“Nyɛɛ Kɛ Hɛdɔ Nɛ Tsu Ní”
1. Mɛni su e sa kaa wa je kpo ngɛ wa fiɛɛmi nítsumi ɔ he?
1 Wa Kristofoli a sɔmɔmi nítsumi ɔ eko kulaa be nɛ sa kaa waa pee kudɔkudɔ ngɛ he. Mohu ɔ, a wo wɔ he wami kaa ‘waa kɛ hɛdɔ nɛ tsu ní’ nɛ wa ‘sɔmɔ Yehowa.’ (Rom. 12:11) Se kɛ̃ ɔ, níhi fuu ngɛ nɛ ma nyɛ maa ba kã nɛ wa peeɔ ngɛ wa sɔmɔmi nítsumi ɔ mi ɔ si. Hɛdɔ kɛ bua jɔmi nɛ waa kɛ tsuɔ wa Matsɛ Yemi sɔmɔmi ɔ, mɛni blɔ nɔ wa ma nyɛ maa “wo mi la”?—2 Tim. 1:6, 7, NW.
2. Mɛni blɔ nɔ dɛhe Baiblo kasemi maa ye bua wɔ nɛ waa pee kã ngɛ fiɛɛmi mi?
2 Dɛhe Baiblo Kasemi: Matsɛ Yemi fiɛɛlɔ kpakpa ji nɔ nɛ suɔ Mawu mlaa a, nɛ anɔkuale munyuhi nɛ ngɛ mi ɔ taa e tsui he. (La 119:97) Ke wa kase Baiblo mi anɔkualehi ngɛ wa dɛhe nikasemi mi ɔ, e taa wa tsui he nɛ e woɔ wɔ kã wawɛɛ. Suɔmi nɛ wa ngɛ ha Nɔ nɛ ha wɔ anɔkuale nɛ ɔmɛ kɛ sane kpakpa a nɛ wa suɔ kaa waa fiɛɛ ha nihi ɔ, woɔ wɔ he wami konɛ wa je Mawu yi nɛ waa jaje e biɛ ɔ kɛ tsɔɔ nihi. (Heb. 13:15) Ngɛ anɔkuale mi ɔ, ke waa kɛ hɛdɔ fiɛɛ sane kpakpa a, lɔɔ tsɔɔ kaa wa ngɛ hɛsa nɛ mi kuɔ ngɛ se nami nɛ ngɛ he ɔ he.
3. Mɛni blɔ nɔ Mawu mumi ɔ ma nyɛ maa ye bua wɔ ngɛ wa sɔmɔmi nítsumi ɔ mi?
3 Moo Sɔle Kɛ Bi Mawu Mumi Klɔuklɔu ɔ: Wa sɔmɔmi nítsumi ɔ be manye yee ngɛ wɔ nitsɛmɛ wa he wami nya. Mawu mumi ɔ lɛ haa nɛ wa peeɔ kã nitsɛ. (1 Pet. 4:11) Ke wa hɛ wɔ kɛ su Nɔ nɛ haa nɔ “he wami kpetekpleenyɛ” ɔ he ɔ, e ma ha wɔ mumi mi he wami konɛ waa fiɛɛ kɛ kã. (Yes. 40:26, 29-31) Benɛ bɔfo Paulo kɛ haomi kpe ngɛ e sɔmɔmi nítsumi ɔ mi ɔ, e ‘ná yemi kɛ buami kɛ je Mawu ngɔ.’ (Níts. 26:21, 22) Yehowa mumi klɔuklɔu ɔ nɛ woɔ nɔ he wami ɔ ma nyɛ maa ye bua wɔ konɛ waa kɛ hɛdɔ nɛ tsu wa sɔmɔmi nítsumi ɔ, lɔɔ heje ɔ, e sa nɛ waa sɔle kɛ bi.—Luka 11:9-13.
4. Ke wa pee kã a, mɛni yiblii e maa wo, se mɛni e sa kaa waa hyɛ nɛ hi ngɛ he?
4 Ke waa kɛ hɛdɔ fiɛɛ Matsɛ Yemi sane kpakpa a, e ma ha nɛ wa nyɛmimɛ Kristofoli hu kɛ hɛdɔ maa fiɛɛ. (2 Kor. 9:2) Ke waa kɛ bua jɔmi kɛ nɔ mi mami fiɛɛ ɔ, e ma ha nihi nɛ ngɛ wa zugba kpɔ ɔ mi ɔ maa bu wa sɛgbi ɔ tue. Se, e sa nɛ waa pee nihi nɛ wa he jɔ daa, nɛ waa ngɔ ga kɛ piɛɛ wa kã peemi ɔ he. (Tito 3:2) Be tsuaa be ɔ, e sa nɛ wa je bumi kpo ha wetsɛ ɔ, nɛ waa kplɛɛ nɔ́ nɛ e bua jɔ he ɔ nɔ.
5. Mɛni ga womi nɛ je Mawu ngɔ e sa nɛ waa bɔ mɔde nɛ wa kɛ tsu ní?
5 E sa nɛ waa kɛ “hɛdɔ nɛ tsu ní” be tsuaa be kaa Matsɛ Yemi ɔ fiɛɛli. Nyɛ ha nɛ waa kase Baiblo ɔ ngɛ wa dɛhe, nɛ waa je wa tsui mi kɛ sɔle ha Yehowa, nɔ nɛ haa nɔ mumi klɔuklɔu ɔ nɛ ngɛ he wami ɔ, bɔnɛ pee nɛ waa pee kã. Ke wa pee jã a, wa ma nyɛ ma tsu wa fiɛɛmi nítsumi ɔ kɛ hɛdɔ, kɛ “mumi klɔuklɔu ɔ kɛ nɔ mi mami babauu.”—1 Tes. 1:5, NW.