Moo Kase Yehowa Kɛ Yesu Nɛ O Kɛ Hɛdɔ Nɛ Fiɛɛ Ngɛ Kaimi Be ɔ Mi.

1. Ke e su Kaimi yemi be ɔ, mɛni nɛ Yehowa Odasefohi bɔɔ mɔde kaa a maa pee?

¹ Yehowa kɛ hɛdɔ tsuɔ e yi mi tomihi a he ní. Benɛ gbalɔ Yesaya tu Matsɛ Yemi ɔ mi jɔɔmi komɛ a he munyu ta a, e de ngɛ Yesaya 9:7 ke: ‘Yehowa Tabohiatsɛ ɔ kɛ hɛdɔ ma tsu ní nɛ ɔmɛ tsuo.’ Jã a kɛ̃ nɛ benɛ Mawu Bi ɔ ngɛ zugba a nɔ ɔ, e kɛ hɛdɔ fã anɔkuale jami he. (Yoh. 2:13-17; 4:34) Daa jeha ke e su Kaimi be ɔ, fiɛɛli ngɛ je kɛ wɛ kaseɔ Yehowa kɛ Yesu, nɛ a kɛ hɛdɔ fiɛɛ. Anɛ o maa piɛɛ a he jeha nɛ ɔ lo?

2. Mɛni nɛ wa maa ngɔ hɛdɔ kɛ pee kɛ je March 7?

² Kaimi ɔ He Nine Fɔmi Womi Gbami: Wa ma bɔni kaimi ɔ he nine fɔmi womi ɔ gbami kɛ je March 7 ɔ nɔ. Moo to blɔ nya nɛ o kɛ o he nɛ wo fiɛɛmi ní tsumi ɔ mi vii. Fiɛɛli nɛ a ngɛ asafo ɔmɛ a mi ɔ kɛ bua jɔmi ma gba Kaimi ɔ he nine fɔmi womi ɔ ngɛ a zugba kpɔ ɔmɛ a mi. Moo bɔ mɔde nɛ o fɔ o Baiblo mi ní kaseli, nihi nɛ o kɛ mɛ tsuɔ ní, o weku li, kɛ o sukuu bi nine kɛ gu nine fɔmi womi ɔ nɔ loo kɛ gu jw.org nɔ.

3. Mɛni blɔ nɔ wa maa gu kɛ bli wa sɔmɔmi ní tsumi ɔ mi ngɛ March kɛ April mi?

³ Blɔ Gbali A Wami Ní Tsumi: Ja wa ná kã loko wa ma nyɛ ma bli wa sɔmɔmi ní tsumi ɔ mi. Atsinyɛ jemi ko be he kaa nihi babauu maa ngɔ a he kɛ wo blɔ gbali a wami ní tsumi ɔ mi ngɛ March kɛ April nyɔhiɔ ɔmɛ a mi, ejakaa a ma ná he blɔ konɛ a kɛ ngmlɛfia 30 nɛ sɔmɔ kaa blɔ gbali a wali. Ke nyɛ ngɛ nyɛ weku Mawu jami loo dɛ he ní kasemi pee ɔ, nyɛ susu bɔ nɛ nyɛ ma plɛ kɛ pee jã a he. (Abɛ 15:22) Ke o kɛ kã gba nine fɔmi womi ɔ, e maa wo ni kpahi he wami nɛ mɛ hu a maa pee babauu ngɛ fiɛɛmi mi. Ke o ngɔ níhi kɛ sã afɔle bɔ nɛ pee nɛ o pee babauu ɔ, lɔ ɔ maa tsɔɔ kaa o ngɛ Yesu kasee.​—Marko 6:31-34.

4. Ke wa kase bɔ nɛ Yehowa kɛ Yesu kɛ hɛdɔ tsuɔ ní ha a, mɛni jɔɔmihi wa ma ná?

⁴ Ke wa kase Yehowa kɛ Yesu nɛ waa kɛ hɛdɔ fiɛɛ ngɛ Kaimi be ɔ mi ɔ, wa ma ná jɔɔmihi babauu. E ma ha nɛ wa maa ye nihi fuu odase ngɛ wa zugba kpɔ ɔ mi. Ke wa bli wa sɔmɔmi ní tsumi ɔ mi nɛ wa ye bua nihi ngɛ jamɛ a be ɔ mi ɔ, wa ma ná bua jɔmi babauu. (Níts. 20:35) Nɔ́ nɛ pe kulaa a, wa maa sa Yehowa Mawu kɛ e Bi Yesu nɛ a kɛ hɛdɔ tsuɔ ní ɔ a hɛ mi.