The Bible—Its Power in Your Life

Baiblo ɔ ye bua nimli ayɔhi abɔ nɛ a pee tsakemi kpakpahi ngɛ a si himi mi. Mɛni ji Baiblo mi sisi tomi mlaa komɛ nɛ ke waa kɛ tsu ní ɔ, e maa ye bua wɔ konɛ wa tsu haomihi nɛ waa kɛ kpeɔ mwɔnɛ ɔ a he ní? Atsinyɛ jemi ko be he kaa ke o hyɛ video nɛ e yi ji, The Bible—Its Power in Your Life (Baiblo ɔ—Bɔnɛ E Ma Nyɛ Maa Ye Bua Mo Ngɛ O Si Himi Mi Ha) nɛ ji video enyɔne nɛ ngɛ DVD nɛ e yi ji, The Bible—A Book of Fact and Prophecy (Baiblo ɔ—Womi Nɛ Anɔkuale Munyuhi Kɛ Gbami Ngɛ Mi) ɔ nɔ ɔ, o kɛ bua jɔmi maa na sane bimi nɛ ɔ heto. Ke o hyɛ video nɛ ɔ, anɛ o ma nyɛ ma ha sane bimi nɛ nyɛɛ se nɛ ɔmɛ a heto lo?

(1) Mɛni heje nɛ wa ma nyɛ ma de ke Baiblo ɔ ji womi ko nɛ hi pe womi kpahi tsuo ɔ? (Heb. 4:12) (2) Ke Baiblo ɔ ma nyɛ maa ye bua nihi konɛ a si himi nɛ pee kpakpa a, mɛni heje mɔ nɛ adesahi kɛ haomihi babauu ngɛ kpee? (3) Mɛni ji Baiblo ɔ munyuyi? (4) Mɛni ji Baiblo ngmamihi nɛ a wo ta ngɛ video ɔ mi nɛ ma nyɛ maa ye bua nihi nɛ a sɛ gba si himi mi konɛ (a) a nyɛ nɛ a sɛɛ ní saminya nɛ́ (b) a nyɛ nɛ a ye a he nɔ ke a mi mi fu? (5) Mɛni blɔ nɔ lɛ bɔnɛ Kristofoli buu gba si himi ha a haa nɛ a weku si himi peeɔ kpakpa ngɛ? (Efe. 5:28, 29) (6) Ngɛ mɛni blɔ nɔ nɛ Yehowa pee nɔ hyɛmi nɔ́ kpakpa kɛ ha fɔli? (Mar. 1:9-11) (7) Mɛni blɔ nɔ fɔli ma nyɛ maa gu kɛ ha nɛ bua jɔmi nɛ hi a weku nikasemi mi? (8) Ngɛ Baiblo ɔ kasemi se ɔ, mɛni hu lɛ Mawu Munyu ɔ woɔ fɔli he wami nɛ́ a pee kɛ ha a bimɛ? (9) Ngɛ mɛni blɔ nɔ nɛ ga womi nɛ Baiblo ɔ kɛ ha a ma nyɛ maa ye bua wekuhi konɛ a da ohia si himi nya? (10) Mɛni ji Baiblo mi sisi tomi mlaahi nɛ kɔɔ falifali peemi, tsopa yaya kɛ nítsumi, dã, kɛ yeyeeye peemi he lɛ ke waa kɛ tsu ní ɔ, lɔɔ ma ha nɛ wa ma ná nɔmlɔtso mi he wami bɔnɛ sa? (11) Mɛni ji si womihi nɛ ngɛ Baiblo ɔ mi nɛ ma nyɛ maa ye bua wɔ? (Hiob 33:25; La 145:16) (12) Mɛni blɔ nɔ lɛ tsɔɔmihi nɛ ngɛ Mawu Munyu ɔ mi ɔ ye bua mo nɛ o si himi pee kpakpa ngɛ? (13) Mɛni blɔ nɔ nɛ o ma nyɛ maa ngɔ video nɛ ɔ kɛ ye bua nihi ngɛ?