Video Ehe Nɛ Waa Kɛ Maa Je Baiblo Mi Ní Kasemi Sisi

Nihi fuu nine ngɛ video kpiti nɛ e yi ji Mɛni He Je Nɛ E Sa Kaa Waa Kase Baiblo ɔ? nɛ ngɛ jw.org ɔ nɔ sue. A pee video nɛ ɔ konɛ e tle nihi a bua jɔmi si nɛ a kplɛɛ nɛ waa kɛ mɛ nɛ kase Baiblo ɔ. Ke wa ya, “Bi Nɛ A Kɛ Mo Nɛ Ba Kase Baiblo ɔ” nɛ ngɛ wa Intanɛti ní tsumi he ɔ nɔ loo ke wa po QR (quick response) nɛ ngɛ dɛ womi ehe ɔmɛ eko tsuaa eko se ɔ foni ɔ, wa maa na video ɔ. Blɔ komɛ a nɔ nɛ wa maa gu nɛ waa kɛ video ɔ ma tsu ní ngɛ blɔ kpakpa nɔ lɛ nyɛɛ se ɔ nɛ.

• Ke o kpale ya slaa wetsɛ ko ɔ, o de lɛ ke: “Anɛ o suɔ nɛ ma je video kpiti ko nɛ tsɔɔ blɔ nɔ nɛ o maa gu kɛ ná Baiblo mi sane bimihi a heto kɛ tsɔɔ mo lo?” Ke e kplɛɛ ɔ, je video ɔ kɛ tsɔɔ lɛ ngɛ o kɔmpiuta tsɔwi nɛ a hɛɛ ngɛ dɛ mi loo lɛ nitsɛ e kɔmpiuta nɔ.

• Ke o ha nɔ ko dɛ womi ehe ɔmɛ eko ngɛ ma nɔ odase yemi mi ɔ, tsɔɔ lɛ QR blɔ he ɔ nɛ o wo nɔ ɔ he wami kaa ke e ngɔ e kɔmpiuta tsɔwi nɛ a hɛɛ ngɛ dɛ mi ɔ kɛ po okadi ɔ foni ɔ, e kɛ lɛ maa ya wa Intanɛti ɔ nɔ tɛɛ. Akɛnɛ ngɛ gbihi fuu a mi ɔ, QR ɔ kɛ nɔ yaa video ɔ nɔ tɛɛ ngɛ wa Intanɛti ɔ nɔ he je ɔ, o ma nyɛ maa je video ɔ ngɛ o kɔmpiuta tsɔwi nɛ a hɛɛ ngɛ dɛ mi ɔ nɔ ngɛ si dami nya.

• Moo tu video ɔ he munyu kɛ tsɔɔ o ní tsuli, o sukuu bi, o weku li, kɛ ni kpahi, nɛ o je kɛ tsɔɔ mɛ. Loo o ma nyɛ maa mane mɛ sɛ gbi kɛ tsɔɔ mɛ blɔ nɛ a maa gu nɔ kɛ na video ɔ ngɛ jw.org, konɛ mɛ nitsɛmɛ a hyɛ.

Ke waa kɛ blɔ nya tomi ehe nɛ ɔ tsu ní saminya a, wa ma nyɛ maa je Baiblo mi ní kasemi fuu sisi, nɛ wa maa ye bua ‘ni nɛmɛ nɛ a suɔ neneene wami ɔ.’​—Níts. 13:48.