‘Ngɔɔ O Wami Kɛ Fɔ Si’ Ha O Nikaseli Ɔmɛ
1. Loko nɔ ko ma nyɛ maa ye bua Baiblo kaselɔ ko ɔ, mɛni e hia nɛ e pee?
1 Loko nɔ ko ma nyɛ maa ye bua Baiblo kaselɔ ko nɛ e jɔɔ e he nɔ ha Mawu ɔ, níhi fuu a he hia pe Baiblo ɔ nɛ e kɛ lɛ maa kase daa kɛkɛ. Bɔfo Paulo ngɔ bɔnɛ e kɛ nihi nɛ e tsɔɔ mɛ ní ɔ hi si ha a kɛ to bɔnɛ bimɛanyɛ hɛɛɔ e bimɛ dɔdɔɔdɔ ɔ he. Wɔ hu wa suɔ kaa waa ngɔ ‘wa wami’ loo wa be kɛ wa he wami kɛ ye bua wa nikaseli ɔmɛ bɔnɛ pee nɛ a wa ngɛ Mawu jami mi.—1 Tes. 2:7-9.
2. Mɛni heje e sa kaa wa je nɔ he susumi kpo, nɛ mɛni blɔhi a nɔ wa ma nyɛ maa pee jã ngɛ?
2 Moo Tsɔɔ Kaa O Susuɔ E He: Ke Baiblo kaselɔ ɔ ngɔ níhi nɛ e ngɛ kasee ɔ kɛ bɔni nítsumi ɔ, e he nile ma de lɛ ke e kɛ nihi nɛ nyɛɛ we ngɛ Baiblo sisi tomi mlaahi a nya nɛ kpa bɔmi. (1 Pet. 4:4) Eko ɔ, e wekuli ma kua lɛ. (Mat. 10:34-36) Wa ma nyɛ maa ye bua lɛ konɛ e ko ye aywilɛho ke waa kɛ wa ní peepee tsɔɔ kaa wa susuɔ e he nitsɛ. Ma se sane kpakpa fiɛɛlɔ ko nɛ ná níhi a si kpami fuu ɔ de ke: “Koo ye esɔ kɛ je nikaselɔ ɔ ngɔ ke nyɛ kase ní ta. Ke e maa hi ɔ, o kɛ lɛ nɛ sɛɛ ní be bɔɔ loko o je.” Moo pee klaalo kaa o ma ha lɛ yemi kɛ buami nɛ maa hia lɛ. Kaa nɔ hyɛmi nɔ́ ɔ, ke e be he wami ɔ, o ma nyɛ ma ya slaa lɛ loo o maa fia lɛ tɛlifoo nɛ o bi e si. O ma nyɛ maa hi si ngɛ e kasa nya ke nyɛ ya nikasemi konɛ eko ɔ, o ye bua lɛ kɛ hyɛ e bimɛ ɔmɛ.
3. Mɛni wa ma nyɛ maa pee kɛ ye bua wa nikaselɔ konɛ e ná he wami womi kɛ je asafo mi bi ɔmɛ a ngɔ?
3 Yemi Kɛ Buami Nɛ Asafo ɔ Ma Ha Lɛ: Ke o ya fiɛɛmi ngɛ o nikaselɔ ɔ kpɔ mi ɔ, e hi kaa o ma bi e si kpiti konɛ o ngɔ fiɛɛlɔ nɛ o kɛ lɛ ngɛ ní tsue ɔ kɛ tsɔɔ lɛ. Ke e maa hi ɔ, be komɛ ha nɛ fiɛɛli ekpaekpahi, kɛ asafo mi nikɔtɔmahi nɛ piɛɛ o he nɛ nyɛɛ kɛ lɛ nɛ ya kase ní. Jehanɛ se hu ɔ, ke o kɛ nikaselɔ ɔ bɔni ní kasemi pɛ, wo lɛ he wami konɛ e ba kpe ngɛ Matsɛ Yemi Asa a nɔ. Enɛ ɔ ma ha nɛ e kɛ asafo mi bi ɔmɛ nɛ eko ɔ, a ma ba pee e mumi mi weku ɔ ma ná huɛ bɔmi kpakpa.—Mar. 10:29, 30; Heb. 10:24, 25.
4. Mɛni jɔɔmi ma nyɛ maa je wa mɔde bɔmi ɔ mi kɛ ba?
4 Fɔlɔ nɛ bɔɔ mɔde nɛ e tsɔɔ e bimɛ Mawu he ní ɔ náa bua jɔmi wawɛɛ ke bimɛ ɔmɛ ba pee Yehowa sɔmɔli nɛ a ngɛ nyɛɛe ngɛ anɔkuale ɔ nya. (3 Yoh. 4) Wɔ hu wa ma nyɛ ma ná bua jɔmi kaa jã ke wa ngɔ wa be kɛ wa he wami kɛ ye bua wa Baiblo kaseli ɔmɛ.