jɔ wawɛɛ nitsɛ! Enɛ ɔ ma ha nɛ Yehowa, kɛ e bɔfo ɔmɛ, kɛ asafo ɔ tsuo bua maa jɔ. (Luka 15:7, 10) Se ke e ba kaa sisije ɔ, gba si himi mi he piɛɛlɔ nɛ e be asafo ɔ mi ɔ kplɛɛ we yemi kɛ buami nɛ a kɛ ha lɛ ɔ nɔ ɔ, wa ma nyɛ ma ná nɔ mi mami kaa Yehowa nɛ “e sume nɛ nɔ ko nɔ ko hɛ mi nɛ kpata, se mohu nɔ tsuaa nɔ nɛ tsake e tsui” ɔ, bua maa jɔ wa mɔde bɔmi ɔ he.—2 Pet. 3:9.
[Bua jɔmi munyu nɛ a ma nɔ mi ngɛ ba fa 6]
Wa je mi bami ji blɔ kekleekle nɛ se be nɛ wa ma nyɛ maa gu nɔ kɛ ye bua nɔ ko nɛ e be asafo ɔ mi se e he piɛɛlɔ ngɛ asafo ɔ mi ɔ nɛ́ e ba le anɔkuale ɔ, se pi Baiblo mi ní sɛɛmi